ក្រុមកាំភ្លើងធំ Arsenal FC ទទួលបាន 3 ពិន្ទុសំខាន់ម្តងទៀត ក្នុងការប្រជែងពាន Premier League បន្ទាប់ពីឈ្នះ Brighton & Hove Albion FC 1-0 កាលពីថ្ងៃពុធ។
គ្រាប់បាល់តែមួយគត់ក្នុងការប្រកួតនេះ រកបានដោយ Bukayo Saka ដែលក៏ជាការបង្ហាញខ្លួនលើកទី 300 របស់គាត់សម្រាប់ក្លឹបផងដែរ។ ជ័យជម្នះនេះធ្វើឲ្យ Arsenal ឡើងនាំមុខគូប្រជែង 7 ពិន្ទុ។
បន្ទាប់ពីអ្នកអាជ្ញាកណ្តាលផ្លុំកញ្ចែបញ្ចប់ការប្រកួតក្រោយម៉ោងបន្ថែម 7 នាទី អ្នកគាំទ្រ Arsenal បានអបអរសាទរយ៉ាងខ្លាំង ហើយពួកគេចូលរួមរីករាយទ្វេដង ពេលទទួលដំណឹងថា Manchester City FC ស្មើជាមួយ Nottingham Forest FC។
ទោះបី Arsenal មិនបង្ហាញទម្រង់លេងលេចធ្លោ (ស៊ុតចូលគោលដៅបានតែ 2 ដង) ក៏ដោយ ប៉ុន្តែការការពាររបស់ពួកគេល្អឥតខ្ចោះ និងអាចទប់ស្កាត់ការវាយប្រហាររបស់ Brighton បាន។ ប្រសិនបើក្លឹបទីក្រុងឡុងដ៍អាចឈ្នះពានបាន វានឹងក្លាយជាពានលើកដំបូងចាប់តាំងពីឆ្នាំ 2004។
Saka បាននិយាយថា៖
“វាជាជ័យជម្នះដ៏ធំសម្រាប់ពួកយើង។ យើងបានឮអ្នកគាំទ្រអបអរសាទរ (លទ្ធផល Man City) ដូច្នេះខ្ញុំដឹងថា វាល្អសម្រាប់យើង។ ប៉ុន្តែយើងផ្តោតលើខ្លួនឯង។ យើងត្រូវការឈ្នះ ហើយយើងបានធ្វើបាន ខណៈពួកគេមិនអាចឈ្នះបាន ដូច្នេះថ្ងៃនេះយើងរីករាយណាស់”។
បច្ចុប្បន្ន Arsenal មាន 67 ពិន្ទុពី 30 ប្រកួត ខណៈ Man City មាន 60 ពិន្ទុពី 29 ប្រកួត។ Brighton ស្ថិតនៅលេខ 12 ក្នុងតារាង៕
