ខេត្តព្រះសីហនុ ៖ មន្ត្រីជំនាញចរាចរនៃអធិការដ្ឋាននគរបាលស្រុកស្ទឹងហាវនៃស្នងការដ្ឋាននគរបាល ខេត្តព្រះសីហនុបានឲ្យដឹងថា នៅវេលាម៉ោង១០និង៤៩នាទីថ្ងៃទី២២ ខែសីហា ឆ្ឆ្នាំ២០២៦ មានករណីគ្រោះថ្នាក់ចរាចរណ៍ដ៍រន្ធត់មួយបានឆក់យកជីវិតស្ត្រីពីរនាក់ភ្លាមៗនៅនិងកន្លែងកើតហេតុដែលបង្កឡើងដោយជនជាតិចិនបានបើករថយន្តបុកនិងម៉ូតូដែលមានទិសដៅផ្ទុយគ្នាពេញទំហឹងបណ្តាលឲ្យស្ត្រីរងគ្រោះចំនួនពីរនាក់ប៉ើងធ្លាក់ចេញពីផ្លូវស្លាប់ភ្លាមៗនៅកន្លែងកើតហេតុ។
ប្រភពខាងលើបានបន្តឲ្យដឹងទៀតថា ហេតុការណ៍ គ្រោះថ្នាក់ដ៍រន្ធត់ខាងលើបានកើតឡើងតាមបណ្ដោយ
វិថី សុវត្ថិភាពសម្តេចទេពវង្សឬផ្លូវលេខ(១៤៦B) ត្រង់
គីទ្បូម៉ែត្រលេខ (១២-១៣-) ស្ថិតនៅក្នុងភូមិ០១ ឃុំទំនប់រលក ស្រុកស្ទឹងហាវ ខេត្តព្រះសីហនុ។
រថយន្តបង្កគ្រោះថ្នាក់ម៉ាក LUXES ពណ៍ស ផ្លាកលេខ ភ្នំពេញ 2V-8628 អ្នកបើកបរឈ្មោះ DENG SHIYONG ភេទប្រុស អាយុ៤៥ ឆ្នាំជនជាតិចិនជាងសំណង់ និងមានអ្នករួមដំណើរចំនួន០៣ រួមមាន
១-ឈ្មោះ ទឹន យីស៉ិង ភេទស្រី ជាកូន (មិនរងរបួស) .។
២-ឈ្មោះ ទឹន ចែយី ភេទស្រី ជាកូន (មិនរងរបួស) ។
៣-ឈ្មោះ ដេន មុំ ភេទស្រី អាយុ៣២ឆ្នាំ ជាប្រពន្ធ (មិនរងរបួស) ។ អ្នកទាំង០៤ ស្នាក់នៅក្នុងរោងចក្រ ISI ឃុំកែវផុស ស្រុកស្ទឹងហាវ ខេត្តព្រះសីហនុ។
រថយន្តមួយគ្រឿងខាងលើបើកបរក្នុងទិសដៅពីស្រុកស្ទឹងហាវ ឆ្ពោះទៅស្រុកព្រៃនប់ ។ លុះដល់ចំណុចកើតហេតុខាងលើ រថយន្តបានឡើងវ៉ាជែងចូលគន្លងខាងឆ្វេងទៅបុកម៉ូតូ០១គ្រឿងម៉ាក HONDA ពណ៍ខ្មៅ ពាក់ផ្លាកលេខ ព្រះសីហនុ 1G-9293 បើកបរឈ្មោះ ហេង សុឡេង ភេទស្រី អាយុ២១ឆ្នាំ ជនជាតិខ្មែរ (ស្លាប់)ភ្លាមៗ និងអ្នករួមដំណើរម្នាក់ ឈ្មោះ ឈឹម ណាវី ភេទស្រី អាយុ៤៥ឆ្នាំ (ស្លាប់) អ្នកទាំងពីរមានអាស័យដ្ឋានបច្ចុប្បន្ននៅភូមិ០១ ឃុំទំនប់រលក ស្រុកស្ទឹងហាវ ខេត្តព្រះសីហនុ ទិសដៅឆ្ពោះទៅស្រុកស្ទឹងហាវ។
សមត្ថកិច្ចបានឲ្យដឹងបន្ថែមថា ជនរងគ្រោះដែលស្លាប់បាត់បង់ជីវិតឈ្មោះហេង សុឡេង អាយុ២១ឆ្នាំ ត្រូវជាគូដណ្តឹងរបស់កូនប្រុសស្ត្រីរងគ្រោះដែលស្លាប់បាត់បង់ជីវិតឈ្មោះឈឹម ណាវី ដែលរួមដំណើរជាមួយគ្នា។
ក្រោយកើតហេតុភ្លាមៗសមត្ថកិច្ចនគរបាលជំនាញចរចរបានចុះដល់កន្លែងកើតហេតុ ធ្វើការវាស់វែងដើម្បីអនុវត្តនិតិវិធី។ ឯវត្ថុតាងរថយន្ត០១គ្រឿងនិងម៉ូតូ០១គ្រឿង បានយកមករក្សាទុកនៅអធិការដ្ឋាននគរបាលស្រុកស្ទឹងហាវ ដើម្បីបន្តនីតិវិធីច្បាប់ ។
ជនបង្កជាជនជាតិចិន ក្រោយកើតហេតុភ្លាមៗ សមត្ថកិច្ចបានឃាត់ខ្លួនបញ្ជូនទៅស្នងការរដ្ឋាននគរបាលខេត្តព្រះសីហនុដើម្បីកសាងសំណុំរឿងបញ្ជូនទៅសាលាដំបូងខេត្តដើម្បចាត់ការទៅតាមនិតិវិធី ។
ដោយឡែកសាកសពស្ត្រីរងគ្រោះទាំងពីរត្រូវបានប្រគល់ជូនសាច់ញាតិយកទៅធ្វើបុណ្យតាមប្រពៃណីនៅភូមិ០១ ឃុំទំនប់រលកស្រុកស្ទឹងហាវ ៕
ដោយ៖ សុរិយា
