ខេត្តកំពង់ស្ពឺ៖ ដោយបានការបញ្ជាដឹកនាំពីលោកឧត្ដមសេនីយ៍ទោ ឃឹម សុកខៃ ស្នងការនគរបាលខេត្ដកំពង់ស្ពឺ ផែនការងារប្រឆាំងគ្រឿងញៀន ដឹកនាំផ្ទាល់ពីលោកវរសេនីយ៍ឯក ហ៊ាង ឈាងលី ស្នងការរង កាលពីថៃ្ងទី២៨ ខែកញ្ញា ឆ្នាំ២០២៦ នៅចំណុចភូមិត្រពាំងខ្យង ឃុំទួលអំពិល ស្រុកបសេដ្ឋ ខេត្តកំពង់ស្ពឺ កម្លាំងបានសហការអធិការដ្ឋាននគរបាលស្រុកបសេដ្ឋ និងអធិការដ្ឋាននគរបាលស្រុកសំរោងទង ស្រាវជ្រាវពន្លាតសមត្ថកិច្ចនិងឈានទៅឃាត់ខ្លួនបានមុខសញ្ញាពាក់ព័ន្ធការជួញដូរគ្រឿងញៀន ចំនួន៤នាក់៖ ១-ឈ្មោះ ហន សុខា ហៅ ភក្តី ហៅ ដី ភេទប្រុស អាយុ ៣២ឆ្នាំ នៅភូមិត្រពាំងជម្រៅ ឃុំទួលអំពិល ស្រុកបសេដ្ឋ ដោយដក ហូតបានម្សៅក្រាមពណ៍សថ្លាសង្ស័យជាគ្រឿងញៀន ១កញ្ចប់ធំ , ទូរស័ព្ទដៃ ១គ្រឿង, ម៉ូតូ ១គ្រឿង។
ផ្អែកតាមចម្លើយរបស់ឈ្មោះ ហន សុខា ហៅ ភក្តី ហៅ ដី និងបានការសម្របសម្រួលនីតិវិធីពី តំណាងអយ្យការអមសាលាដំបូងខេត្ដកំពង់ស្ពឺ សមត្ថកិច្ចឈានទៅឆែក ឆេរផ្ទះឈ្មោះ ឌិន រុន ភេទប្រុស អាយុ ៣៤ឆ្នាំ នៅភូមិអង្គខ្ជាយ ឃុំព្រៃវិហារ ស្រុកគងពិសី (គេចខ្លួន) និងបានឃេីញបក្ខពួកចំនួន ២នាក់ (២)-ឈ្មោះ យ៉ង កុយ ភេទ ប្រុស អាយុ ៣០ឆ្នាំ នៅភូមិត្រពាំងឃ្លោក ឃុំខ្វាវ ស្រុកសំរោង ខេត្តតាកែវ ដកហូតវត្ថុតាង ទូរស័ព្ទដៃ ១គ្រឿង ម៉ូតូ ១គ្រឿង (៣)-ឈ្មោះ ណុប គីមលៀង ភេទប្រុស អាយុ ២៤ឆ្នាំ នៅភូមិអង្គុញ ឃុំខ្វាវ ស្រុកសំរោង ខេត្តតាកែវ។
សមត្ថកិច្ចបន្ដសហការពន្លាតសមត្ថកិច្ចដោយបានសហការជាមួយកំលាំងស្នងការដ្ឋាននគរបាលរាជធានីភ្នំពេញស្រាវជ្រាវឈានទៅឃាត់ខ្លួនឈ្មោះ អ៊ុន លាប ភេទប្រុស អាយុ ២៦ឆ្នាំ នៅភូមិ១២ សង្កាត់វាលវង់ ខណ្ឌ៧មករា រាជធានីភ្នំពេញ ដោយដកហូតបានម្សៅ
ក្រាមពណ៌សថ្លាសង្ស័យជាគ្រឿងញៀន ១កញ្ចប់, ទូរស័ព្ទដៃ ១គ្រឿង។
ប្រតិបត្ដិការខាងលេីសមត្ថកិច្ចបានឃាត់ខ្លួនជនសង្ស័យ ៤នាក់ដកហូតម្សៅក្រាមពណ៍សថ្លាសង្ស័យជាគ្រឿងញៀនចំនួន ២កញ្ចប់(១ធំ,១តូច) ទម្ងន់ ៩៩៨,៩១ក្រាម (ជិត១គីឡូក្រាម) ទូរស័ព្ទដៃចំនួន ៣គ្រឿង ,ម៉ូតចំនួន ២គ្រឿង។
បច្ចុប្បន្នជនសង្ស័យរួមជាមួយភស្ដុតាងជាសារធាតុញៀន បានកសាងសំណុំរឿងនិងបញ្ជូនទៅអយ្យការអមសាលាដំបូងខេត្ដចាត់ការតាមនីតិវិធីបន្ដ៕
