ភ្នំពេញ៖ ជនសង្ស័យជាមុខសញ្ញាគាស់ផ្ទះចូលលួចយកទ្រព្យសម្បត្តិគេមា្នក់ បានត្រូវប្រជាពលរដ្ឋព័ទ្ធចាប់វាយទ្រោមខ្លួន រួចប្រគល់ឱ្យនគរបាលមូលដ្ឋាន កាលពីវេលាម៉ោង៨និង១០នាទីព្រឹកថ្ងៃទី៦ខែសីហា២០១៥ នៅចំណុចផ្ទះលេខ៨៧S ផ្លូវម៉ាស៊ីនទឹក ស្ថិតក្នុងភូមិទី៣ សង្កាត់ជ្រោយចង្វារ ខណ្ឌជ្រោយចង្វា ។
ជនសង្ស័យដែលត្រូវសម្ថកិច្ចឃាត់ខ្លួននោះ ឈ្មោះហាង ថាវី ភេទប្រុស អាយុ១៩ឆ្នាំ មានមុខរបរនិងកន្លែងស្នាក់នៅមិនពិតប្រាកដ។ ចំណែកម្ចាស់ផ្ទះឈ្មោះឡេងភេទប្រុស អាយុជាង60ឆ្នាំ បច្ចុប្បន្នទៅរស់នៅឯប្រទេសបារាំង ។
តាមសម្ដីឈ្មោះមុច សុធឿន ភេទប្រុស អាយុ៤៨ឆ្នាំ ជាអ្នកយាមផ្ទះខាងលើ មានស្រុកកំណើតភូមិត្រពាំងឈូក ឃុំបឹងស្រុកបារាយណ៍ ខេត្តកំពង់ធំ បានរៀបរាប់ឲ្យដឹងថារាល់ថ្ងៃគាត់នៅយាមផ្ទះឲ្យម្ចាស់ផ្ទះឈ្មោះ ឡេង ដែលទៅរស់នៅប្រទេសបារាំង។ ផ្ទះនោះមានមុខក្រោយ ហើយរាល់ថ្ងៃគាត់នៅមើលការខុសត្រូវបណ្តើរជួសជុលបណ្តើរ។ គាត់ថា នៅយប់ថ្ងៃមុនកើតហេតុ ស្រាប់តែបាត់ទូរស័ព្ទណូគាចុចពិល២គ្រឿង លុយ៤០ដុល្លារ ចង្ក្រានហ្គាស១ ខ្សែភ្លើង៣ដុំ ដែលដាក់នៅក្នុងផ្ទះ ដែលកំពុងតែជួសជុលនៅក្នុងដីឡូត៍មានរបងបិទជិត។
លុះដល់ព្រឹកឡើងស្រាប់តែគាត់ឮប្រជាពលរដ្ឋស្រែកថា ចោរៗរួចហើយ ត្រូវតែជនសង្ស័យបានរត់ចូលទៅពួននៅក្នុងដីឡូត៍ដែលគាត់កំពុងនៅនោះ ទើបគាត់ចាប់ទុក ហើយត្រូវប្រជាពលរដ្ឋ នាំគ្នាព្រួតវាយម្នាក់១ដៃ១ជើង រហូតបែកក្បាលហូរឈាមហើយទើបប្រគល់ឲ្យនគរបាលប៉ុស្តិ៍ជ្រោយចង្វារយកទៅសាកសួរ ។
ប្រជាពលរដ្ឋដែលរស់នៅក្នុងមូលដ្ឋាននេះ បានរអ៊ូរទាំថា រាល់ថ្ងៃក្នុងភូមិតែងមានចោរគាត់ផ្ទះទាំងយប់ទាំងថ្ងៃ ធ្វើឲ្យពួកគាត់រស់នៅមិនដែលសុខនោះទេ។ រហូតទើបតែមកដល់ថ្ងៃកើតហេតុ ទើបពួកគាត់បានប្រទះឃើញជនសង្ស័យខាងលើ នេះមិនដឹងថាជាចោរតែម្នាក់នោះ ឬគ្រាន់តែជាបក្ខពួករបស់វានោះ។ ពួកគាត់សង្ឃឹមថា ក្រោយពីបានរកឃើញតម្រុយហើយ នគរបាលមូលដ្ឋាននិងស៊ើបសួររកឲ្យឃើញបក្ខពួករបស់វាឲ្យអស់ ដើម្បីធានាសុវត្ថិភាពភូមិ-ឃុំឲ្យពលរដ្ឋ ។
បច្ចុប្បន្នជនសង្ស័យត្រូវសមត្ថកិច្ចសាកសួរនៅប៉ុស្តិ៍នគរបាលជ្រោយចង្វារដើម្បីកសាងសំណុំរឿងបញ្ជូនទៅអធិការដ្ឋានខណ្ឌជ្រោយចង្វា ៕
ដោយ៖ វិបុល
