ខេត្តកំពង់ចាម៖ កូនត្រីចម្រុះទម្ងន់ ៨២៥គីឡូក្រាម បានចាក់លែងចូលបឹងធម្មជាតិវិញ និងឧបករណ៍ល្មើសជាច្រើន ត្រូវបានជំនាញជលផល បំផ្លាញចោលនៅនឹងកន្លែង ខណៈពេលដែល ខណ្ឌរដ្ឋបាលជលផលកំពង់ចាម សហការជាមួយ អាជ្ញាធរស្រុកបាធាយ អធិការដ្ឋានរដ្ឋបាលជលផល (មេគង្គខាងត្បូងបឹងទន្លេសាប) ខណ្ឌរដ្ឋបាលជលផល (កំពង់ឆ្នាំង កណ្តាល) ដឹកនាំដោយ លោក ប៉ែន ផល្លីកា អនុរដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ និងសហការជាមួយអាជ្ញាធរ ស្រុកកោះសូទិន កម្លាំងប៉ុស្តិ៍នគរ បាលល្វេ និងសហគមន៍នេសាទបឹងកក់ នៅចំណុចផ្សេងៗគ្នាចំនួន ០៤ករណី ក្នុងខេត្តចំនួន ៣ គឺ ៖ ខេត្តកណ្ដាល កំពង់ស្ពឺ និងខេត្តកំពង់ចាម នាថ្ងៃទី១១ ខែកញ្ញា ឆ្នាំ២០២៦ នេះ ។

 

បើតាមរបាយការណ៍ របស់នាយខណ្ឌរដ្ឋបាលជលផល នៃមន្ទីរកសិកម្ម រុក្ខាប្រមាញ់ និងនេសាទខេត្តកំពង់ចាម ឲ្យដឹងថា ការចុះប្រតិបត្តិការត្រួតពិនិត្យ និងបង្រ្កាបបទល្មើសជលផល ទាំង ៤ករណី ខាងលើ ដោយមានការសម្របសម្រួលពីឯកឧត្តម ព្រះរាជអាជ្ញានៃអយ្យការអមសាលាដំបូងខេត្តកំពង់ចាម ។

 

ជាមួយនោះ ក្រុមការងារបានរុះរើបំផ្លាញចោលនូវឧបករណ៍ខុសច្បាប់ នៅនឹងកន្លែង ជារួមមាន៖ ករណីទី១ នៅចំណុចតាមដងទន្លេសាប ចាប់ពីឃុំកោះចិន ស្រុកពញាឮ ខេត្តកណ្តាល រហូតទៅដល់ ភូមិខ្លាគ្រហឹម ឃុំបាធាយ ស្រុកបាធាយ ខេត្តកំពង់ចាម និងស្ទឹងស្ងួត ឃុំអំពិលទឹក ស្រុកកំពង់ត្រឡាច ខេត្តកពង់ឆ្នាំង(ព្រំប្រទល់ខេត្តកំពង់ឆ្នាំង កណ្តាល និងខេត្តកំពង់ចាម) មានឧបករណ៍លូស្បៃមុងចំនួន ១៣០មាត់ របាំងស្បៃមុងចំនួន ១២២កន្លែង ប្រវែង ៦.០០០ម៉ែត្រ បង្គោលចម្រឹង ២.០០០ដើម និងចាក់លែងកូនត្រីចម្រុះ ៦៥០គីឡូក្រាម ។

 

ករណីទី២ នៅចំណុចព្រែកព្នៅ ឃុំល្វេ ស្រុកកោះសូទិន ខេត្តកំពង់ចាម មានឧបករណ៍ស្បៃមុងចំនួន ១១មាត់ របាំងស្បៃមុងប្រវែង ៣៣០ម៉ែត្រ បង្គោលចម្រឹងចំនួន ២៧៥ដើម និងចាក់លែងកូនត្រីចម្រុះទម្ងន់ ៥៥គីឡូក្រាម ។

 

ករណីទី៣ នៅចំណុចបឹងបុរស ឃុំល្វេ ស្រុកកោះសូទិន ខេត្តកំពង់ចាម មានឧបករណ៍ស្បៃមុងចំនួន ៩មាត់ របាំងស្បៃមុងប្រវែង ២៧០ម៉ែត្របង្គោលចម្រឹងចំនួន ២២៥ដើម ចាក់លែងកូនត្រីចម្រុះ ៤៥គីឡូក្រាម ។ និងករណីទី៤ នៅចំណុចបឹងរយា ឃុំល្វេ ស្រុកកោះសូទិន ខេត្តកំពង់ចាម។ មានឧបករណ៍ស្បៃមុងចំនួន ១៥មាត់ របាំងស្បៃមុងប្រវែង ៤៥០ម៉ែត្រ បង្គោលចម្រឹងចំនួន ៣៧៥ដើម ចាក់លែងកូនត្រីចម្រុះ ៧៥គីឡូក្រាម៕ ដោយ៖តារា