អ៊ីរ៉ង់បានព្រមានថាខ្លួននឹងសងសឹកប្រឆាំងនឹងអ៊ីស្រាអែល ប្រសិនបើទីក្រុង Tel Aviv មិនបញ្ឈប់ការវាយប្រហាររបស់ខ្លួនលើប្រទេសលីបង់ បន្ទាប់ពីមនុស្សបួននាក់នៅក្នុងប្រទេសនេះត្រូវបានសម្លាប់ដោយការបាញ់ប្រហាររបស់អ៊ីស្រាអែល។

បញ្ជាការកណ្តាល Khatam al-Anbiya ដែលជាស្ថាប័នត្រួតពិនិត្យប្រតិបត្តិការរបស់កងទ័ពអ៊ីរ៉ង់ និងកងឆ្មាំបដិវត្តន៍អ៊ីស្លាម (IRGC) បានប្រកាសនៅថ្ងៃទី 16 ខែមិថុនាថា ប្រសិនបើអ៊ីស្រាអែលមិនបញ្ចប់ «សកម្មភាពឈ្លានពាន» របស់ខ្លួននៅភាគខាងត្បូងប្រទេសលីបង់ទេ ទីក្រុង Tel Aviv នឹងប្រឈមមុខនឹង «ការឆ្លើយតបយ៉ាងធ្ងន់ធ្ងរ» ពីកងកម្លាំងប្រដាប់អាវុធអ៊ីរ៉ង់។ ទីភ្នាក់ងារនេះក៏បានចោទប្រកាន់អ៊ីស្រាអែលពីបទរំលោភលើបទឈប់បាញ់នៅលីបង់ចំនួន 84 ដងចាប់តាំងពីកិច្ចព្រមព្រៀងត្រូវបានប្រកាស។
ការព្រមាននេះបានកើតឡើងបន្ទាប់ពីទីភ្នាក់ងារសារព័ត៌មានរដ្ឋលីបង់ NNA បានរាយការណ៍ថា យន្តហោះគ្មានមនុស្សបើករបស់អ៊ីស្រាអែលបានវាយប្រហារយានយន្តពីរគ្រឿងនៅក្នុងទីក្រុង Mayfadoun និងទីក្រុង Shukeen ដែលនៅក្បែរនោះនៅថ្ងៃទី 16 ខែមិថុនា ដែលទាំងពីរស្ថិតនៅក្នុងតំបន់ Nabatieh ភាគខាងត្បូងប្រទេសលីបង់ ដោយបានសម្លាប់មនុស្សយ៉ាងហោចណាស់បួននាក់ និងធ្វើឱ្យអ្នកដទៃរងរបួស។ កងកម្លាំងការពារអ៊ីស្រាអែល (IDF) បានប្រកាសថាខ្លួនបានធ្វើការវាយប្រហារមួយនៅភាគខាងត្បូងប្រទេសលីបង់ បន្ទាប់ពី “រកឃើញយានយន្តគួរឱ្យសង្ស័យមួយ” នៅជិតកន្លែងដែលទាហានអ៊ីស្រាអែលកំពុងធ្វើប្រតិបត្តិការ ប៉ុន្តែមិនបានបញ្ជាក់ទីតាំងនោះទេ៕

រូប​ថត​:AFP