ទីក្រុងហ៊ូស្តុន៖ ក្រុមជម្រើសជាតិ ហូឡង់ នឹងបញ្ចប់ការប្រកួតក្នុងពូល F នៃព្រឹត្តិការណ៍ FIFA World Cup 2026 ដោយត្រូវជួបក្រុម ទុយនីស៊ី នៅថ្ងៃទី 25 ខែមិថុនា ក្នុងទីក្រុង Kansas City ដោយមានគោលដៅរក្សាតំណែងកំពូលតារាងពូល និងគ្រប់គ្រងស្ថានភាពកីឡាករសំខាន់ៗដែលកំពុងមានបញ្ហារបួស។

ទុយនីស៊ីត្រូវបានធ្លាក់ចេញពីការប្រកួតរួចហើយ បន្ទាប់ពីបរាជ័យធ្ងន់ធ្ងរពីរប្រកួតជាប់គ្នា និងរបូតគ្រាប់បាល់សរុបដល់ទៅ 9 គ្រាប់។ ស្របពេលនោះ ក្រុមបានសម្រេចប្តូរគ្រូបង្វឹក ដោយតែងតាំង Herve Renard ឱ្យដឹកនាំក្រុមកណ្ដាលការប្រកួត World Cup។

ចំណែកហូឡង់ កំពុងមានទម្រង់លេងល្អ បន្ទាប់ពីយកឈ្នះ ស៊ុយអែត ក្នុងលទ្ធផល 5-1 កាលពីប្រកួតមុន។

បច្ចុប្បន្ន ហូឡង់ឈរកំពូលតារាងពូល F ដោយមាន 4 ពិន្ទុ ស្មើជាមួយ ជប៉ុន ប៉ុន្តែនាំមុខតាមចំនួនគ្រាប់បាល់ស៊ុតបាន ខណៈស៊ុយអែតមាន 3 ពិន្ទុ និងទុយនីស៊ីមិនទាន់រកបានពិន្ទុណាមួយនៅឡើយ។

កីឡាករហូឡង់មួយចំនួនមានបញ្ហារបួស

ក្រុមរហស្សនាម មជ្ចុរាជពណ៌ទឹកក្រូចត្រូវបានរំពឹងថានឹងទទួលបានការវិលត្រឡប់របស់ខ្សែបម្រើ Quinten Timber បន្ទាប់ពីខកខានប្រកួតទល់នឹងស៊ុយអែត ដោយសាររបួសប៉ះទង្គិចក្បាល។

ខណៈនោះ ខ្សែប្រយុទ្ធ Brian Brobbey ដែលស៊ុតបាន 2 គ្រាប់ក្នុងប្រកួតចុងក្រោយ កំពុងមានបញ្ហាសរសៃពួរខាងក្រោយភ្លៅតិចតួច។

រីឯកំពូលអ្នកស៊ុតបញ្ចូលទីប្រចាំក្រុមជម្រើសជាតិហូឡង់ Memphis Depay ដែលរកបាន 52 គ្រាប់ឱ្យជម្រើសជាតិ ក៏នៅមិនទាន់ស្តារកាយសម្បទាពេញលេញពីរបួសភ្លៅ ហើយទើបតែចូលលេងជាកីឡាករបម្រុងក្នុងពីរប្រកួតដំបូង។

ប្រសិនបើ Brobbey មិនអាចចូលលេងបាន ហើយ Depay មិនទាន់ត្រៀមខ្លួនជាស្រេច គ្រូបង្វឹក Ronald Koeman អាចនឹងដាក់ Donyell Malen ឱ្យលេងជាខ្សែប្រយុទ្ធកណ្ដាល និងប្រើ Crysencio Summerville នៅតំបន់ប្រយុទ្ធស្លាប។

លោក Koeman បាននិយាយថា៖

«យើងមានខ្សែប្រយុទ្ធច្រើនប្រភេទ ហើយអាចផ្លាស់ប្ដូរតួនាទីពួកគេបានតាមតម្រូវការ។ វាផ្តល់ជម្រើសជាច្រើនដល់យើង។» «គ្រាប់បាល់ដែលយើងរកបានក្នុងការប្រកួតជាមួយស៊ុយអែត នឹងធ្វើឱ្យគូប្រកួតមានការភ័យខ្លាច ព្រោះយើងមានល្បឿន និងគុណភាពខ្ពស់ក្នុងការវាយលុក។»

ទុយនីស៊ីនៅតែជួបបញ្ហាធ្ងន់ធ្ងរ

ទុយនីស៊ីបានរបូតគ្រាប់បាល់ដល់ទៅ 14 គ្រាប់ក្នុង 3 ប្រកួតចុងក្រោយ រួមមានការចាញ់ ប៊ែលហ្សិក 5-0 ក្នុងការប្រកួតមិត្តភាព ការចាញ់ស៊ុយអែត 5-1 និងចាញ់ជប៉ុន 4-0 នៅ World Cup។

ក្រោយចាញ់ស៊ុយអែត សហព័ន្ធបាល់ទាត់ទុយនីស៊ីបានបណ្តេញគ្រូបង្វឹក Sabri Lamouchi និងតែងតាំង Renard ជំនួសភ្លាមៗ។

ទោះជាយ៉ាងណា លោក Renard បានបង្ហើបថា ប្រកួតជាមួយហូឡង់អាចជាប្រកួតចុងក្រោយរបស់លោកក្នុងតំណែងនេះ។

លោកបានប្រាប់សារព័ត៌មានថា៖

«ខ្ញុំមកដើម្បីបំពេញបេសកកម្មពាក់ព័ន្ធនឹង World Cup ប៉ុណ្ណោះ។ ខ្ញុំមិនបានចុះកិច្ចសន្យាលើសពីនេះទេ។»

ទោះបីជាឱកាសឡើងទៅវគ្គបន្តត្រូវបានបាត់បង់រួចហើយក៏ដោយ ការបង្ហាញទម្រង់លេងល្អទល់នឹងហូឡង់ អាចជួយផ្លាស់ប្តូរទស្សនៈរបស់អ្នកពាក់ព័ន្ធទាំងអស់ និងបញ្ចប់យុទ្ធនាការ World Cup របស់ទុយនីស៊ីដោយកិត្តិយស៕