គ្រូបង្វឹក Peter Cklamovski បានជំរុញឱ្យអ្នកគាំទ្រម៉ាឡេស៊ីរក្សាជំនឿលើការប្រឹងប្រែងរបស់ក្រុមជម្រើសជាតិសម្រាប់ព្រឹត្តិការណ៍ Asian Cup ឆ្នាំ 2027 ដោយទទូចថាការដកពិន្ទុពីក្រុមជុំវិញបញ្ហាកីឡាករចូលសញ្ជាតិជាការមិនសមហេតុផល។
ក្តីបារម្ភមានកាន់តែខ្ពស់ក្នុងចំណោមអ្នកគាំទ្រម៉ាឡេស៊ី បន្ទាប់ពីមានការភ័យខ្លាចថា សហព័ន្ធបាល់ទាត់អាស៊ី (AFC) អាចដកក្រុមចេញពីវគ្គជម្រុះ Asian Cup ឆ្នាំ 2027 ឬដកពិន្ទុ។ រឿងនេះកើតឡើងបន្ទាប់ពីរឿងអាស្រូវដ៏ល្បីមួយពាក់ព័ន្ធនឹងកីឡាករចូលសញ្ជាតិចំនួន 7 នាក់ ដែលថ្មីៗនេះត្រូវបាន FIFA ចាត់ទុកថាមិនមានសិទ្ធិចូលលេងឡើយ។
នៅក្នុងបទសម្ភាសន៍ជាមួយ Nadi Arena លោក Cklamovski បាននិយាយថា “ខ្ញុំពិតជាភ្ញាក់ផ្អើលណាស់ ប្រសិនបើម៉ាឡេស៊ីពិតជាត្រូវបានកាត់ពិន្ទុមែន។ នេះជារឿងអយុត្តិធម៌។ FIFA និង AFC [ពីដំបូង] បានបញ្ជាក់ថា កីឡាករដែលពាក់ព័ន្ធនឹងត្រូវបានអនុញ្ញាតឱ្យលេង។ បើមិនដូច្នេះទេ ខ្ញុំនឹងដកសិទ្ធិពួកគេតាំងពីដើមមក។ រដ្ឋាភិបាលម៉ាឡេស៊ីក៏បានទទួលស្គាល់សញ្ជាតិរបស់ពួកគេដែរ”។
កីឡាករទាំងប្រាំពីររូបគឺ Hector Hevel, Gabriel Palmero, Facundo Garces, Rodrigo Holgado, Imanol Machuca, Joao Figueiredo និង Jon Irazabal ត្រូវបានហាមប្រាមមិនឱ្យលេងរយៈពេលមួយឆ្នាំ។ FIFA បានដាក់ទណ្ឌកម្មយ៉ាងធ្ងន់ធ្ងរដល់សមាគមន៍បាល់ទាត់ម៉ាឡេស៊ី(FAM)។
បន្ទាប់ពីបណ្តឹងឧទ្ធរណ៍ដំបូងត្រូវបានច្រានចោលដោយ FIFA សមាគមន៍បាល់ទាត់ម៉ាឡេស៊ី បានបញ្ជូនសំណុំរឿងទៅកាន់តុលាការអាជ្ញាកណ្តាលសម្រាប់កីឡា (CAS)។ សាលក្រមត្រូវបានគេរំពឹងទុកមុនការប្រកួតជម្រុះចុងក្រោយរវាងវៀតណាម និងម៉ាឡេស៊ីនៅថ្ងៃទី ៣១ ខែមីនា ឆ្នាំ ២០២៦ ដែលគ្រោងនឹងធ្វើនៅកីឡដ្ឋាន Thien Truong ភាគខាងជើងប្រទេសវៀតណាម។ ទោះបីជាមានភាពចលាចលក៏ដោយ Cklamovski នៅតែផ្តោតលើអនាគត។
គាត់បាននិយាយថា “ខ្ញុំសង្ឃឹមថាកីឡាករទាំង 7 នាក់នឹងអាចត្រលប់មកវិញឆាប់ៗនេះហើយជួយក្រុមឱ្យទទួលបានសិទ្ធិសម្រាប់ Asian Cup។ យើងគម្រោងហៅខ្សែប្រយុទ្ធសញ្ជាតិប្រេស៊ីល Bergson Da Silva សម្រាប់ការប្រកួតជាមួយវៀតណាមនាពេលខាងមុខ”។
គ្រូបង្វឹកវ័យ 47 ឆ្នាំរូបនេះបានបន្ថែមថា “យើងនឹងទៅប្រទេសវៀតណាមដើម្បីឈ្នះ និងរក្សាតំណែងកំពូលរបស់យើងក្នុងក្រុមជម្រុះ។ នោះគឺជាគោលដៅចម្បងរបស់យើង ហើយក៏ជាការពិតដែលក្រុមទាំងមូលចង់បានដែរ”។
លោក Cklamovski អតីតអ្នកចាត់ការក្រុម Shimizu S-Pulse, Montedio Yamagata និង FC Tokyo បាននិយាយកាលពីខែតុលាឆ្នាំ 2025 ថាគាត់មិនខ្វល់ខ្វាយចំពោះការពិន័យនោះទេ ដោយសង្កត់ធ្ងន់ថាម៉ាឡេស៊ី មិនពឹងផ្អែកលើកីឡាករណាម្នាក់ឡើយ៕
