ក្រុមជម្រើសជាតិអាមេរិក បានបង្ហាញថាពួកគេនៅតែអាចទទួលបានជ័យជម្នះ ទោះបីគ្មានវត្តមានតារាឆ្នើម Christian Pulisic ក៏ដោយ ដោយយកឈ្នះក្រុមអូស្ត្រាលី ២-០ ក្នុងការប្រកួតពូល D នៃព្រឹត្តិការណ៍ 2026 FIFA World Cup នៅទីក្រុង Seattle កាលពីថ្ងៃសុក្រ ដើម្បីកក់កៅអីឡើងទៅកាន់វគ្គ ៣២ ក្រុមចុងក្រោយជាផ្លូវការ។

Pulisic បានអវត្តមានក្នុងការប្រកួតនេះ ដោយសាររបួសសាច់ដុំកំភួនជើង ដែលទទួលបានអំឡុងជ័យជម្នះលើក្រុមប៉ារ៉ាហ្គាយក្នុងការប្រកួតបើកឆាក។ ការខកខានរបស់គេបានធ្វើឱ្យអាមេរិកបាត់បង់កីឡាករប្រយុទ្ធដ៏មានឥទ្ធិពលបំផុតម្នាក់។

ទោះជាយ៉ាងណា ក្រុមម្ចាស់ផ្ទះរួមនៅតែអាចរកផ្លូវឈ្នះបាន ដោយគ្រាប់បាល់ទីមួយកើតឡើងនៅនាទីទី១១ បន្ទាប់ពីខ្សែការពារ Cameron Burgess ភ្លាត់ស្នៀតធ្វើឱ្យបាល់ចូលទីខ្លួនឯង។ ចំណែកគ្រាប់បាល់ទីពីរ រកបានដោយ Alex Freeman តាមរយៈការតែតបញ្ចូលទីមុនចប់តង់ទីមួយ បន្ទាប់ពី VAR បានលុបចោលការសម្រេចអូហ្វសាយដំបូង។

ក្រោយការប្រកួត គ្រូបង្វឹក Mauricio Pochettino បាននិយាយថា៖

«វាតែងតែពិបាកនៅពេលដែលយើងមិនអាចប្រើប្រាស់កីឡាករទាំងអស់បាន។ Christian គឺជាកីឡាករសំខាន់សម្រាប់យើង ប៉ុន្តែថ្ងៃនេះគេមិនអាចចូលលេងបានទេ។ យើងសង្ឃឹមថា គេនឹងត្រឡប់មកវិញសម្រាប់ការប្រកួតបន្ទាប់»។

ជ័យជម្នះនេះបានជួយឱ្យអាមេរិកមាន ៦ ពិន្ទុពេញពី ២ ប្រកួត និងធានាការឡើងទៅវគ្គចាញ់-ធ្លាក់ ខណៈនៅសល់មួយប្រកួតក្នុងវគ្គចែកពូល។

លោក Pochettino បានបញ្ជាក់ថា Pulisic នៅតែជាផ្នែកសំខាន់នៃផែនការក្រុម ប៉ុន្តែការប្រជែងពាន World Cup ទាមទារឱ្យកីឡាករគ្រប់រូបចូលរួមចំណែក។ «ប្រសិនបើយើងចង់ឈ្នះការប្រកួតនេះ យើងត្រូវការក្រុមទាំងមូល។ កីឡាករគ្រប់រូបត្រូវតែមានតួនាទីសំខាន់។ ពិតណាស់ Christian គឺជាកីឡាករល្អបំផុតម្នាក់នៅលើពិភពលោក ហើយខ្ញុំសង្ឃឹមថាគេនឹងជាសះស្បើយឆាប់ៗ ដើម្បីត្រឡប់មកជួយក្រុមវិញ»។

ខ្សែបម្រើ Weston McKennie ក៏បានសរសើរពីជម្រៅកម្លាំងក្រុមអាមេរិកផងដែរ។ «យើងអាចលេងបែបប្រើកម្លាំងរាងកាយបាន ព្រោះយើងមានកីឡាករដែលត្រៀមខ្លួនសម្រាប់រឿងនោះ។ ហើយយើងក៏មានកីឡាករដែលមានគុណភាពអាចគ្រប់គ្រងបាល់ និងលេងបែបគ្រប់គ្រងការប្រកួតបានផងដែរ»។

អាមេរិកនឹងបញ្ចប់ការប្រកួតក្នុងពូល D ដោយជួបក្រុមជម្រើសជាតិ ទួរគី នៅថ្ងៃព្រហស្បតិ៍ខាងមុខ នៅកីឡដ្ឋាន Los Angeles Stadium៕