យោងតាមReuters នៅថ្ងៃទី៧ខែតុលា បានអោយដឹងថា មន្ត្រីអ៊ុយក្រែនបាននិយាយថា រុស្ស៊ីបានបាញ់មីស៊ីល និងយន្តហោះគ្មានមនុស្សបើកជាច្រើនគ្រាប់ទៅលើប្រទេសអ៊ុយក្រែនកាលពីថ្ងៃពុធ ដោយបានសម្លាប់មនុស្សយ៉ាងហោចណាស់ប្រាំបីនាក់ និងបំផ្លាញអគារលំនៅដ្ឋាន រោងចក្រឧស្សាហកម្ម និងហេដ្ឋារចនាសម្ព័ន្ធ។
អាជ្ញាធរបាននិយាយថា មនុស្សពីរនាក់បានស្លាប់នៅក្នុងរដ្ឋធានីគៀវ បួននាក់នៅក្នុងទីក្រុង Pryluki ភាគខាងជើង និងពីរនាក់នៅក្នុងតំបន់ Poltava ភាគកណ្តាល។
លោក Dmytro Lubinets ស្នងការសិទ្ធិមនុស្សរបស់សភាអ៊ុយក្រែន បានមានប្រសាសន៍នៅលើកម្មវិធី Telegram ថា “អ៊ុយក្រែនត្រូវបានវាយប្រហារម្តងទៀតដោយមីស៊ីលរុស្ស៊ីពេញមួយយប់”។
កងទ័ពអាកាសអ៊ុយក្រែនបាននិយាយថា ទីក្រុងគៀវ និងទីក្រុងប៉ូលតាវ៉ា នៅកណ្តាលអ៊ុយក្រែន តំបន់ភាគអាគ្នេយ៍នៃទីក្រុងឌីនីប្រូប៉េត្រូវស្ក និងទីក្រុងខាគីវ នៅភាគឦសាន គឺជាចំណុចកណ្តាលនៃការវាយប្រហាររបស់រុស្ស៊ី។
ក្រសួងការពារជាតិរុស្ស៊ីបាននិយាយថា កងកម្លាំងរបស់ខ្លួនបានធ្វើការវាយប្រហារដ៏ធំមួយទៅលើទីតាំងឧស្សាហកម្មយោធានៅក្នុងទីក្រុងគៀវ និងតំបន់អ៊ុយក្រែនផ្សេងទៀត ដោយប្រើប្រាស់អាវុធបាញ់ចេញពីដី សមុទ្រ និងអាកាសដែលមានភាពជាក់លាក់ខ្ពស់ ក៏ដូចជាយន្តហោះគ្មានមនុស្សបើកផងដែរ។
រូបថត: Reuters
