ទីក្រុងវៀងចន្ទន៍៖ យោងតាមសេចក្តីរាយការណ៍របស់ Amarin TV កាលពីថ្ងៃសុក្រ ទី១៤ ខែសីហា ឆ្នាំ២០២៦ បាននិយាយថា កម្លាំងសមត្ថកិច្ចរបស់ប្រទេសឡាវ បានបន្តចុះបង្ក្រាបទ្រង់ទ្រាយធំ លើបណ្តាញឆបោកតាមអនឡាញ នៅក្នុងទីក្រុងវៀងចន្ទន៍ ដោយបានចាប់បញ្ជូនខ្លួនជនជតិថៃ ជា Scammer ចំនួន ២៣នាក់ទៀតហើយ ឱ្យមកស្រុកកំណើតវិញ។
រាយការណ៍របស់ Amarin TV បាននិយាយបន្ថែមថា ក្នុងចំណោម Scammer ថៃទាំង ២៣នាក់នេះ គឺមានបុរស ៩នាក់ និងស្រ្តី ១៤នាក់ ត្រូវបានបញ្ជូនតាមស្ពានមិត្តភាពឡាវ-ថៃ ទី១ ស្ថិតនៅច្រកព្រំដែន Nong Khai។
មុននេះមួយថ្ងៃ ឡាវក៏បានចាប់បញ្ជូន Scammer ជនជាតិថៃ ចំនួន ១៣០នាក់ ទៅស្រុកវិញផងដែរ ដែលនេះមានន័យថា ត្រឹម២ថ្ងៃប៉ុណ្ណោះ ឡាវចាប់បញ្ជូនឧក្រិដ្ឋជនឆបោកតាមអនឡាញថៃ ទៅស្រុកវិញរហូតដល់ទៅ ១៥៣នាក់។
បន្ថែមពីនេះរបាយការណ៍ដដែល បានបញ្ជាក់ថា ជនជាតិថៃទាំងអស់នេះ បានជួលបន្ទាប់សម្ងាត់ក្បែរកាស៊ីណូ St. Vegas ដើម្បីបើកដំណើរគេហទំព័រហ្គេមអនឡាញខុសច្បាប់ចំនួន៦ ដែលមួយខែៗ រកចំណូលបានចន្លោះ ១៤ ០០០-១៨ ០០០បាត។
ការចុះបង្ក្រាប និងឈានដល់ការបណ្តេញចេញនេះ គឺជាលទ្ធផលនៃប្រតិបត្តិការកាលពីថ្ងៃទី១៨ ខែកក្កដា កន្លងទៅ នៅឯអគារ ST Vegas ស្ថិតក្នុងភូមិ Dongphosy ស្រុក Hatxayfong។
នៅក្នុងប្រតិបត្តិការនោះ អាជ្ញាធរបានឃាត់ខ្លួនមនុស្សសរុបរហូតដល់ទៅ ៥៨៩នាក់ ដែលមាន ៤សញ្ជាតិផ្សេងគ្នា ក្នុងនោះរួមមាន ជនជាតិថៃ ៣៧៣នាក់, ឡាវ ១៩៩នាក់, វៀតណាម ១៥នាក់ និងជនជាតិផ្សេងទៀត។
ក្នុងប្រតិបត្តិការនោះ គឺជាផ្នែកមួយនៃយុទ្ធនាការទ្រង់ទ្រាយធំរបស់រដ្ឋាភិបាលឡាវ ក្នុងការបោសសម្អាតមជ្ឈមណ្ឌលឆបោកតាមអនឡាញ ល្បែងស៊ីសង និងការបោកប្រាស់តាមប្រព័ន្ធទូរគមនាគមន៍ ខណៈ ប៉ូលិសបានចុះប្រតិបត្តិការជាបន្តបន្ទាប់ទាំងនៅក្នុង និងជុំវិញរដ្ឋធានីវៀងចន្ទន៍ ក្នុងរយៈពេលប៉ុន្មានសប្តាហ៍ថ្មីៗនេះ៕ដោយ៖តារា
(រូប៖ Amarin TV)
