កីឡាករប្រណាំងរថយន្ត Formula 1 របស់ក្រុម Mercedes គឺ Kimi Antonelli បានបង្កើតប្រវត្តិសាស្ត្រថ្មី ដោយក្លាយជាជើងឯកពិភពលោក F1 វ័យក្មេងបំផុតក្នុងប្រវត្តិសាស្ត្រ នៅអាយុត្រឹមតែ ២០ ឆ្នាំ កាលពីថ្ងៃអាទិត្យ ទី១ ខែវិច្ឆិកា បន្ទាប់ពីការប្រកួត Mexico City Grand Prix ដែលមានការផ្អាក និងចាប់ផ្តើមប្រណាំងឡើងវិញ។ ការប្រណាំងនេះត្រូវបានឈ្នះដោយ Max Verstappen របស់ក្រុម Red Bull។

 

Antonelli ដែលជាជនជាតិអ៊ីតាលីដំបូងគេដែលឈ្នះជើងឯកចាប់តាំងពីឆ្នាំ១៩៥៣ បានបញ្ចប់ការប្រណាំងក្នុងចំណាត់ថ្នាក់លេខ៣។ គេបានស្រក់ទឹកភ្នែកដោយក្តីរំភើបតាមប្រព័ន្ធទំនាក់ទំនងវិទ្យុរបស់ក្រុម ខណៈឆ្លងកាត់បន្ទាត់បញ្ចប់នៅទីលានប្រណាំង Autodromo Hermanos Rodriguez ដែលស្ថិតនៅតំបន់មានរយៈកម្ពស់ខ្ពស់។ ពិន្ទុនាំមុខសរុបរបស់គេបានកើនដល់ ១១៩ ពិន្ទុ ដែលធ្វើឱ្យគ្មានគូប្រជែងអាចតាមទាន់បានទៀតឡើយ។

 

ចំណែក Lewis Hamilton របស់ក្រុម Ferrari ដែលបានចាប់ផ្តើមប្រណាំងពីដើមបានបញ្ចប់ក្នុងចំណាត់ថ្នាក់លេខ២ ក្នុងការប្រកួតដ៏តានតឹងមួយ ដែលមានរថយន្តសុវត្ថិភាព (Safety Car) ចូលទីលានពីរលើក គ្រោះថ្នាក់បុកគ្នាជាច្រើនលើក និងការផ្អាកការប្រណាំងដ៏យូររហូតដល់ ៣៣ នាទី ខណៈនៅសល់ ២៥ ជុំទៀតក្នុងចំណោម ៧១ ជុំ។

 

ឪពុកម្តាយ និងប្អូនស្រីរបស់គេបានរង់ចាំទទួលស្វាគមន៍ និងឱបគេភ្លាមៗ បន្ទាប់ពីគេចុះពីរថយន្ត ខណៈសមាជិកក្រុមការងារនៅតំបន់ Pit Crew ក៏បាននាំគ្នាចូលអបអរសាទរយ៉ាងកុះករ។

 

មុននេះ កំណត់ត្រាជើងឯកពិភពលោក F1 វ័យក្មេងបំផុតជាកម្មសិទ្ធិរបស់កីឡាករអាល្លឺម៉ង់ Sebastian Vettel ដែលបានឈ្នះជើងឯកដំបូងក្នុងចំណោមជើងឯក ៤ លើករបស់គេជាមួយក្រុម Red Bull នៅអាយុ ២៣ ឆ្នាំ និង ១៣៤ ថ្ងៃ ក្នុងឆ្នាំ២០១០។

 

នៅលើវេទិកាអបអរសាទរ Antonelli បានពាក់ទង់ជាតិអ៊ីតាលីលើស្មា និងបាញ់ស្រាសំប៉ាញអបអរជ័យជម្នះយ៉ាងរីករាយ៕