ក្លិប Columbus Crew ក្នុងក្របខណ្ឌ Major League Soccer (MLS)របស់សហរដ្ឋអាមេរិក បានបណ្តេញគ្រូបង្វឹកក្រុមបម្រុងរបស់ខ្លួន លោក Federico Higuain បន្ទាប់ពីលោកបានបដិសេធមិនព្រមលែងដៃអាជ្ញាកណ្តាលស្ត្រីម្នាក់ ហើយបាននិយាយថា៖ «កុំភ្លេចថា នេះជាការប្រកួតរបស់បុរស»។

 

Federico Higuain ដែលជាបងប្អូនប្រុសរបស់អតីតខ្សែប្រយុទ្ធ Real Madrid លោក Gonzalo Higuain ត្រូវបានបណ្តេញចេញពីការប្រកួត និងទទួលការពិន័យព្យួរមិនឱ្យចូលរួមប្រកួតចំនួន ២ប្រកួត ចំពោះហេតុការណ៍នេះ ដែលបានកើតឡើងក្នុងការប្រកួតលីគ MLS Next Pro។

 

អគ្គនាយកក្លិប Columbus Crew លោក Issa Tall បាននិយាយក្នុងសេចក្តីថ្លែងការណ៍ថា៖ «យើងបានសម្រេចថា វាជាផលប្រយោជន៍ល្អបំផុតសម្រាប់ក្លិប កីឡាករ និងបុគ្គលិកជំនួយរបស់យើង ក្នុងការបញ្ចប់តួនាទីរបស់ Federico Higuain។»

 

លោកបន្ថែមថា៖ «បន្ទាប់ពីការពិភាក្សាក្នុងសប្តាហ៍នេះ និងការវាយតម្លៃបន្ថែមលើអ្វីដែលបានកើតឡើងក្នុងរយៈពេលមួយខែកន្លងមក ស្តង់ដាររបស់ក្លិបអំពីអ្វីដែលយើងរំពឹងទុកពីអ្នកដឹកនាំក្រុមមួយរបស់យើង មិនត្រូវបានបំពេញឡើយ។»

 

សហជីពអាជ្ញាកណ្តាលរិះគន់ការឆ្លើយតបរបស់ MLS

 

ជាមួយគ្នានេះ Professional Soccer Referees Association (PSRA) ដែលជាសមាគមតំណាងឱ្យអាជ្ញាកណ្តាលបាល់ទាត់អាជីព បានរិះគន់ការឆ្លើយតបរបស់លីគ ដោយលើកឡើងថា ការពិន័យព្យួរ ២ប្រកួត លើ Higuain គឺ «មិនគ្រប់គ្រាន់នោះទេ»។

 

សេចក្តីថ្លែងការណ៍របស់សហជីពអាជ្ញាកណ្តាលបានបន្ថែមថា៖ «គ្រូបង្វឹកបុរសម្នាក់បានប្រព្រឹត្តសកម្មភាពចំនួនពីរដោយចេតនា ដែលជាការប្រើអំពើរំលោភបំពានផ្លូវកាយ និងការរើសអើងផ្លូវភេទចំពោះមន្ត្រីអាជ្ញាកណ្តាលស្ត្រីម្នាក់ ដោយច្របាច់ដៃរបស់នាង និងបដិសេធមិនព្រមលែង បន្ទាប់ពីត្រូវបានប្រាប់ឱ្យឈប់ចំនួន ៣ដង។»

 

សហជីពបាននិយាយថា អំពើបង្កការភ័យខ្លាចតាមរយៈការប្រើកម្លាំងផ្លូវកាយនេះ ត្រូវបានធ្វើឱ្យកាន់តែធ្ងន់ធ្ងរឡើងដោយសារសម្តីបែបបន្ទាបបន្ថោក និងរើសអើងផ្លូវភេទចំពោះអាជ្ញាកណ្តាលថា៖ «កុំភ្លេចថា នេះជាការប្រកួតរបស់បុរស»។

 

«ស្ត្រីបានធ្វើឱ្យគ្រប់កម្រិតនៃកីឡានេះកាន់តែប្រសើរឡើង។ ពួកគេមិនគួរត្រូវប្រឈមនឹងការបំភិតបំភ័យ ឬសម្តីបន្ទាបបន្ថោក ដើម្បីបង្ហាញថាពួកគេសមនឹងនៅក្នុងកីឡានេះឡើយ។»

 

«អាជ្ញាកណ្តាលស្ត្រីរបស់យើងបានបង្ហាញពីសមត្ថភាពដ៏ល្អឥតខ្ចោះរបស់ពួកគេនៅលើឆាកពិភពលោក។ ពួកគេសមនឹងទទួលបានការគោរព សេចក្តីថ្លៃថ្នូរ និងបរិយាកាសការងារដែលមានសុវត្ថិភាព ដូចមន្ត្រីអាជ្ញាកណ្តាលគ្រប់រូបដែរ៕»