រដ្ឋមន្ត្រីក្រសួងកីឡា និងយុវជនរបស់ប្រទេសអ៊ីរ៉ង់ លោក Ahmad Donyamali បាននិយាយថា ប្រទេសខ្លួនមិនមានជំហរដើម្បីចូលរួមក្នុងការប្រកួតបាល់ទាត់ពិភពលោកឆ្នាំ 2026 នោះទេ។

 

ក្រុមជម្រើសជាតិបាល់ទាត់អ៊ីរ៉ង់គ្រោងនឹងប្រកួតក្នុងពូលចំនួនបីក្នុងការប្រកួតដែលត្រូវធ្វើឡើងនៅសហរដ្ឋអាមេរិក កាណាដា និងម៉ិកស៊ិក ហើយនឹងចាប់ផ្ដើមនៅថ្ងៃទី ១១ ខែមិថុនា។

 

អ៊ីរ៉ង់នឹងត្រូវជួបជាមួយនូវែលសេឡង់ និងបែលហ្ស៊ិកនៅទីក្រុង Los Angeles នៅថ្ងៃទី 15 និងទី 21 ខែមិថុនារៀងៗខ្លួន និងអេហ្ស៊ីបនៅទីក្រុង Seattle នៅថ្ងៃទី 26 ខែមិថុនា។

 

ប៉ុន្តែការចូលរួមរបស់ពួកគេស្ថិតក្នុងភាពស្រពេចស្រពិលចាប់តាំងពីសហរដ្ឋអាមេរិក និងអ៊ីស្រាអែលបានបើកការវាយប្រហារមកលើប្រទេស ដោយបានសម្លាប់មេដឹកនាំកំពូល Ayatollah Ali Khamenei។ អ៊ីរ៉ង់បានឆ្លើយតបដោយការបាញ់មីស៊ីល និងយន្តហោះគ្មានមនុស្សបើកឆ្ពោះទៅកាន់ប្រទេសអ៊ីស្រាអែល និងប្រទេសដទៃទៀតដែលទទួលបានមូលដ្ឋានទ័ពអាមេរិក។

 

កាលពីព្រឹកថ្ងៃពុធ ប្រធាន FIFA លោក Gianni Infantino បាននិយាយថា ប្រធានាធិបតីសហរដ្ឋអាមេរិក លោក Donald Trump បានប្រាប់លោកថា ប្រទេសអ៊ីរ៉ង់ ត្រូវបានស្វាគមន៍ក្នុងការប្រកួតប្រជែង។

 

ប៉ុន្តែនៅក្នុងបទសម្ភាសន៍ជាមួយបណ្តាញកីឡា IRIB កាលពីថ្ងៃអង្គារ លោក Donyamali បាននិយាយថា “ដោយសាររដ្ឋាភិបាលពុករលួយនេះបានធ្វើឃាតមេដឹកនាំរបស់យើង ស្ថិតក្រោមកាលៈទេសៈណាក៏ដោយ យើងមិនមានលក្ខខណ្ឌសមស្របដើម្បីចូលរួមក្នុងការប្រកួតបាល់ទាត់ពិភពលោកទេ។ កីឡាកររបស់យើងមិនមានសុវត្ថិភាពទេ ហើយលក្ខខណ្ឌសម្រាប់ការចូលរួមក៏មិនមានដែរ”។

 

លោកបានបន្ថែមថា “ក្នុងរយៈពេលប្រាំបីឬប្រាំបួនខែកន្លងមកនេះ សង្រ្គាមពីរបានកើតឡើងមកលើពួកយើង ហើយប្រជាជនរបស់យើងជាច្រើនពាន់នាក់ត្រូវបានសម្លាប់ និងធ្វើទុក្ករកម្ម។ ដូច្នេះហើយ យើងពិតជាមិនមានលទ្ធភាពសម្រាប់ការចូលរួមនោះទេ”៕