ទីភ្នាក់ងារសារព័ត៌មាន ISNA របស់អុីរ៉ង់បានដកស្រង់សម្តីមន្ត្រីយោធាម្នាក់ដែលបាននិយាយថា អុីរ៉ង់នឹងវាយប្រហាររោងចក្រនុយក្លេអ៊ែរ Dimona របស់អុីស្រាអែល ប្រសិនបើអុីស្រាអែលនិងសហរដ្ឋអាមេរិកព្យាយាមផ្លាស់ប្តូររបបអុីរ៉ង់។
ប្រព័ន្ធផ្សព្វផ្សាយអុីរ៉ង់ ដោយដកស្រង់សម្តីមន្ត្រីបានអះអាងថា ទីក្រុងតេអេរ៉ង់មិនបានផ្ញើសារណាមួយទៅកាន់សហរដ្ឋអាមេរិកទេ ផ្ទុយពីព័ត៌មានដែលបានបញ្ជាក់នៅក្នុងអត្ថបទ Axios។
មន្ត្រីដែលមិនបញ្ចេញឈ្មោះបានប្រាប់ Tasnim ថា “មិនមានសារណាមួយត្រូវបានផ្ញើពីអុីរ៉ង់ទៅកាន់សហរដ្ឋអាមេរិកទេ ហើយក៏នឹងមិនមានការឆ្លើយតបណាមួយចំពោះសារពីសហរដ្ឋអាមេរិកដែរ។ កងកម្លាំងប្រដាប់អាវុធអុីរ៉ង់បានត្រៀមខ្លួនសម្រាប់សង្គ្រាមដ៏វែងឆ្ងាយ”។
នៅថ្ងៃទី 4 ខែមីនា Axios បានដកស្រង់សម្តីមន្ត្រីអាមេរិក និងប្រភពព័ត៌មានម្នាក់ដែលបាននិយាយថា អុីរ៉ង់បានផ្ញើសារទៅកាន់សហរដ្ឋអាមេរិកក្នុងរយៈពេលប៉ុន្មានថ្ងៃកន្លងមកនេះ ប៉ុន្តែសហរដ្ឋអាមេរិកមិនបានឆ្លើយតបទេ។ ជម្លោះរវាងសហរដ្ឋអាមេរិកនិងអុីស្រាអែល នឹងអុីរ៉ង់នៅតែមិនបង្ហាញសញ្ញានៃការបញ្ចប់ឡើយ។
អុីស្រាអែលបាននិយាយថា យន្តហោះចម្បាំងរបស់ខ្លួនចំនួន 100 គ្រឿងបានវាយប្រហារមជ្ឈមណ្ឌលបញ្ជាការអុីរ៉ង់នៅបរិវេណយោធាមួយនៅភាគខាងកើតទីក្រុងតេអេរ៉ង់ ដែលជាទីតាំងរបស់កងឆ្មាំបដិវត្តន៍អ៊ិស្លាម កងកម្លាំង Quds ជាន់ខ្ពស់ ទីភ្នាក់ងារចារកម្ម កងកម្លាំងយោធាប៉ារ៉ា Basij អង្គភាពសន្តិសុខតាមអុីនធឺណិតរបស់អុីរ៉ង់ និង “អង្គភាពមួយរបស់ក្រសួងសន្តិសុខផ្ទៃក្នុងដែលទទួលខុសត្រូវក្នុងការបង្ក្រាបការតវ៉ា”។
យោងតាមមន្ត្រីយោធាអុីស្រាអែលម្នាក់ដែលមិនបញ្ចេញឈ្មោះ គ្រាប់បែកជាង 250 គ្រាប់ត្រូវបានទម្លាក់ដោយយន្តហោះចម្បាំងជាង 100 គ្រឿងនៅក្នុងការវាយប្រហារ “ទ្រង់ទ្រាយធំ”។
នៅក្នុងសន្និសីទសារព័ត៌មានរបស់មន្ទីរបញ្ចកោណនៅថ្ងៃទី 4 ខែមីនា ប្រធានអគ្គសេនាធិការចម្រុះ ឧត្តមសេនីយ៍ Dan Caine បាននិយាយថា ចំនួនមីស៊ីលផ្លោងដែលបាញ់ដោយអុីរ៉ង់បានថយចុះ 86% ចាប់តាំងពីថ្ងៃដំបូងនៃ
ជម្លោះ និងថយចុះ 23% ក្នុងរយៈពេល 24 ម៉ោងកន្លងមក។
បញ្ជាការកងទ័ពអុីស្រាអែលបានប្រកាសថា ចាប់ពីម៉ោង 12 ថ្ងៃត្រង់ថ្ងៃទី 5 ខែមីនា ការិយាល័យរដ្ឋាភិបាលអាចបើកឡើងវិញ ហើយការជួបជុំមនុស្សរហូតដល់ 50 នាក់នឹងត្រូវបានអនុញ្ញាត ប្រសិនបើមានជម្រកនៅក្បែរនោះ ប៉ុន្តែសាលារៀននឹងនៅតែបិទ។
ការបិទខ្ទប់ទូទាំងប្រទេស ដែលបានដាក់ចេញនៅថ្ងៃទី 28 ខែកុម្ភៈ នឹងត្រូវបានបន្ធូរបន្ថយ ខណៈដែលយោធាអុីស្រាអែលរាយការណ៍ពីការថយចុះនៃចំនួនរ៉ុក្កែតដែលបានបាញ់ចូលទៅក្នុងប្រទេសក្នុងរយៈពេលប៉ុន្មានថ្ងៃថ្មីៗនេះ៕ ដោយធីរីណា
រូបថត: tienphong
