ប្រទេសម៉ាឡេស៊ី កំពុងផ្តល់ជំនួយជាសាច់ប្រាក់រហូតដល់ ៥០០ រីងហ្គីត (ប្រមាណ ១២៣,៥ ដុល្លារអាមេរិក) ដល់អ្នកទទួលផលចំនួន ៥,៤ លាននាក់ ដើម្បីជួយក្រុមប្រជាពលរដ្ឋដែលមានប្រាក់ចំណូលទាប ឱ្យអាចទប់ទល់នឹងសម្ពាធនៃការកើនឡើងថ្លៃចំណាយក្នុងជីវភាពប្រចាំថ្ងៃ។

 

យោងតាមសារព័ត៌មាន The Edge Malaysia គ្រួសារម៉ាឡេស៊ីប្រមាណ ៤ លានគ្រួសារ ដែលមានប្រាក់ចំណូលសរុបប្រចាំខែចំនួន ៥.០០០ រីងហ្គីត ឬតិចជាងនេះ នឹងទទួលបានជំនួយរហូតដល់ ៥០០ រីងហ្គីត ក្នុងដំណាក់កាលទី៤ នៃកម្មវិធី Sumbangan Tunai Rahmah (STR)។

 

ជាមួយគ្នានេះ ប្រជាពលរដ្ឋវ័យចំណាស់ដែលនៅលីវ និងមានលក្ខណៈសម្បត្តិគ្រប់គ្រាន់ចំនួន ១,៤ លាននាក់ នឹងទទួលបានជំនួយក្នុងម្នាក់ ១៥០ រីងហ្គីត។ សម្រាប់ដំណាក់កាលនេះ រដ្ឋាភិបាលនឹងបញ្ចេញថវិកាសរុបចំនួន ១,១ ពាន់លានរីងហ្គីត។

 

អ្នកទទួលផលនឹងទទួលបានប្រាក់ជំនួយដោយផ្ទាល់តាមរយៈគណនីធនាគាររបស់ខ្លួន។ ចំណែកអ្នកដែលមិនមានគណនីធនាគារ អាចទៅទទួលប្រាក់ជាសាច់ប្រាក់នៅតាមសាខាធនាគារ Bank Simpanan Nasional (BSN) ណាមួយក៏បាន។

 

យោងតាមទីភ្នាក់ងារសារព័ត៌មាន Bernama នាយករដ្ឋមន្ត្រីម៉ាឡេស៊ី លោក Anwar Ibrahim ដែលកាន់តំណែងជារដ្ឋមន្ត្រីក្រសួងហិរញ្ញវត្ថុផងដែរ បានថ្លែងនៅក្នុងសេចក្តីប្រកាសកាលពីថ្ងៃពុធថា ការទូទាត់ប្រាក់ជំនួយនឹងធ្វើឡើងជាដំណាក់កាល ចាប់ពីថ្ងៃទី៤ ដល់ថ្ងៃទី៦ ខែវិច្ឆិកា។

 

លោកបានបន្ថែមថា អ្នកដាក់ពាក្យថ្មីដែលទទួលបានការអនុម័ត និងអ្នកដែលប្តឹងឧទ្ធរណ៍ដោយជោគជ័យ នឹងចាប់ផ្តើមទទួលប្រាក់ជំនួយចាប់ពីថ្ងៃទី១៦ ខែវិច្ឆិកាតទៅ។

 

កម្មវិធី STR ដែលត្រូវបានគេស្គាល់ផងដែរថា ជាកម្មវិធីផ្តល់ជំនួយជាសាច់ប្រាក់ Rahmah គឺជាគម្រោងជំនួយហិរញ្ញវត្ថុដោយផ្ទាល់របស់រដ្ឋាភិបាលម៉ាឡេស៊ី ក្នុងគោលបំណងកាត់បន្ថយបន្ទុកចំណាយក្នុងជីវភាពប្រចាំថ្ងៃសម្រាប់ប្រជាពលរដ្ឋដែលមានប្រាក់ចំណូលទាប។ ម៉ាឡេស៊ីត្រូវបានចាត់ទុកថាជាប្រទេសមានសេដ្ឋកិច្ចធំលំដាប់ទី៣ ក្នុងតំបន់អាស៊ីអាគ្នេយ៍ បើគិតតាមផលិតផលក្នុងស្រុកសរុបសម្រាប់មនុស្សម្នាក់ (GDP per capita) តាមតម្លៃបច្ចុប្បន្ន។

 

លោក Anwar បានឱ្យដឹងថា ការបញ្ចេញជំនួយជុំចុងក្រោយនេះ ស្របពេលនឹងពិធីបុណ្យ Deepavali ហើយអ្នកទទួលផលមានប្រភពមកពីសហគមន៍ជនជាតិផ្សេងៗគ្នា ក្នុងនោះមានប្រជាពលរដ្ឋជាង ៦៣០.០០០ នាក់មកពីសហគមន៍ឥណ្ឌា។

 

លោកបានសម្តែងក្តីសង្ឃឹមថា ជំនួយនេះនឹងជួយសម្រាលបន្ទុកហិរញ្ញវត្ថុដល់គ្រួសារដែលកំពុងត្រៀមរៀបចំពិធីបុណ្យនេះ។

 

លោកបានបន្ថែមថា ការផ្តល់ជំនួយនេះបង្ហាញពីការប្តេជ្ញាចិត្តរបស់រដ្ឋាភិបាលក្នុងការផ្តល់អាទិភាពដល់សុខុមាលភាពប្រជាពលរដ្ឋ ជាពិសេសក្រុមដែលមានប្រាក់ចំណូលទាប។

 

លោក Anwar បានបញ្ជាក់ថា ការរៀបចំរចនាសម្ព័ន្ធហិរញ្ញវត្ថុរដ្ឋាភិបាលឡើងវិញ និងការកែលម្អអភិបាលកិច្ច បានធ្វើឱ្យរដ្ឋាភិបាលអាចបែងចែកចំណូលជាតិបន្ថែមទៀត ដើម្បីជួយដល់ប្រជាពលរដ្ឋម៉ាឡេស៊ីដែលកំពុងត្រូវការជំនួយ។

 

លោកបានឱ្យដឹងថា ចន្លោះពីឆ្នាំ២០១៨ ដល់ឆ្នាំ២០២២ ថវិកាដែលរដ្ឋាភិបាលបែងចែកសម្រាប់ជំនួយជាសាច់ប្រាក់ បានកើនឡើងពី ៦ ពាន់លានរីងហ្គីត ដល់ ៨ ពាន់លានរីងហ្គីត។

 

លោកបានបន្ថែមថា នៅឆ្នាំនេះ ថវិកាសម្រាប់កម្មវិធី STR និងកម្មវិធីជំនួយ Sumbangan Asas Rahmah (SARA) ដែលជាកម្មវិធីផ្តល់ជំនួយជាសាច់ប្រាក់មួយផ្សេងទៀត នឹងកើនដល់ ១៥ ពាន់លានរីងហ្គីត ហើយត្រូវបានគេរំពឹងថានឹងកើនដល់ ១៦ ពាន់លានរីងហ្គីត ក្រោមកញ្ចប់ថវិកាជាតិឆ្នាំ២០២៧៕