ភ្នំពេញ៖ មានអគ្គិភ័យឆាបឆេះផ្ទះប្រជាពលរដ្ឋជាន់ទី៣មួយកន្លែងទាំងកណ្តាលថ្ងៃក្តៅ ផ្អើលអ្នកជិតខាងរស់នៅក្បែរនោះ រត់ចេញជាន់ជើងគ្នា។

អគ្គិភ័យឆាបឆេះផ្ទះខូចខាតទ្រព្យសម្បត្តិមួយចំនួនកើតឡើងនៅវេលាម៉ោង១១ និង៣០នាទីព្រឹកថ្ងៃទី១៧ ខែកញ្ញា ឆ្នាំ២០១៦ ស្ថិតនៅចំណុចផ្ទះលេខ៤៦E៣  តាមបណ្ដោយផ្លូវលេខ៣៣៨ សង្កាត់ទួលស្វាយព្រៃ១ ខណ្ឌចំការមន រាជធានីភ្នំពេញ។

យោងតាមប្រភពព័ត៌មានពីប្រជាពលរដ្ឋដែលនៅក្បែរកន្លែងកើតហេតុបានប្រាប់ឲ្យដឹងថា មុនពេលមានអគ្គិភ័យឆាបឆេះ គឺដំបូងឡើយ គេសង្គេតឃើញមានផ្សែខ្មួរខ្មាញ់ហុយចេញពីផ្ទះល្វែងលេខ៤៦E៣ ជាន់ទី៣ ដែលសង់ឡើងពីថ្មប្រក់សង្ក័សី បន្ទាប់ពីមានផ្សែងហុយចេញមកហើយនេាះ លុះមួយសន្ទុះក្រោយមកស្រាប់តែមានជាអណ្តាតភ្លើងឆាបឆេះឡើង ហើយបន្តឆេះរាលដាលខូចខាត់អស់ទាំងស្រុងតែម្ដង។ ភ្លាមៗនោះផងដែរ ប្រជាពលរដ្ឋបានរាយការណ៍ជូនសមត្ថកិច្ចមូលដ្ឋាន និងរថយន្តពន្លត់អគ្គិភ័យ នៃស្នងការដ្ឋាននគរបាលរាជធានីភ្នំពេញ បានចុះមកជួយអន្តរាគមន៍ជាច្រើនគ្រឿងបាញ់ទឹកពន្លត់ភ្លើង ទប់ស្កាត់កំុមានការឆាបឆេះរាលដាល ដល់លំនៅដ្ឋានប្រជាពលរដ្ឋដទៃទៀត ។ ប៉ុន្តែទេាះជាយ៉ាងណាមិញ ដោយការឆេះនេះឆេះនៅជាន់ទី៣ដូច្នេះ មានការពិបាកបន្តិច ដល់កម្លាំងនគរបាលពន្លត់អគ្គិភ័យ ទើបអគ្គិភ័យឆាបឆេះរងការខូចខាតទ្រព្យមួយចំនួន។

សូមបញ្ជាក់ផងដែរថា មូលហេតុដែលមានអគ្គិភ័យនេះកើតឡើងគឺដោយសារម្ចាស់ផ្ទះអ៊ុចធុកទុកកុងម៉ា ហើយរហូតមកដល់ថ្ងៃដដែលវេលាម៉ោង១១ និង៤៥នាទីទើបអគ្គិភ័យបានរលត់ទៅវិញទាំងស្រុង៕

ដោយ៖ ស រស្មី