ក្រុមហ៊ុន Meta Platforms (META.O) បានសម្រេចកិច្ចព្រមព្រៀងជាមួយនាយកប្រតិបត្តិ Mark Zuckerberg ដើម្បីរក្សាឱ្យលោកបន្តរស់នៅរដ្ឋ California បន្ទាប់ពីលោកបានព្រមានថា លោកកំពុងពិចារណាចាកចេញពីរដ្ឋដែលជាទីតាំងទីស្នាក់ការកណ្តាលរបស់ក្រុមហ៊ុន ប្រសិនបើអ្នកបោះឆ្នោតអនុម័តសំណើដាក់ពន្ធលើទ្រព្យសម្បត្តិ នៅខែក្រោយ។
ក្រោមកិច្ចព្រមព្រៀងនេះ លោក Zuckerberg នឹងទទួលបានភាគហ៊ុនប្រភេទ C ដែលមិនមានសិទ្ធិបោះឆ្នោត ហើយអាចលក់ភាគហ៊ុនទាំងនោះ ដើម្បីយកប្រាក់ទៅបង់វិក្កយបត្រពន្ធដែលអាចមានទំហំរាប់ពាន់លានដុល្លារ ប្រសិនបើសំណើនេះត្រូវបានអនុម័ត។ ជាថ្នូរមកវិញ លោកត្រូវប្តេជ្ញាបន្តរស់នៅក្នុងរដ្ឋ California ឬនៅទីតាំងណាមួយដែល Meta មានទីស្នាក់ការកណ្តាល រយៈពេលប្រាំបីឆ្នាំ។ នេះបើយោងតាមការបញ្ជាក់របស់ Meta កាលពីថ្ងៃពុធ។
យោងតាមទស្សនាវដ្តី Forbes លោក Zuckerberg ដែលជាមហាសេដ្ឋីមានទ្រព្យសម្បត្តិច្រើនបំផុតលំដាប់ទី៦ នៅលើពិភពលោក បានប្រាប់ Meta ថា លោកកំពុងពិចារណាផ្លាស់ប្តូរលំនៅឋានសំខាន់របស់លោកចេញពីរដ្ឋ California។ មូលហេតុគឺដោយសារសំណើ Proposition 40 ដែលត្រូវបានគេហៅថា «ពន្ធលើទ្រព្យសម្បត្តិនៅ California» អាចធ្វើឱ្យលោកប្រឈមនឹងបន្ទុកពន្ធដ៏មហាសាល ហើយអាចបង្ខំឱ្យលោកលក់ភាគហ៊ុនដែលមានសិទ្ធិបោះឆ្នោត ដើម្បីយកប្រាក់ទៅបង់ពន្ធ។
អ្នកវិភាគនយោបាយបានលើកឡើងថា សំណើ Proposition 40 ដែលស្នើឱ្យប្រជាជនរដ្ឋ California បោះឆ្នោតលើការដាក់ពន្ធតែម្តងក្នុងអត្រា ៥% លើមហាសេដ្ឋីដែលមានទ្រព្យសម្បត្តិរាប់ពាន់លានដុល្លារ នៅក្នុងរដ្ឋនេះ នៅមិនទាន់ប្រាកដថានឹងទទួលបានការអនុម័តនៅឡើយទេ។ រដ្ឋនេះមានមហាសេដ្ឋីរហូតដល់ប្រមាណ ២៥០ នាក់ ដែលមានទ្រព្យសម្បត្តិសរុបលើសពី ២ ទ្រីលានដុល្លារ។
លោក Zuckerberg ដែលមានទ្រព្យសម្បត្តិសុទ្ធប្រមាណ ២៤០ ពាន់លានដុល្លារ អាចលក់ភាគហ៊ុន Class C ចំនួន ២០% នៃភាគហ៊ុនដែលលោកទទួលបានភ្លាមៗ ដែលស្មើនឹង ១០% នៃផលប្រយោជន៍សេដ្ឋកិច្ចសរុបរបស់លោកនៅក្នុងក្រុមហ៊ុន។ វិធានការនេះអនុញ្ញាតឱ្យលោកអាចបង់ពន្ធដែលអាចកើតមាន ដោយមិនបាត់បង់ការគ្រប់គ្រងតាមរយៈសិទ្ធិបោះឆ្នោតឡើយ។
កាលពីថ្ងៃពុធ ក្រុមហ៊ុនបានប្រកាសថា ខ្លួននឹងចេញភាគហ៊ុនធម្មតា Class C ប្រភេទថ្មី ដែលគ្មានសិទ្ធិបោះឆ្នោត នៅខែមករា ឆ្នាំ២០២៧។ ការចេញភាគហ៊ុននេះនឹងមានប្រសិទ្ធភាពស្មើនឹងការបំបែកភាគហ៊ុនមួយជាពីរ ដើម្បីផ្តល់មូលនិធិសម្រាប់ការទិញយកក្រុមហ៊ុនផ្សេងៗ និងរក្សាបុគ្គលិកជំនាញកំពូល ខណៈពេលដែលនៅតែរក្សាសិទ្ធិគ្រប់គ្រងរបស់លោក Zuckerberg។
ការព្យាករណ៍រយៈពេលវែងរបស់ Meta ដែលបានរៀបរាប់នៅក្នុងឯកសារដាក់ជូនក្រុមហ៊ុន បានបង្ហាញថា ក្រុមហ៊ុននឹងត្រូវប្រមូលទុន «រាប់រយពាន់លានដុល្លារ» ក្នុងរយៈពេលជាច្រើនឆ្នាំ ដោយអាចចាប់ផ្តើមនៅដើមរដូវស្លឹកឈើជ្រុះឆ្នាំ២០២៦។ មូលហេតុគឺដោយសារក្រុមហ៊ុនរំពឹងថា នឹងត្រូវការដើមទុនសម្រាប់ផែនការពង្រីកអាជីវកម្មដែលពាក់ព័ន្ធនឹងបញ្ញាសិប្បនិម្មិត (AI)។
ក្រុមហ៊ុនមេរបស់ Facebook និង Instagram បានបញ្ជាក់ថា គណៈកម្មការពិសេសមួយរបស់ក្រុមប្រឹក្សាភិបាលបានសន្និដ្ឋានថា ការរក្សាលោក Zuckerberg ឱ្យបន្តកាន់តួនាទីដឹកនាំ និងគ្រប់គ្រងក្រុមហ៊ុនពីទីស្នាក់ការកណ្តាលនៅរដ្ឋ California គឺមាន «សារៈសំខាន់យ៉ាងខ្លាំង»។ ក្រុមហ៊ុនបានសង្កត់ធ្ងន់លើចំណុចនេះ ជាពិសេសក្នុងអំឡុងពេលដែលឧស្សាហកម្មរបស់ខ្លួនកំពុងប្រឈមនឹង «បញ្ហាប្រឈម និងការប្រកួតប្រជែងដែលមិនធ្លាប់មានពីមុនមក» ដោយសារការរីកចម្រើននៃបញ្ញាសិប្បនិម្មិត៕
