នៅពេលដែលទើបតែមានអាយុ២១ឆ្នាំនាង Niloofar Rahmani បានក្លាយជាស្ត្រីអាកាសយានិកដំបូងគេបង្អស់នៅក្នុងជួរកងទ័ពអាកាសអាហ្វហ្គានីស្ថាន ។ នាងបានស្នងមរតករបស់ឪពុកដើម្បីក្លាយជាដំណាងនៃការតស៊ូសម្បីស្ត្រីក្នុងការចូលរួមកិច្ចការសំខាន់ៗនៅក្នុងសង្គម។ ទាំងនោះជាជំហានដ៏លេចថ្លោរបស់នាងហើយក្លាយជាអ្នកល្បីល្បាញក្នុងជួរកងទ័ពអាហ្វហ្គានីស្ថាន ។
នាងបានបញ្ចាក់ថា «នេះជាក្តីស្រមៃរបស់ខ្ញុំ ហើយខ្ញុំមិនដែលគិតថានឹងបោះបង់ការងារនេះចោលឡើយ»។នាងក៏ត្រូវបានតែងតាំងជាប្រធានក្រុមហោះហើររបស់កម្លាំងអាកាសអាហ្វហ្គានីស្ថានកាលពីចុងឆ្នាំ២០១៤ ។
នាង Rahmani ចាប់ផ្តើមល្បីល្បាញនៅឆ្នាំ២០១៣ ហើយនៅពេលនោះដែរនាងក៏ទទួលរងការគម្រាមកំហែងពីជនមិនស្គាល់មុខតាមទូរស័ព្ទថា«បើមិនចង់ស្លាប់ត្រូវតែបោះបង់ការងារនេះចោល»។ នៅក្នុងឆ្នាំនោះដែរក្រុមតាលីបង់ក៏បានផ្ញើលិខិតមួយឲ្យនាងដោយគម្រាមថា«នាងឯងមិនទាន់យល់ច្បាស់ពីការគម្រាម។ តាមច្បាប់អ៊ិស្លាម ស្ត្រីមិនអាចធ្វើការឲ្យជនជាតិអង់គ្លេសឬអាមេរិកនោះឡើយ បើនាងនៅតែបន្តការងារនោះនាងនឹងគ្រួសារត្រូវស្លាប់ទាំងអស់» ។
ការគម្រាមកំហែងនោះធ្វើឲ្យគេនឹកឃើញដល់ករណីនាងMalala Yousafzai ជាស្ត្រីវ័យក្មេងបំផុតទទួលបានពានរង្វាន់ណូប៊ែលសន្តិភាពដោយសារតែនាងតស៊ូទាមទារសិទ្ធទៅកាន់សាលារៀនរបស់ស្ត្រី ។
ចំណែកគ្រួសាររបស់នាងបើមិនចង់ក៏បានគាំទ្រដល់ការសម្រេចរបស់នាង មិនត្រឹមតែប៉ុណ្ណោះគ្រួសាររបស់នាងបានផ្លាស់ប្តូរទីលំនៅអត់ឈប់ឈរពីមួយកន្លែងទៅមួយកន្លែងគេចពីការតាមសម្លាប់របស់ក្រុមតាលីបង់។ គ្រួសាររបស់នាងត្រូវប្រឈមនៅបញ្ហាជាច្រើន កម្លាំងទាហានអាកាសអាហ្វហ្គានីស្ថានបានស្នើរដល់នាងបោះបង់ការងារនេះតែនាងមិនព្រម ។
កាលពីខែមីនាឆ្នាំ២០១៥ ក្រសួងការបទេសអាមេរិកបានផ្តល់ពាន់រង្វាន់ International Women of Courage មានន័យថា«ស្ត្រីមានភាពក្លាហានបំផុតលើពិភពលោក» ៕
ប្រែសម្រួល៖ ម៉ែវ សាធី
