នៅក្នុងប្រទេសឥណ្ឌា កាសែត The Times of India ដែលដកស្រង់ព័ត៌មានពីការិយាល័យស្នងការសង្គ្រោះរដ្ឋ Uttar Pradesh បានរាយការណ៍ថា យ៉ាងហោចណាស់មានមនុស្ស 81 នាក់បានស្លាប់ និង 62 នាក់ផ្សេងទៀតបានរងរបួសនៅក្នុងរដ្ឋ Uttar Pradesh ភាគខាងជើងនៃប្រទេសឥណ្ឌា ចន្លោះថ្ងៃទី 25 និង 27 ខែកញ្ញា។

យោងតាមរបាយការណ៍ យ៉ាងហោចណាស់ផ្ទះចំនួន 2,254 ខ្នងត្រូវបានខូចខាត និងសត្វពាហនៈចំនួន 154 ក្បាលបានងាប់ ខណៈពេលដែលអាជ្ញាធរបន្តវាយតម្លៃការខូចខាតដល់ដំណាំ។
ក្នុងរយៈពេល 48 ម៉ោងរដ្ឋ Uttar Pradesh បានកត់ត្រាទឹកភ្លៀងជាមធ្យម 66.5 មីលីម៉ែត្រ បើប្រៀបធៀបទៅនឹងកម្រិតធម្មតា 7.6 មីលីម៉ែត្រ ដែលខ្ពស់ជាងមធ្យមភាគប្រហែល 775%។
របាយការណ៍បានបន្ថែមថា ក្នុងចំណោមស្រុកចំនួន 75 នៅក្នុង Uttar Pradesh មានស្រុកចំនួន 56 បានកត់ត្រាកម្រិតទឹកភ្លៀងដែល “លើសពីធម្មតាឆ្ងាយណាស់”។
Uttar Pradesh ដែលជារដ្ឋដែលមានប្រជាជនច្រើនជាងគេរបស់ប្រទេសឥណ្ឌា ដែលមានប្រជាជនជាង 240 លាននាក់ តែងតែជួបប្រទះនឹងភ្លៀងធ្លាក់ខ្លាំង និងព្យុះផ្គររន្ទះក្នុងរដូវវស្សា ដែលមានរយៈពេលចាប់ពីខែមិថុនាដល់ខែកញ្ញា៕

រូបថត​:TTXVN