ខ្សែប្រយុទ្ធ Harry Kane ត្រៀមក្លាយជាកីឡាករបុរសដែលបង្ហាញខ្លួនឱ្យក្រុមជម្រើសជាតិអង់គ្លេសច្រើនបំផុតក្នុងប្រវត្តិសាស្ត្រ នៅពេលក្រុមតោកំណាចទាំងបីជួបក្រូអាត ក្នុងពានរង្វាន់ Nations League នៅកីឡដ្ឋាន Wembley នាថ្ងៃព្រហស្បតិ៍។

ការប្រកួតនេះនឹងជាការបង្ហាញខ្លួនលើកទី១២៦ របស់ Kane ដែលមានន័យថា គេនឹងបំបែកកំណត់ត្រាចាស់របស់អតីតអ្នកចាំទី Peter Shilton ដែលធ្លាប់បង្ហាញខ្លួន ១២៥ ប្រកួត ចន្លោះឆ្នាំ១៩៧០ ដល់ឆ្នាំ១៩៩០។

ចាប់តាំងពីបង្ហាញខ្លួនលើកដំបូងក្នុងឆ្នាំ២០១៥ ដោយរកគ្រាប់បាល់បានត្រឹមតែ ៧៩ វិនាទីក្រោយចូលលេង Kane បានក្លាយជាប្រធានក្រុម និងជាអ្នករកគ្រាប់បាល់បានច្រើនបំផុតក្នុងប្រវត្តិសាស្ត្រក្រុមជម្រើសជាតិអង់គ្លេស ដោយស៊ុតបញ្ចូលទីបាន ៩១ គ្រាប់ ក្នុងការបង្ហាញខ្លួន ១២៥ លើក។

កីឡាករវ័យ ៣៣ ឆ្នាំរូបនេះបានឆ្លងកាត់ទាំងភាពរីករាយ និងការខកចិត្តជាច្រើនជាមួយក្រុមជម្រើសជាតិ រួមទាំងការខកខានបាល់ប៉េណាល់ទីក្នុងវគ្គ ៨ ក្រុមចុងក្រោយ World Cup 2022 ទល់នឹងបារាំង។ ផ្ទុយទៅវិញ ការឈ្នះក្រូអាតក្នុង World Cup ឆ្នាំនេះ គឺជាអនុស្សាវរីយ៍មួយដែលគេចាត់ទុកថាស្ថិតក្នុងចំណោមពេលវេលាដ៏ពិសេសបំផុតរបស់ខ្លួន។

ក្រៅពីជាកីឡាករឆ្នើម Kane ក៏ត្រូវបានគេសរសើរចំពោះសមត្ថភាពដឹកនាំ និងភាពជាគំរូសម្រាប់កីឡាករជំនាន់ក្រោយ។ អតីតអ្នកចាំទី Joe Hart បានរំឭកថា Kane មានការរីកចម្រើនយ៉ាងខ្លាំង ចាប់តាំងពីចូលរួមក្រុមជម្រើសជាតិដំបូងៗ ខណៈអតីតគ្រូបង្វឹក Gareth Southgate បានប្រគល់តួនាទីជាប្រធានក្រុមឱ្យគេនៅឆ្នាំ២០១៧។ មកទល់ពេលនេះ Kane បានពាក់ស្លាកប្រធានក្រុមក្នុងការប្រកួតចំនួន ៩៧ លើក។

Kane ដែលបច្ចុប្បន្នលេងឱ្យ Bayern Munich ក៏ទើបតែឈ្នះពាន Ballon d’Or ឆ្នាំ២០២៦ និងជួយក្លិបឈ្នះជើងឯក Bundesliga ពីររដូវកាលជាប់គ្នា។ ទោះបីជាយ៉ាងណា គេនៅមិនទាន់អាចជួយអង់គ្លេសឈ្នះពានរង្វាន់ធំមួយនៅឡើយទេ។

Kane បានបញ្ជាក់ថា ស្ថានភាពកាយសម្បទារបស់ខ្លួននៅតែល្អ ហើយមិនទាន់គិតពីការចូលនិវត្តន៍ទេ ដោយមានបំណងបន្តជំរុញសមត្ថភាព និងមើលថាតើខ្លួនអាចសម្រេចអ្វីបន្ថែមទៀតបាន។

ក្នុងចំណោមការប្រកួត ១២៥ លើកដែល Kane បានចូលរួម អង់គ្លេសឈ្នះ ៨៣ ប្រកួត ស្មើ ២២ និងចាញ់ ២០ ប្រកួត។ គ្រាប់បាល់ទាំង ៩១ គ្រាប់របស់គេរួមមាន ៥៨ គ្រាប់ដោយជើងស្តាំ ១៥ គ្រាប់ដោយជើងឆ្វេង និង ១៨ គ្រាប់ដោយការតែតបាល់បញ្ចូលទី៕