ក្រុមហ៊ុនដឹកជញ្ជូនអាហារ Deliveroo នឹងបញ្ចប់ប្រតិបត្តិការនៅប្រទេស សិង្ហបុរី នៅថ្ងៃទី 4 ខែមីនា បន្ទាប់ពីដំណើរការអស់រយៈពេល 11 ឆ្នាំ។
ក្រុមហ៊ុនបានបញ្ជាក់ក្នុងសេចក្តីប្រកាសលើគេហទំព័ររបស់ខ្លួននៅថ្ងៃពុធថា៖
«នេះជាការសម្រេចចិត្តដ៏លំបាកមួយ បន្ទាប់ពីការវាយតម្លៃលក្ខខណ្ឌជាក់លាក់ក្នុងប្រទេស និងការផ្តោតលើការវិនិយោគនៅទីផ្សារដែលយើងឃើញផ្លូវច្បាស់បំផុតឆ្ពោះទៅរកការពង្រីកប្រកបដោយចីរភាព និងភាពដឹកនាំរយៈពេលវែង»។
ក្រុមហ៊ុនបានបន្ថែមថា៖«Deliveroo នឹងធ្វើការជិតស្និទ្ធជាមួយក្រុមការងារក្នុងតំបន់ ដើម្បីគាំទ្រអតិថិជន ដៃគូ និងអ្នកដឹកជញ្ជូន ក្នុងអំឡុងពេលផ្លាស់ប្តូរនេះ»។
Deliveroo បានចូលទីផ្សារសិង្ហបុរីនៅខែវិច្ឆិកា ឆ្នាំ 2015 តាមការរាយការណ៍របស់ Channel News Asia។
លោក Miki Kuusi នាយកប្រតិបត្តិរបស់ Deliveroo និងជាប្រធាន DoorDash International បាននិយាយថា៖«ក្នុងរយៈពេល 11 ឆ្នាំកន្លងមក យើងមានមោទនភាពដែលបានជួយបង្កើតទីផ្សារដឹកជញ្ជូនអាហារនៅសិង្ហបុរី ដោយផ្តល់ឱ្យអតិថិជននូវជម្រើសភោជនីយដ្ឋាន និងហាងលក់គ្រឿងទេសជាច្រើន»។
គាត់បានបន្ថែមថា៖«ចំពោះបុគ្គលិក អតិថិជន ដៃគូ និងអ្នកដឹកជញ្ជូនទាំងអស់ ដែលបានធ្វើដំណើរជាមួយយើង សូមអរគុណយ៉ាងជ្រាលជ្រៅ»។
តាមការរាយការណ៍របស់ The Straits Times អតិថិជនអាចប្រើប្រាស់កាតអំណោយ ឬក្រេឌីតដែលនៅសល់បាន ហើយអ្នកដឹកជញ្ជូនអាចបន្តដឹកជញ្ជូនការបញ្ជាទិញរហូតដល់ម៉ោង 3 រសៀល ថ្ងៃទី 4 ខែមីនា។
ថ្លៃសេវានឹងដំណើរការធម្មតានៅថ្ងៃនោះ ខណៈថ្លៃឈ្នួល ឬប្រាក់លើកទឹកចិត្តដែលនៅសល់ នឹងត្រូវបង់នៅថ្ងៃទី 10 ខែមីនា។
ការចាកចេញនេះ កើតឡើងក្នុងពេលដែលក្រុមហ៊ុនមេ DoorDash កំពុងដកខ្លួនចេញពីប្រទេសមួយចំនួននៅអាស៊ី ដែលខ្លួនដំណើរការតាមម៉ាក Deliveroo និង Wolt។ ទីផ្សារផ្សេងទៀតរួមមាន កាតា ជប៉ុន និងអ៊ូសបេគីស្ថាន តាមការរាយការណ៍របស់ Bloomberg។
បន្ទាប់ពីរយៈពេលច្រើនឆ្នាំនៃការលូតលាស់យ៉ាងឆាប់រហ័ស សេវាដឹកជញ្ជូនអាហារពិភពលោកកំពុងពិចារណាឡើងវិញអំពីការពង្រីកអន្តរជាតិ ដោយសារចំណាយកើនឡើង និងការប្រកួតប្រជែងក្នុងតំបន់ ធ្វើឲ្យពិបាកសម្រេចបានទំហំអាជីវកម្មគ្រប់គ្រាន់សម្រាប់ចំណេញប្រកបដោយចីរភាព។
នៅសិង្ហបុរី ទីផ្សារនេះត្រូវបានគ្រប់គ្រងភាគច្រើនដោយក្រុមហ៊ុនធំៗដូចជា Grab និង Foodpanda ។
ប្រតិកម្មលើអ៊ីនធឺណិតចំពោះការចាកចេញរបស់ Deliveroo ភាគច្រើនបង្ហាញពីការសោកស្តាយ។ អ្នកប្រើប្រាស់ជាច្រើនបាននិយាយថា វេទិកានេះផ្តល់សេវាល្អជាងគូប្រកួតនៅសិង្ហបុរី។
អ្នកប្រើម្នាក់បាននិយាយថា៖
«ខ្ញុំប្រើប្រាស់តែ Deliveroo អស់រយៈពេលជាច្រើនឆ្នាំ។ សោកស្តាយណាស់ដែលពួកគេចាកចេញ។ សេវាអតិថិជនរបស់ពួកគេល្អបំផុតក្នុងចំណោមវេទិកាដឹកជញ្ជូនអាហារទាំងអស់»៕
