ខេត្តកោះកុង៖ រថយន្តធុនធ្ងន់ដឹកស៊ីម៉ងត៍មួយគ្រឿង បានបើកបរក្នុងល្បឿនលឿនចុះចំណោទ រួចជ្រុលទៅបុករនាំងពុះចែកទ្រូងផ្លូវ បណ្តាលឱ្យក្រឡាប់ផ្ងារជើង បង្កឱ្យមានការភ្ញាក់ រងការខូចខាត យ៉ាងដំណំ។

 

ករណីគ្រោះថ្នាក់ចរាចរណ៍បានកើតឡើងកាលពីវេលាម៉ោង៩និង៣០នាទីព្រឹក ថ្ងៃទី១២ ខែកញ្ញា ឆ្នាំ២០២៦ នៅលើកំណាត់ផ្លូវជាតិលេខ៤៨ ចន្លោះបង្គោលគីឡូម៉ែត្រលេខ១២៩-១៣០ ស្ថិតនៅក្នុងភូមិអន្លង់វ៉ាក់ ឃុំតាតៃក្រោម ស្រុកកោះកុង ខេត្តកោះកុង ។

 

សមត្ថកិច្ចនគរបាលខេត្តកោះកុងបាននិយាយឲ្យដឹងថា រថយន្តបង្កហេតុម៉ាក Cheng Hong ពណ៌ស ពាក់ស្លាកលេខ ភ្នំពេញ 3E-3589 សណ្តោងរ៉ឺម៉ក ពាក់ស្លាកលេខ ភ្នំពេញ 4A-4909 ផ្ទុកទៅដោយស៊ីម៉ងត៍ពេញរថយន្ត។ រថយន្តនេះធ្វើដំណើរក្នុងទិសដៅពីតំបន់តារាសាគរ សំដៅទៅកាន់ទីរួមខេត្តកោះកុង។

 

បើតាមការសន្និដ្ឋានរបស់សមត្ថកិច្ច ថា មូលហេតុដែលនាំឱ្យកើតមានឧបទ្ទវហេតុនេះ គឺបណ្តាលមកពីការបើកបរខ្វះការប្រុងប្រយ័ត្ន ផ្ទុកទំនិញធ្ងន់លើសកម្រិត ហើយថែមទាំងប្រើប្រាស់ល្បឿនលឿនពេលបើកបរចុះចំណោទ ទើបបណ្តាលឱ្យរថយន្តរេចង្កូតជ្រុលទៅបុកទង្គិចរនាំងពុះចែកទ្រូងផ្លូវយ៉ាងពេញទំហឹង និងក្រឡាប់ដោយខ្លួនឯងតែម្តង។

 

សមត្ថកិច្ចបានបន្តថា ក្រោយកើតហេតុ កម្លាំងសមត្ថកិច្ចជំនាញចរាចរណ៍បានចុះទៅដល់ទីតាំងកើតហេតុភ្លាមៗ ដើម្បីធ្វើការសម្របសម្រួលចរាចរណ៍ ចៀសវាងការកកស្ទះលើដងផ្លូវ និងចាត់ចែងស្ទូចយករថយន្តចេញពីកន្លែងកើតហេតុ ព្រមទាំងបន្តអនុវត្តនីតិវិធីច្បាប់។

 

សមត្ថកិច្ចក៏បានអំពាវនាវដល់អ្នកបើកបរគ្រប់រូប ជាពិសេសអ្នកបើកបររថយន្តធុនធ្ងន់ដឹកទំនិញ សូមមេត្តាបង្កើនការប្រុងប្រយ័ត្នខ្ពស់ គោរពច្បាប់ចរាចរណ៍ និងបន្ថយល្បឿននៅត្រង់ចំណុចផ្លូវកោង ឬផ្លូវចុះចំណោទ ដើម្បីចៀសវាងនូវគ្រោះថ្នាក់ជាយថាហេតុ ដែលអាចបង្កឱ្យខូចខាតទ្រព្យសម្បត្តិ និងប៉ះពាល់ដល់អាយុជីវិតមនុស្ស៕

ដោយ៖ សុរិយា