ខេត្តបាតដំបង ៖ ក្រុមអ្នកលេងកាំបិត «គួនអ៊ី»០២នាក់ ក្នុងចំណោមបក្ខពួក០៥នាក់ ដែលទើបត្រូវសមត្ថកិច្ចតាមឃាត់ខ្លួនបាន ក្រោយពីធ្វើសកម្មភាពកាប់ប្រហារទៅលើក្រុមអ្នកលេង «ដុំថ្ម» ០២នាក់ បណ្ដាលឲ្យម្នាក់ស្លាប់ និងម្នាក់ទៀតរងរបួសធ្ងន់កាលពីជាង១សប្ដាហ៍មុននោះ ពេលនេះ ត្រូវបានកម្លាំងការិយាល័យជំនាញនៃស្នងការខេត្ត បញ្ជូនទៅកាន់សាលាដំបូងខេត្តហើយ នៅរសៀលថ្ងៃទី២៣ មិថុនា បន្ទាប់ពីបញ្ចប់ការសួរនាំ និងកសាងសំណុំរឿង ដែលជាប់សង្ស័យក្នុងអំពើ «ឃាតកម្ម» ។
ជនសង្ស័យ ឬហៅថា ក្រុមអ្នកលេងកាំបិត«គួនអ៊ី»ទាំង០២នាក់ ដែលត្រូវចាប់ខ្លួនបញ្ជូនទៅតុលាការនោះ ម្នាក់ឈ្មោះ ណេង នីកាន ភេទប្រុស អាយុ១៧ឆ្នាំ នៅភូមិដំរីក្រោម និងម្នាក់ទៀតឈ្មោះ មាន វាសនា ហៅអ៊ួក ភេទប្រុស អាយុ២១ឆ្នាំ នៅភូមិដំរីលើ ឃុំសឿ ស្រុកមង្គលបុរី ខេត្តបន្ទាយមានជ័យ ។
ដោយឡែក ជន រងគ្រោះ ២នាក់ ឬអាចហៅថា ក្រុមអ្នក លេង «ដុំថ្ម» ម្នាក់ឈ្មោះ សិដ្ឋ ស៊ីន ភេទប្រុស អាយុ១៧ឆ្នាំ (ស្លាប់) រស់នៅភូមិព្រៃទទឹង និងម្នាក់ទៀតឈ្មោះធឿន ប៊ុនហ៊ីន ភេទប្រុស អាយុ១៨ឆ្នាំ (របួសធ្ងន់) នៅភូមិបវេល២ ឃុំបួវិល ស្រុកបវេល ខេត្តបាត់ដំបង ។
បើយោងតាមរបាយការណ៍របស់ការិយាល័យជំនាញ អំពើហិង្សាដ៏ឃោរឃៅ ដែលបង្កឡើងដោយពួកក្មេងទំនើងទាំង០២ក្រុមនេះ បានកើតកាលពីយប់ថ្ងៃទី១០ មិថុនា នៅលើដងផ្លូវ១កន្លែង ក្នុងភូមិបវេល១ ឃុំបវេល ស្រុកបវេល ។ ប៉ុន្តែក្រោយប្រយុទ្ធគ្នាស្លាប់រស់ ក្រុមអ្នក លេងកាំបិត «គួនអ៊ី» ដែលច្បាំងឈ្នះបាននាំគ្នាជិះម៉ូតូគេចខ្លួនបាត់ បន្សល់ទុកក្រុមអ្នកចាញ់ (ក្រុមអ្នកលេងដុំថ្ម) ដែលមានម្នាក់ស្លាប់ និងម្នាក់របួសធ្ងន់ នៅក្នុងសមរភូមិប្រយុទ្ធ ។
របាយការណ៍ដដែលបានបញ្ជាក់ថា ក្រោយពេលកើតហេតុ លោកស្នងការខេត្ត ដែលមានការឯកភាពពីតំណាងអយ្យការអមសាលាដំបូងខេត្តផង បានចេញបញ្ជាឲ្យកម្លាំងការិយាល័យជំនាញ សហការជាមួយកម្លាំងអធិការស្រុកបវេល ចុះធ្វើការស្រាវជ្រាវរហូតដល់ថ្ងៃទី២០ មិថុនា ទើបសមត្ថកិច្ចកំណត់មុខសញ្ញាបាននិងឈានដល់ការឃាត់ខ្លួនក្រុមជនសង្ស័យបាន០២នាក់ ក្នុងចំណោមបក្ខពួកចំនួន០៥នាក់ ដល់ទឹកដីស្រុកមង្គលបុរី ខេត្តបន្ទាយមានជ័យ ដោយមានកិច្ចសហការពីកម្លាំងសមត្ថកិច្ចនៃខេត្តនេះផង ។
នៅក្នុងសំណុំរឿង «ឃាតកម្ម» ដែលបង្កឡើងដោយក្រុមក្មេងទំនើងនេះ បើតាមសាវតានៃរឿងដែលមន្ត្រីជំនាញបានសួរនាំយ៉ាងក្បោះក្បាយ ហើយសង្ខេបយកខ្លឹមសារយ៉ាងខ្លីគឺ ក្រុមអ្នកលេងកាំបិត«គួនអ៊ី» និងក្រុមអ្នកលេង«ដុំថ្ម»នេះ ច្បាំងគ្នាដោយសារការ«ភាន់ច្រឡំគូសត្រូវរៀងៗខ្លួន» ។ នេះបើតាមលោក ឈឿង គឹមសុង ស្នងការរងទទូលផែនព្រហ្មទណ្ឌ ដែលបានសង្ខេបសេចក្ដីនៃចម្លើយសារភាពរបស់ជនសង្ស័យ និងការបំភ្លឺពីជនរងគ្រោះដែលរងរបួស ។
លោក ឈឿង គឹមសុង បានពន្យល់បន្ថែមពីប្រវត្តិរឿងនេះថា នៅយប់កើតហេតុ ក្រុមជនសង្ស័យចំនួន០៥នាក់ (ក្រុមកាំបិតវែង) បានជិះម៉ូតូ០២គ្រឿងប្រដាប់ដោយកាំបិតផ្គាក់ផង កាំបិតគួនអ៊ីផង និងជំពាមកៅស៊ូផង បានជិះម៉ូតូតាមរកគូសត្រូវរបស់ខ្លួនមួយក្រុម ដែលមានជម្លោះជាមួយនារីម្នាក់ដែលពួកគេបានស្គាល់ ដើម្បីសងសឹក ។
ដោយឡែក ក្រុមជនរងគ្រោះមានគ្នា០២នាក់ ដែលយក«ដុំថ្ម»ជាអាវុធ ក៏កំពុងជិះម៉ូតូឌុបគ្នាតាមស្វែងរកគូសត្រូវ ដើម្បីសងសឹកដែរ ។ ពោល គឺពួកគេកំពុងជិះម៉ូតូតាមរកសត្រូវដើម្បីសងសឹកដូចគ្នា ។ ប៉ុន្តែនៅពេលកំពុងធ្វើដំណើរតាមផ្លូវស្វែងរកគូសត្រូវរៀងៗខ្លួន ក្នុងគោលដៅបញ្ច្រាសទិសគ្នាសោះ ហើយស្របពេលជួបគ្នាតាមផ្លូវដោយចៃដន្យបែបនេះ ភាគីជនរងគ្រោះស្មានថា ជាគូសត្រូវរបស់ខ្លួនក៏ជិះតាម ហើយយក«ដុំថ្ម»គប់ទៅលើក្រុមកាំបិតផ្គាក់ ។
រីឯក្រុមកាំបិតផ្គាក់ដែលមានគ្នាច្រើន ស្មានតែក្រុមជនរងគ្រោះដែលគប់ពួកខ្លួននោះ ជាគូសត្រូវរបស់ខ្លួន ដែលពួកខ្លួនកំពុងតាមរកដែរ ក៏នាំគ្នាលោតចុះពីម៉ូតូប្រើ ប្រាស់កាំបិតផ្គាក់ផង កាំបិតគួនអ៊ីផង ជំពាមកៅស៊ូផង ច្បាំងតតាំងយ៉ាងបង្ហូរឈាមជាមួយក្រុមអ្នកលេង «ដុំថ្ម» យ៉ាងកំរោល ដែលបណ្ដាលឲ្យភាគីអ្នកលេង«ដុំថ្ម»ម្នាក់ស្លាប់ និង ម្នាក់ទៀតរងរបួសធ្ងន់នៅក្នុងសមរភូមិ ។ នេះជាខ្លឹមសារសង្ខេប នៃសំណុំរឿង«អ្នកលេងកាំបិតប៉ះជាមួយក្រុមអ្នកលេងដុំថ្ម» ដោយសារការ«ភាន់ច្រឡំគូសត្រូវ» ។
នៅក្នុងចម្លើយសារភាពរបស់ជនសង្ស័យឈ្មោះ មាន វាសនា ហៅអ៊ួក នៅចំពោះមុខមន្ត្រីសួរចម្លើយថា ពួកខ្លួនពិតជាបានព្រូតគ្នាកាប់សម្លាប់ទៅលើក្រុមជនរងគ្រោះមែន ប៉ុន្តែដោយសារតែក្រុមជនរងគ្រោះគប់មកលើពួកខ្លួនមុន ។ ជននេះបានសារភាពទៀតថា ពួកខ្លួននាំគ្នាជិះម៉ូតូទៅលេងស្រុកបវេល ហើយពិតជាបានដាក់កាំបិតតាមខ្លួនមែន គឺដាក់ការពារខ្លួន ព្រោះធ្លាប់មានរឿងកន្លងមក ។
ពួកខ្លួនគ្មានចេតនាបង្កជម្លោះជាមួយជនរងគ្រោះទេ ប៉ុន្តែពេលជិះដល់ចំណុចកើតហេតុ ក៏ត្រូវក្រុមជនរងគ្រោះជិះម៉ូតូដេញគប់ពួកខ្លួន ទើបពួកខ្លួនជិះម៉ូតូដេញតាមទាន់ ទាញកាំបិតកាប់មនុស្សផង កាប់ចិញ្ច្រាំកម្ទេចម៉ូតូជនរងគ្រោះផង ។ ក្រោយកើតហេតុ ពួកខ្លួនក៏ជិះត្រឡប់ទៅផ្ទះញដើម្បីលាក់ខ្លួន តែប៉ុន្មានថ្ងៃក្រោយមក ក៏ត្រូវសមត្ថកិច្ចតាមចាប់ខ្លួនបានល្មម ។
លោក ឈឿង គឹមសុង បានបញ្ជាក់ដែរថា ក្រុមអ្នក លេងកាំបិត«គួនអ៊ី» ដែលឃាត់ខ្លួនបានចំនួន០២នាក់នេះ ត្រូវបានលោកស្នងការខេត្ត បញ្ជាឲ្យបញ្ជូនទៅកាន់សាលាដំបូងខេត្តរួចហើយ នៅឡើយបក្ខពួកចំនួន០៣នាក់ទៀតដែលកំពុងរត់គេចខ្លួន សមត្ថកិច្ចយើងកំពុងតាមស្វែងរកនៅឡើយ ៕
