ប្រធានាធិបតីអាមេរិក លោក Donald Trump បានមសនប្រសាន៍ថា ក្រុមបាល់ទាត់បុរសរបស់អ៊ីរ៉ង់ត្រូវបាន “ស្វាគមន៍” នៅ World Cup 2026 ប៉ុន្តែវាមិនមែនជាពេលវេលា “សមរម្យ” សម្រាប់ពួកគេមកលេងនៅពេលនេះទេគឺដើម្បីការពារ អសយុជីវិត និងសុវត្ថិភាពរបស់ពួកគេ។

 

ការអត្ថាធិប្បាយរបស់លោក Trump ធ្វើឡើងបន្ទាប់ពីរដ្ឋមន្ត្រីក្រសួងកីឡា និងយុវជនរបស់អ៊ីរ៉ង់ លោក Ahmad Donyamali បាននិយាយថា ប្រទេសរបស់លោកមិនមានជំហរក្នុងការចូលរួមការប្រកួតបាល់ទាត់ពិភពលោក ដែលត្រូវនឹងប្រារព្ធឡើងនៅសហរដ្ឋអាមេរិក កាណាដា និងម៉ិកស៊ិក ចាប់ពីថ្ងៃទី 11 ខែមិថុនា។

 

អ៊ីរ៉ង់នឹងត្រូវជួបជាមួយនូវែលសេឡង់ និងបែលហ្ស៊ិកនៅទីក្រុង Los Angeles នៅថ្ងៃទី 15 និងទី 21 ខែមិថុនារៀងៗខ្លួន និងអេហ្ស៊ីបនៅទីក្រុង Seattle នៅថ្ងៃទី 26 ខែមិថុនា។

 

ប៉ុន្តែការចូលរួមរបស់ពួកគេស្ថិតក្នុងភាពស្រពេចស្រពិលចាប់តាំងពីសហរដ្ឋអាមេរិក និងអ៊ីស្រាអែលបានបើកការវាយប្រហារមកលើប្រទេស ដោយបានសម្លាប់មេដឹកនាំកំពូល Ayatollah Ali Khamenei។

 

អ៊ីរ៉ង់បានឆ្លើយតបដោយការបាញ់កាំជ្រួច និងយន្តហោះគ្មានមនុស្សបើក ឆ្ពោះទៅកាន់ប្រទេសអ៊ីស្រាអែល និងប្រទេសឈូងសមុទ្រអារ៉ាប់ចំនួនបួន ដែលធ្វើជាម្ចាស់ផ្ទះមូលដ្ឋានទ័ពរបស់សហរដ្ឋអាមេរិក រួមមាន បារ៉ែន គុយវ៉ែត កាតា និងអេមីរ៉ាតអារ៉ាប់រួម។

 

លោក Trump បានបង្ហោះនៅលើ Truth Social កាលពីថ្ងៃព្រហស្បតិ៍ថា “ក្រុមបាល់ទាត់ជម្រើសជាតិអ៊ីរ៉ង់ត្រូវបានស្វាគមន៍ចំពោះការប្រកួតបាល់ទាត់ពិភពលោក ប៉ុន្តែខ្ញុំពិតជាមិនជឿថាវាជាពេលសមរម្យទេដែលពួកគេនៅទីនោះ ដើម្បីជីវិត និងសុវត្ថិភាពរបស់ពួកគេ” ។

 

កាលពីដើមសប្តាហ៍នេះ ប្រធាន FIFA លោក Gianni Infantino បាននិយាយថា លោក Trump បានប្រាប់គាត់ថា ប្រទេសអ៊ីរ៉ង់ “ស្វាគមន៍ក្នុងការប្រកួត” នៅវគ្គ៤៨ក្រុមជម្រុះតាមពូលរដូវក្តៅនេះ។

 

ប៉ុន្តែនៅក្នុងបទសម្ភាសន៍ជាមួយបណ្តាញកីឡា IRIB កាលពីថ្ងៃអង្គារ លោក Donyamali បាននិយាយថា “ដោយសាររដ្ឋាភិបាលពុករលួយនេះបានធ្វើឃាតមេដឹកនាំរបស់យើង ទោះបីជាស្ថិតក្រោមកាលៈទេសៈណាក៏ដោយ យើងមិនមានលក្ខខណ្ឌសមស្របដើម្បីចូលរួមក្នុងការប្រកួតបាល់ទាត់ពិភពលោក។ កីឡាកររបស់យើងមិនមានសុវត្ថិភាពទេ ហើយលក្ខខណ្ឌសម្រាប់ការចូលរួមក៏មិនមានដែរ”។

 

ប្រសិនបើអ៊ីរ៉ង់ដកខ្លួនចេញពីការប្រកួត World Cup លើកទីបួនជាប់ៗគ្នានោះ បទប្បញ្ញត្តិរបស់ FIFA ផ្តល់ការសម្រេចចិត្តដល់ស្ថាប័នគ្រប់គ្រងក្នុងការជ្រើសរើសអ្នកជំនួស ប៉ុន្តែវាមិនច្បាស់ថាអ្នកណានឹងក្លាយជានរណានោះទេ៕