ខេត្តកំពង់ស្ពឺ÷ មនុស្សប្រុស-ស្រីចំនួន០៤នាក់ ត្រូវបានកម្លាំងសមត្ថកិច្ច ស្រុកភ្នំស្រួចធ្វើការឃាត់ខ្លួនបន្តបន្ទាប ខណៈដែលជនសង្ស័យខាងលើ បានធ្វើសកម្មភាពលេង ល្បែងស៊ីសងខុសច្បាប់ (កន្ទុយលេខ) ដោយទូទាត់តាម ម៉ាស៊ីនស្វ័យប្រវត្តិ QR code ហើយកម្លាំង សមត្ថកិច្ចស្រាវជ្រាវទើបឈានទៅដល់ការឃាត់ខ្លួនតែម្ដង។
ការបង្ក្រាបក្រុមអ្នកលេងល្បែងស៊ីសងខុសច្បាប់ (កន្ទុយ លេខ) ធ្វើឡើងកាលពីវេលាម៉ោង២រសៀល ថ្ងៃទី២២ ខែកក្កដា ឆ្នាំ២០២៦ នៅចំណុចក្នុងផ្សារត្រែងត្រយឹង ស្ថិតនៅក្នុងភូមិផ្សារត្រែងត្រយឹង ឃុំត្រែងត្រយឹង ស្រុកភ្នំស្រួច ខេត្តកំពង់ស្ពឺ។
សមត្ថកិច្ចស្រុកភ្នំស្រួចបានឲ្យដឹងថា នៅវេលាម៉ោង២រសៀលថ្ងៃទី២២ ខែកក្កដា ឆ្នាំ២០២៦ កម្លាំងប៉ុស្តិ៍នគរបាលរដ្ឋបាលឃុំត្រែងត្រយឹង បានធ្វើការចុះបង្ក្រាបករណីល្បែងស៊ីសង ខុសច្បាប់ (កន្ទុយលេខ) នៅចំណុចក្នុងផ្សារត្រែងត្រយឹង ឃុំត្រែងត្រយឹង ស្រុកភ្នំស្រួច ឃាត់មនុស្សចចំនួន០៣នាក់
ទី១- ឈ្មោះ ជា សុធី ភេទប្រុស អាយុ៤៨ឆ្នាំ រស់នៅក្នុងភូមិផ្សារត្រែងត្រយឹង ឃុំត្រែងត្រយឹង ស្រុកភ្នំស្រួច ខេត្តកំពង់ស្ពឺ,ទី២- ឈ្មោះ អេង គីមសេង ភេទស្រី អាយុ៤៦ឆ្នាំ ទាំងពីរនាក់រស់នៅក្នុងភូមិផ្សារត្រែងត្រយឹង ឃុំត្រែងត្រយឹង ស្រុកភ្នំស្រួចខេត្តកំពង់ស្ពឺនិងទី៣- ឈ្មោះ ខៀវ មករា ភេទប្រុស អាយុ៣៣ឆ្នាំ រស់នៅភូមិទី៣ ឃុំយាយម៉ៅពេជ្រនិល ស្រុកភ្នំស្រួច ខេត្តកំពង់ស្ពឺ។
ក្រោយបង្ក្រាប សមត្ថកិច្ចបានធ្វើការដកហូតសម្ភារៈវត្ថុតាង រួមមាន :
១- ទូរស័ព្ទដៃចំនួន០៤គ្រឿង
២- QR code សម្រាប់ទូទាត់ប្រាក់ចំនួន០៣គ្រឿង
៣- សៀវភៅកត់ចំនួន០៥ក្បាល
៤- ក្រដាសដាមខៀវចំនួន០៣សន្លឹក
៥- ប៊ិកចំនួន០៣ដើម ទឹកលុប១ដើម និងក្រដាសរ៉ាមស មួយចំនួនថែមទៀតផងដែរ ។
សមត្ថកិច្ចស្រុកភ្នំស្រួចបានបន្តឲ្យដឹងទៀតថា បើយោងតាមចម្លើយរបស់ ឈ្មោះ ខៀវ មករា ឆ្លើយថា ពេលមានអតិថិជនត្រូវឆ្នោត (កន្ទុយលេខ) គឺឈ្មោះ ប៉ែន ធារី ភេទប្រុស អាយុ៣៩ឆ្នាំ រស់នៅក្នុងភូមិរំដួល៨៨ ឃុំអូរ ស្រុកភ្នំស្រួច ខេត្តកំពង់ស្ពឺ ជាអ្នកទូទាត់ប្រាក់ដោយផ្ទាល់ ។
បន្ទាប់ពីទទួលបានចម្លើយសារភាពរបស់ជនសង្ស័យខាងលើ ដោយមានការអនុញ្ញាតពី លោក ឧត្តមសេនីយ៍ទោ ឃឹម សុកខៃ ស្នងការនគរបាលខេត្តកំពង់ស្ពឺ និងដឹកនាំបញ្ជាផ្ទាល់ពី លោកឧត្តមសេនីយ៍ត្រី សម សាក់ ស្នងការរងទទួលផែនព្រហ្មទណ្ឌ នៅវេលាម៉ោង៤:៤០នាទីរសៀល ថ្ងៃទី២២ ខែកក្កដា ឆ្នាំ២០២៦ សមត្ថកិច្ច ជំនាញ បានចុះទៅឃាត់ខ្លួន ឈ្មោះ ប៉ែន ធារី ភេទប្រុស អាយុ៣៩ឆ្នាំ នៅចំណុចភូមិរំដួល៨៨ ឃុំអូរ ស្រុកភ្នំស្រួច ។ ដោយធ្វើការ ដកហូត បានសៀវភៅកត់កន្ទុយលេខចំនួន ០១ក្បាល និងទូរស័ព្ទដៃចំនួន ០១គ្រឿង ។ សរុបប្រតិបត្តិការបង្ក្រាបករណីល្បែងស៊ីសងខុសច្បាប់ (កន្ទុយលេខ) គឺឃាត់ខ្លួនជនសង្ស័យសារុនចំនួន ០៤នាក់ ក្នុងនោះមាន (ស្រី០១នាក់)។
បច្ចុប្បន្ន មនុស្សប្រុស-ស្រីទាំង០៤នាក់ ខាងលើរួមជាមួយនឹងវត្ថុតាង ខាងលើ ត្រូវបានសមត្ថកិច្ចជំនាញបានកសាងសំណុំរឿងបញ្ជូនទៅការិយាល័យជំនាញនៃស្នងការដ្ឋាននគរបាលខេត្តកំពង់ស្ពឺ ដើម្បីចាត់ការបន្តតាមនីតិវិធីច្បាប់ ៕
