ខេត្តកំពង់ស្ពឺ÷រសៀលថ្ងៃទី០២ខែមេសា ឆ្នាំ២០២៦នេះ មន្ត្រីនគរបាលនៅស្នងការដ្ឋាននគរបាលខេត្តកំពង់ស្ពឺបឲ្យដឹងថា ដោយបានការបញ្ជាដឹកនាំពីឧត្ដមសេនីយ៍ទោ ឃឹម សុកខៃ ស្នងការនគរបាលខេត្ដកំពង់ស្ពឺ លោក ព្រាប កុយវឌ្ឍន: អភិបាលនិងជាប្រធានគណ:បញ្ជាការឯកភាពរដ្ឋបាលក្រុងឧដុង្គម៉ែជ័យ  និងការណែនាំពីលោកឧត្ដមសេនីយ៍ត្រី សម សាក់ ស្នងការរងផែនការងារនគរបាលព្រហ្មទណ្ឌបានចេញប្រតិបត្តិការបង្ក្រាបក្មេងទំនើងមួយក្រុម។។

មន្ត្រីនគរបាលក្រុងឧដុងម៉ែជ័យឱ្យដឹងថា នៅថ្ងៃទី៣១ ខែមីនា ឆ្នាំ២០២៦ វេលាម៉ោង១៥និង៥០នាទី កម្លាំងជំនាញនគរបាលយុត្តិធម៌នៃអធិការដ្ឋាននគរបាលក្រុងឧដុង្គម៉ែជ័យ សហការជាមួយកម្លាំងនគរបាលស្រុកពញាឮ បានស្រាវជ្រាវនិងឈានដល់ធ្វើការឃាត់ខ្លួនជនសង្ស័យចំនួន០៦នាក់:

១.ឈ្មោះ គង់ ចាន់កក្កដា (ហៅក្តា,ដា) ភេទប្រុស អាយុ ១៨ឆ្នាំ(អ្នកកាប់),២.ហេង ប៊ុននឿន (កង្កែប) ភេទប្រុស អាយុ២១ឆ្នាំ(ចូលរួម),៣.ឈ្មោះហេង ប៊ុននី (ហៅនី) ភេទ ប្រុស អាយុ១៨ឆ្នាំ (ចូលរួម) ទាំងបីនាក់រស់នៅភូមិផ្សារដែកក្រោម ឃុំផ្សារដែក ស្រុកពញាឮ ខេត្តកណ្តាល, ៤.ឈ្មោះ ម៉ៅ សុខម៉េង (ហៅម៉េង) ភេទប្រុស អាយុ១៧ ឆ្នាំ (ចូលរួម) រស់នៅភូមិទួលអំពិល ឃុំពញាឮ ស្រុកពញាឮ ខេត្តកណ្តាល,៥. ឈ្មោះ ពីន បញ្ញា (ហៅញ៉ា) (អ្នកកាប់) រស់នៅភូមិធម្មត្រ័យ ឃុំផ្សារដែក ស្រុកពញាឮ ខេត្តកណ្តាល និង៦.ឈ្មោះ យន រ៉ាវីត (ហៅផុយ) ភេទប្រុស អាយុ១៥ឆ្នាំ (អ្នកកាប់) រស់នៅភូមិអំពិលដើមទឹក ឃុំវិហារលួង ស្រុកពញាឮ ខេត្តកណ្តាល។ 

ពួកគេទាំង៦នាក់ត្រូវបានយកមកសួរនៅអធិការដ្ឋាននគរបាលក្រុងឧដុង្គម៉ែជ័យដើម្បីធ្វើការសួរនាំ។

ក្រោយពីសួរនាំរួចជនសង្ស័យខាងលើបានសារភាពថាខ្លួនទាំង៦នាក់និងបក្ខពួកផ្សេងទៀតពិតជាបានជិះម៉ូតូទៅធ្វើសកម្មភាពនិងចូលរួមធ្វើសកម្មភាពកាប់ម៉ូតូរបស់ជនរងគ្រោះពិតប្រាកដមែន។

    

+ដកហូតវត្ថុតាងរួមមាន:

-កាំបិទផ្គាក់គ្មានដងមួយដើម 

បច្ចុប្បន្ន ពួកគេកំពុងកសាងសំណុំរឿងនិងបញ្ជូនជន សង្ស័យទាំង៦នាក់ខាងលើទៅស្នងការដ្ឋាននគរបាលខេត្តកំពង់ស្ពឺដើម្បីចាត់ការតាមនីតិវិធី៕