ភ្នំពេញ៖ បើយោងតាមរបាយការណ៍របស់ក្រសួងពាណិជ្ជកម្ម បានបង្ហាញថា កម្ពុជានាំចូលរថយន្តគ្រួសារ មានទំហំទឹកប្រាក់ចំនួន ១,១ ពាន់លានដុល្លារ នៅក្នុងឆ្នាំ ២០២៥ កើនឡើង ៦០,២១% ធៀបនឹងឆ្នាំ ២០២៤ ឆ្លុះបញ្ចាំងពីតម្រូវការប្រើប្រាស់របស់ប្រជាពលរដ្ឋនៅក្នុងស្រុកកើនឡើង។
បើតាមការបញ្ជាក់ពីលោក ងន សាំង អគ្គនាយកក្រុមហ៊ុន អ អិម អេ ខេមបូឌា បានមានប្រសាសន៍ថា ទីផ្សាររថយន្តនៅកម្ពុជា មានកំណើនពីមួយឆ្នាំទៅមួយឆ្នាំ បន្ទាប់ពីវិបត្តិជំងឺកូវីដ១៩។ កំណើននៃទីផ្សាររថយន្តនៅកម្ពុជា ដោយសារប្រជាជនកម្ពុជាសម្បូរដោយមនុស្សវ័យក្មេង ហើយដល់ពេលដែលពួកគាត់មានតម្រូវការរថយន្ត។
លោកបានបន្ថែមថា៖ «ស្ថានភាពសេដ្ឋកិច្ចកម្ពុជា មានភាពល្អប្រសើរជាងមុន មនុស្សម្នាក់ៗ មានការងារធ្វើ ដែលនាំឱ្យពួកគាត់មានចំណូលច្រើនជាងមុន ហើយធ្វើឱ្យមានតម្រូវការរថយន្តក៏កើនឡើងដែរ ខណៈអ្នកវិនិយោគ ក៏ច្រើនជាងមុនដែរ ព្រោះអ្នកវិនិយោគក៏ត្រូវការវិនិយោគច្រើនជាងមុនដែរ»។
ចំណែកទីផ្សាររថយន្តថ្មីនៅប្រទេសកម្ពុជា មានការកើនឡើងគួរឱ្យកត់សម្គាល់ ដោយកើនដល់ ៦០% នៅដំណាច់ឆ្នាំ ២០២៥ ខណៈការនាំចូលរថយន្តជជុះមានការធ្លាក់ចុះ៕
ដោយ៖តារា
