ការញ៉ាំស៊ុតជាប្រចាំ អាចជួយការពារសុខភាពបេះដូង គ្រប់គ្រងសម្ពាធឈាម កាត់បន្ថយការធ្លាក់ចុះនៃសមត្ថភាពខួរក្បាល ពង្រឹងឆ្អឹង និងជួយគ្រប់គ្រងទម្ងន់។

មនុស្សមួយចំនួនចាត់ទុកស៊ុតថាជា «អាហារដែលសម្បូរទៅដោយសារធាតុចិញ្ចឹម» ខណៈអ្នកខ្លះទៀតជៀសវាងស៊ុត ដោយព្រួយបារម្ភអំពីបរិមាណកូឡេស្តេរ៉ុលខ្ពស់របស់វា។

សម្រាប់អាហារដ៏សាមញ្ញមួយប្រភេទ ស៊ុតបានបង្កឱ្យមានការយល់ច្រឡំ និងការព្រួយបារម្ភជាច្រើន។ តាមពេលវេលា ការជ្រើសរើសញ៉ាំ ឬជៀសវាងស៊ុត អាចមានឥទ្ធិពលគួរឱ្យកត់សម្គាល់លើសុខភាព។

ខាងក្រោមនេះគឺជាវិធី ៦ យ៉ាងដែលសុខភាពរបស់អ្នកដែលញ៉ាំស៊ុតជាប្រចាំ អាចមានភាពខុសគ្នាពីអ្នកដែលកម្រញ៉ាំស៊ុត។

១. សុខភាពបេះដូងប្រសើរឡើង និងកាត់បន្ថយហានិភ័យជំងឺបេះដូង

ការសិក្សាមួយក្នុងឆ្នាំ ២០២៥ ដែលចេញផ្សាយក្នុងទស្សនាវដ្តីវិទ្យាសាស្ត្រអន្តរជាតិ Nutrients បានរកឃើញថា ការញ៉ាំស៊ុតពី ១ ទៅ ៦ គ្រាប់ក្នុងមួយសប្តាហ៍ មានទំនាក់ទំនងជាមួយអាយុជីវិតកាន់តែវែង និងហានិភ័យស្លាប់ដោយសារជំងឺសរសៃឈាមបេះដូងទាបជាងមុន។

បើប្រៀបធៀបជាមួយអ្នកដែលមិនញ៉ាំស៊ុត អ្នកដែលញ៉ាំស៊ុតពី ១ ទៅ ៦ គ្រាប់ក្នុងមួយសប្តាហ៍ មានហានិភ័យស្លាប់ដោយសារជំងឺសរសៃឈាមបេះដូងទាបជាង ២៩% និងហានិភ័យស្លាប់ដោយសារមូលហេតុគ្រប់ប្រភេទទាបជាង ១៥%។

ក្នុងចំណោមអ្នកដែលមានបញ្ហា ខ្លាញ់ក្នុងឈាមមិនប្រក្រតី (Dyslipidemia) ហានិភ័យស្លាប់ដោយសារជំងឺសរសៃឈាមបេះដូងទាបជាង ២៧%។

២. ជួយគ្រប់គ្រងសម្ពាធឈាម ជាតិស្ករក្នុងឈាម និងមុខងារមេតាបូលីស

ការសិក្សាមួយក្នុងឆ្នាំ ២០២៣ ដែលចេញផ្សាយក្នុងទស្សនាវដ្តី Nutrients បានរកឃើញថា អ្នកដែលញ៉ាំស៊ុតយ៉ាងហោចណាស់ ៥ គ្រាប់ក្នុងមួយសប្តាហ៍ មានហានិភ័យកើតជំងឺទឹកនោមផ្អែមប្រភេទទី២ ទាបជាង ២៨% និងហានិភ័យកើតជំងឺលើសសម្ពាធឈាមទាបជាង ៣២%។

ការរួមបញ្ចូលស៊ុតជាមួយអាហារដែលមាន ជាតិសរសៃ ត្រី និងធញ្ញជាតិពេញមូល (Whole grains) អាចជួយកាត់បន្ថយហានិភ័យជំងឺទឹកនោមផ្អែមប្រភេទទី២បន្ថែមទៀតប្រមាណ ២៦% ទៅ ២៩%។

៣. ជួយបន្ថយការចាស់នៃខួរក្បាល និងរក្សាសមត្ថភាពបញ្ញា

នៅខែមេសា ឆ្នាំ ២០២៦ ទស្សនាវដ្តី The Journal of Nutrition បានចេញផ្សាយការសិក្សាធំមួយ ដែលតាមដានមនុស្សជាង ៤០,០០០ នាក់ អស់រយៈពេលជាង ១៥ ឆ្នាំ។

ការសិក្សាបានរកឃើញថា ការញ៉ាំស៊ុតក្នុងបរិមាណមធ្យម មានទំនាក់ទំនងជាមួយហានិភ័យកើត ជំងឺ Alzheimer’s ទាបជាងយ៉ាងច្បាស់ ខណៈការជៀសវាងស៊ុតទាំងស្រុង អាចពាក់ព័ន្ធនឹងការចាស់នៃខួរក្បាលលឿនជាងមុន។

អ្នកដែលញ៉ាំស៊ុតយ៉ាងហោចណាស់ ៥ ដងក្នុងមួយសប្តាហ៍ មានហានិភ័យកើតជំងឺ Alzheimer’s ទាបជាង ២៧% ខណៈអ្នកដែលមិនញ៉ាំស៊ុត មានហានិភ័យខ្ពស់ជាង ២២%។

៤. ជួយពង្រឹងឆ្អឹង

ការសិក្សាមួយក្នុងឆ្នាំ ២០២៤ ដែលចេញផ្សាយក្នុងទស្សនាវដ្តី Food & Function បានរកឃើញថា ការញ៉ាំស៊ុតប្រហែល ១០០ ក្រាមក្នុងមួយថ្ងៃ ឬប្រហែល ២ គ្រាប់ អាចជួយបង្កើនដង់ស៊ីតេឆ្អឹងនៅតំបន់ ក និងក្បាលឆ្អឹងភ្លៅ (Femoral neck) និង ឆ្អឹងខ្នងផ្នែកចង្កេះ (Lumbar spine)។

អ្នកស្រាវជ្រាវជឿថា ស៊ុតអាចជួយជំរុញសកម្មភាពរបស់ អង់ស៊ីម Alkaline phosphatase ដែលមានតួនាទីក្នុងការពង្រឹងឆ្អឹង ដូច្នេះអាចជួយបង្កើនដង់ស៊ីតេឆ្អឹង។

៥. ប្រភពវីតាមីន និងជួយថែរក្សាសុខភាពភ្នែក

អ្នកជំនាញអាហារូបត្ថម្ភ Wang Lu បានសរសេរនៅលើគេហទំព័រ China Science Communication ក្នុងឆ្នាំ ២០២៣ ថា ស៊ុតសម្បូរទៅដោយ វីតាមីន A ដែលរាងកាយងាយស្រូបយក ដូច្នេះវាអាចជាផ្នែកដ៏មានប្រយោជន៍មួយនៃអាហារប្រចាំថ្ងៃ។

ជាតិខ្លាញ់ធម្មជាតិនៅក្នុងស៊ុត ក៏ជួយឱ្យរាងកាយស្រូបយក និងប្រើប្រាស់វីតាមីន A បានមានប្រសិទ្ធភាពកាន់តែប្រសើរ ដែលជួយដល់ ចក្ខុវិស័យ និងសុខភាពភ្នែកទូទៅ។

៦. ធ្វើឱ្យឆ្អែតបានយូរ និងជួយគ្រប់គ្រងទម្ងន់

ស៊ុតសម្បូរទៅដោយ ប្រូតេអ៊ីន ដែលរាងកាយអាចស្រូបយកបានយ៉ាងងាយ។

ប្រូតេអ៊ីនត្រូវការពេលរំលាយយូរជាងកាបូអ៊ីដ្រាត ដូច្នេះវាអាចធ្វើឱ្យមានអារម្មណ៍ឆ្អែតបានយូរ និងជួយកាត់បន្ថយចំណង់អាហារ។

ការញ៉ាំស៊ុតជាអាហារពេលព្រឹក អាចធ្វើឱ្យអារម្មណ៍ឆ្អែតនៅបានយូរ និងកាត់បន្ថយការចង់ញ៉ាំអាហារសម្រន់នៅពេលក្រោយក្នុងថ្ងៃ។ វាអាចជួយឱ្យការគ្រប់គ្រងទម្ងន់កាន់តែងាយស្រួល។

ស៊ុតអាចជាផ្នែកមួយនៃរបបអាហារដែលមានតុល្យភាព ដោយផ្តល់ប្រូតេអ៊ីន វីតាមីន និងសារធាតុចិញ្ចឹមជាច្រើន។ ទោះជាយ៉ាងណា បរិមាណ និងរបៀបរៀបចំស៊ុត ក៏សំខាន់ដែរ។ ការញ៉ាំស៊ុតជាមួយបន្លែ ត្រី និងធញ្ញជាតិពេញមូល អាចជាជម្រើសល្អជាងការញ៉ាំជាមួយអាហារដែលមានខ្លាញ់ ឬអំបិលខ្ពស់៕