ភ្នំពេញ៖ ផលិតកម្មចិញ្ចឹមសត្វនៅក្នុងស្រុករបស់ប្រទេសកម្ពុជា បាននិងកំពុងវិវត្តន៍រីកច្រើនយ៉ាងខ្លាំង ស្របពេលការចិញ្ចឹមសត្វបានកំពុងកើតឡើងយ៉ាងផុលផុស ជាលក្ខណៈគ្រួសារ និងការចិញ្ចឹមបែបឧស្សាហកម្មទំទើប ដោយបានឆ្លើយតបទៅតាមតម្រូវការទីផ្សារក្នុងស្រុកបានគ្រប់គ្រាន់ ជំនួសការនាំចូលស្ទើរ ទាំងស្រុង ជាពិសេសសាច់ជ្រូក មាន់ និងទាជាដើម។
បើតាមប្រធានសមាគមអ្នកចិញ្ចឹមសត្វនៅកម្ពុជា លោក ស្រ៊ុន ពៅ បានលើកឡើងថា ស្តីពីការចិញ្ចឹមសត្វ ផលិតកម្មសត្វ និងការផ្គត់ផ្គង់សាច់សម្រាប់តម្រូវការក្នុងស្រុកនេះថា ទាក់ទិនការចិញ្ចឹមសត្វក្នុងស្រុកឃើញថា ក្រសួងកសិកម្ម រុក្ខាប្រមាញ់ និងនេសាទ ដែលជាសេនាធិការរបស់រារដ្ឋាភិបាល បានគិតគូរយកចិត្តទុកដាក់យ៉ាងខ្លាំង ធានាដល់ការគ្រប់គ្រង ការអភិវឌ្ឍសុខភាពសត្វ និងផលិតកម្មសត្វ ការធានានិរន្តរភាពនៃការផ្គត់ផ្គង់, ផលិតកម្មសត្វប្រកបដោយគុណភាព និងសុវត្ថិភាពសម្រាប់ ទីផ្សារក្នុងស្រុក និងការនាំចេញជាដើម។
ប្រធានសមាគមអ្នកចិញ្ចឹមសត្វរូបនេះ បានលើកឡើងបន្ថែមថា ជាក់ស្តែងនៅក្នុងបញ្ហាប្រឈមនៃការអូសបន្លាយជម្លោះព្រំដែន ដែលបង្កដោយប្រទេសជិតខាងនេះ ផលិតកម្មសត្វនៅកម្ពុជា បាននិងកំពុងវិវត្តន៍រីកច្រើនយ៉ាងខ្លាំង និងបានកំពុងផ្លាស់ប្តូររបត់នៃការចិញ្ចឹមសត្វ ជាពិសេសសត្វជ្រូក គឺការ ចិញ្ចឹមជាលក្ខណៈគ្រួសារទៅជាកសិកដ្ឋាន និងការចិញ្ចឹមជាកសិដ្ឋានធម្មតា ទៅតាមបែបឧស្សាហកម្មទំនើប, ដោយការចិញ្ចឹមបែបនេះ គឺមានគុណភាព និងស្របតាមស្តង់ដារខ្ពស់ និងបានកំពុងកើតឡើងជាបន្តបន្ទាប់។ នេះជាការកំពុងរៀបចំខ្លួនរបស់កម្ពុជា ក្នុងការជំរុញ ផ្គត់ផ្គង់តម្រូវការសាច់ក្នុងស្រុកឱ្យមាននិរន្តរភាព ជំនួសនៃការពឹងផ្អែកទីផ្សារខាងក្រៅ និងដើម្បីឈានទៅប្រកួតប្រជែង ជំរុញដល់ផលិតកម្ម សត្វ និងផលិតកម្មដ៏ទៃទៀតនៅក្នុងវិស័យកសិកម្មនៅកម្ពុជាឱ្យកាន់តែខ្លាំងក្លា។
សូមជម្រាបថា ជុំវិញផលិតកម្មក្នុងវិស័យកសិកម្ម, នាពេលកន្លងមក អ្នកនាំពាក្យក្រសួងកសិកម្ម រុក្ខាប្រមាញ់ និងនេសាទ លោក ឃឹម ហ្វីណង់ ក៏ធ្លាប់បានលើកឡើងថា ទាក់ទិនផលិតកម្មក្នុងស្រុកបច្ចុប្បន្នមានអតិរេកនៅក្នុងផលិតកម្មស្ទើរតែគ្រប់មុខ ក្នុងនោះកសិផលជាច្រើន ក្រៅពីផ្គត់ផ្គង់នៅលើ ទីផ្សារក្នុងស្រុក បាននិងកំពុងហៀរទៅកាន់ទីផ្សារក្រៅស្រុកជាច្រើនផងដែរ។ ចំណែកផលិតកម្មសត្វវិញ កម្ពុជាកំពុងមានការរីកចម្រើន និង កំពុងមានការចិញ្ចឹមយ៉ាងផុលផុស ដោយបានគាំទ្រដល់តម្រូវការទីផ្សារក្នុងស្រុក។
សូមបញ្ជាក់ថា ជុំវិញការនាំចេញវិញ, បើយោងតាមរបាយការណ៍អគ្គនាយកដ្ឋានគយ និងរដ្ឋាករកម្ពុជា នៅក្នុងបំណាច់ឆ្នាំ២០២៥ កម្ពុជា បាននាំចេញស្បែកជាប់រោម ស្បែកសិប្បនិម្មិត និងផលិតផលធ្វើពីស្បែក មានទឹកប្រាក់ប្រមាណជាង ២៧៨ លានដុល្លារសហរដ្ឋអាម៉េរិក នឹងរំពឹងថា នៅពេលអនាគត កម្ពុជានឹងជំរុញដល់ទីផ្សារនាំចេញកាន់តែខ្លាំងក្លា ខណៈបច្ចុប្បន្នកម្ពុជាកំពុងស្រូបយកឱកាសវិនិយោគលើ វិស័យចិញ្ចឹមសត្វជាបន្តបន្ទាប់៕
ដោយ៖តារា
រូបភាព៖BTV
