អន្តរជាតិ៖ លោកស្រី Mette Frederiksen នាយករដ្ឋមន្ត្រីដាណឺម៉ាក បានចេញការព្រមានជាថ្មីថា ចលនាណាមួយរបស់សហរដ្ឋអាមេរិកក្នុងការដណ្តើមយកកោះ Greenland ដោយកម្លាំង នឹងបំផ្លាញទំនាក់ទំនងសន្តិសុខឆ្លងមហាសមុទ្រអាត្លង់ទិករយៈពេល ៨០ឆ្នាំ បន្ទាប់ពីប្រធានាធិបតី ដូណាល់ ត្រាំ បញ្ជាក់ម្តងទៀតនូវបំណងប្រាថ្នាផ្ទាល់ខ្លួន ដើម្បីបញ្ចូលទឹកដីអាកទិកសម្បូរទៅដោយរ៉ែនិងធនធានដ៏កម្រ។ នេះបើយោងតាមការចុះផ្សាយចុះផ្សាយដោយ CNA នាថ្ងៃទី ០៦ ខែមករា
ថ្លែងប្រាប់បណ្តាញ TV2 លោកស្រី Mette Frederiksen បាននិយាយថា៖ «ប្រសិនបើសហរដ្ឋអាមេរិកសម្រេចចិត្តវាយប្រហារដោយយោធាទៅលើប្រទេសណាតូមួយផ្សេងទៀត នោះអ្វីៗទាំងអស់នឹងឈប់ រួមទាំងណាតូ និងសន្តិសុខក្រោយសង្គ្រាមលោកលើកទី ២»។
ទោះជាយ៉ាងណាក៏ដោយ ភាពតានតឹងមួយនេះបានកើតឡើងកាន់តែខ្លាំងឡើង បន្ទាប់ពីមេដឹកនាំអាមេរិកបានផ្ដល់កិច្ចសម្ភាសន៍តាមទូរសព្ទជាមួយទស្សនាវដ្តី The Atlantic កាលពីថ្ងៃអាទិត្យទី៤មករា ថា «យើងត្រូវការកោះ Greenland ដើម្បីការពារសន្តិសុខជាតិ ហើយប្រទេសដាណឺម៉ាកនឹងមិនអាចធ្វើវាបានទេ»។
ជាការឆ្លើយតបវិញ នាយករដ្ឋមន្ត្រី Greenland លោក Jens-Frederik Nielsen បានប្រាប់លោក ត្រាំ ឱ្យដកថយ ខណៈប្រទេសអឺរ៉ុបជាច្រើន និងសហភាពអឺរ៉ុបបានសម្រុកគាំទ្រដាណឺម៉ាក និងជំរុញឲ្យទីក្រុងវ៉ាស៊ីនតោនឈប់គំរាមកំហែងសម្ព័ន្ធមិត្តណាតូ។
យ៉ាងណាមិញ ដោយសារតែការអន្តរាគមន៍យោធារបស់ទីក្រុងវ៉ាស៊ីនតោននៅក្នុងប្រទេសវ៉េណេស៊ុយអេឡា បានបញ្ឆេះការភ័យខ្លាចឡើងវិញអំពីផែនការលោកត្រាំលើទឹកដីដាណឺម៉ាកស្វយ័ត ដែលមានដីល្បាប់ដ៏កម្រហើយមិនទាន់បានប្រើប្រាស់នូវឡើយ និងអាចជាតួអង្គសំខាន់មួយ ខណៈដែលទឹកកកប៉ូលរលាយក៏បានបើកផ្លូវដឹកជញ្ជូនថ្មីដែរ។
ជាងនោះទៅទៀតដែរ កាលពីខែមុន លោកត្រាំបានតែងតាំងអភិបាលរដ្ឋ Louisiana លោក Jeff Landry ជាប្រេសិតពិសេសប្រចាំកោះ Greenland។ លោក Landry បានពណ៌នាថា តួនាទីរបស់លោកមានគោលបំណងធ្វើឲ្យកោះមួយនេះ ក្លាយជាផ្នែកមួយនៃសហរដ្ឋអាមេរិក៕ដោយ៖តារា
លោកស្រី Mette Frederiksen នាយករដ្ឋមន្ត្រីដាណឺម៉ាក និង លោកប្រធានាធិបតីអាម៉េរិក ដូណាល់ ត្រាំ
រូបភាព៖ កោះ Greenland
