Mohamed Salah អតីតតារាឆ្នើមរបស់ Liverpool បានយល់ព្រមផ្ទេរទៅកាន់ក្លិប Trabzonspor របស់ប្រទេសទួរគី ដោយគ្មានតម្លៃផ្ទេរ (Free Transfer)។
Salah វ័យ 34 ឆ្នាំ បានចាកចេញពី Liverpool នៅចុងរដូវកាល 2025/26 ហើយត្រូវបានគេរាយការណ៍ថា បានព្រមព្រៀងចុះកិច្ចសន្យារយៈពេល 2 ឆ្នាំ ជាមួយក្លិបដែលលេងនៅលីគ Turkish Super Lig។
ក្លិប Trabzonspor បានបញ្ជាក់តាមបណ្តាញសង្គមថា ខ្លួនកំពុងចរចាផ្ទេរជាមួយ Salah ហើយក្រោយមកក៏បានប្រកាសថា Salah នឹងធ្វើដំណើរមកទីក្រុង Istanbul នៅថ្ងៃពុធ ដើម្បីបញ្ចប់ការផ្ទេរជាផ្លូវការ។
សេចក្តីថ្លែងការណ៍របស់ក្លិបបានឱ្យដឹងថា៖ “កីឡាករអាជីព Mohamed Salah ដែលយើងបានចាប់ផ្តើមការចរចាផ្ទេរជាមួយ នឹងមកដល់អាកាសយានដ្ឋាន Istanbul Atatürk នៅម៉ោង 12:00 ថ្ងៃពុធ ទី 5 ខែសីហា។ បន្ទាប់មក គាត់នឹងធ្វើដំណើរទៅកាន់ទីក្រុង Trabzon នៅល្ងាចថ្ងៃដដែល។ ព័ត៌មានលម្អិតអំពីកម្មវិធីស្វាគមន៍ នឹងត្រូវប្រកាសតាមបណ្តាញផ្លូវការរបស់ក្លិប។”
នៅក្នុងក្រុម Trabzonspor កីឡាករ Salah នឹងបានរួមក្រុមជាមួយអតីតមិត្តរួមលីគដូចជា៖
អតីតអ្នកចាំទី Manchester United គឺ Andre Onana
អតីតខ្សែការពារ Manchester City គឺ Stefan Savić
ខ្សែប្រយុទ្ធជម្រើសជាតិ Cape Verde គឺ Sidny Lopes Cabral។
Salah បានប្រកាសពីការចាកចេញពី Liverpool តាំងពីខែមីនា បន្ទាប់ពីចំណាយពេល 9 ឆ្នាំ ជាមួយក្លិប។
គាត់បានផ្ទេរពី Roma មក Liverpool ក្នុងឆ្នាំ 2017 ហើយបានក្លាយជាកីឡាករឆ្នើមម្នាក់ក្នុងប្រវត្តិសាស្ត្រក្លិប។
ក្នុងអំឡុងពេលលេងឱ្យ Liverpool Salah បាន៖
បង្ហាញខ្លួន 435 ប្រកួត
ស៊ុតបញ្ចូលទី 255 គ្រាប់
ឈ្នះពានរង្វាន់ធំៗរួមមាន៖
🏆 Premier League 2 លើក
🏆 UEFA Champions League 1 លើក
🏆 FIFA Club World Cup 1 លើក
🏆 FA Cup 1 លើក
🏆 EFL Cup 2 លើក
នៅព្រឹត្តិការណ៍ FIFA World Cup រដូវក្តៅនេះ Salah បានជួយក្រុមជម្រើសជាតិ អេហ្ស៊ីប ឡើងដល់វគ្គ 16 ក្រុមចុងក្រោយ ជាលើកដំបូងក្នុងប្រវត្តិសាស្ត្ររបស់ប្រទេស។
គាត់ស៊ុតបាន 1 គ្រាប់ និងបញ្ជូនបាល់ឱ្យមិត្តរួមក្រុមស៊ុតបាន 2 លើក ក្នុងការបង្ហាញខ្លួន 5 ប្រកួត។
ចំណែកឯក្លិប Trabzonspor បានបញ្ចប់រដូវកាលមុននៅចំណាត់ថ្នាក់លេខ 3 នៃលីគកំពូលទួរគី ដោយមាន 8 ពិន្ទុ តាមពីក្រោយក្រុមជើងឯក Galatasaray៕
