ប្រព័ន្ធផ្សព្វផ្សាយរដ្ឋកូរ៉េខាងជើង (KCNA) បានរាយការណ៍នៅថ្ងៃទី១២ ខែវិច្ឆិកាថា មេដឹកនាំកូរ៉េខាងជើង លោក គីម ជុងអ៊ុន បានត្រួតពិនិត្យមូលដ្ឋានទ័ពជើងទឹកទ្រង់ទ្រាយធំមួយដែលកំពុងសាងសង់នៅលើឆ្នេរសមុទ្រភាគខាងកើតនៃប្រទេស។

ក្នុងអំឡុងពេលត្រួតពិនិត្យនៅថ្ងៃទី១២ ខែវិច្ឆិកា លោក គីម ជុងអ៊ុន បានហៅគម្រោងនេះថាជាអាទិភាពចម្បងសម្រាប់សន្តិសុខជាតិ និងអធិបតេយ្យភាពដែនសមុទ្ររបស់កូរ៉េខាងជើង។យោងតាម KCNA លោក គីម បានសង្កត់ធ្ងន់លើតម្រូវការក្នុងការបញ្ចប់ការសាងសង់តាមកាលវិភាគ ក៏ដូចជាការបញ្ចប់ហេដ្ឋារចនាសម្ព័ន្ធមូលដ្ឋានតាមផែនការ។
លោក គីម បានមានប្រសាសន៍ថា “ការសាងសង់មូលដ្ឋានទ័ពជើងទឹកទំនើបគឺជាកិច្ចការអាទិភាពចម្បង ដែលទាក់ទងដោយផ្ទាល់ទៅនឹងសន្តិសុខជាតិ និងការការពារអធិបតេយ្យភាពដែនសមុទ្ររបស់ប្រទេសពី A ដល់ Z។ ដូច្នេះ គម្រោងនេះត្រូវតែបញ្ចប់តាមស្តង់ដារដែលកំណត់ដោយបក្ស និងក្នុងរយៈពេលកំណត់”។
នៅថ្ងៃដដែលនោះ លោក គីម ក៏បានត្រួតពិនិត្យ និងដឹកនាំការសាងសង់លំនៅដ្ឋានថ្មីចំនួន ១០០០ ខ្នងនៅក្នុងស្រុក Tongchon ខេត្ត Kangwon ជាកន្លែងដែលគម្រោងសាងសង់មូលដ្ឋានទ័ពជើងទឹកទ្រង់ទ្រាយធំមួយកំពុងដំណើរការ។
ប្រព័ន្ធផ្សព្វផ្សាយកូរ៉េខាងជើងបានរាយការណ៍ថា អង្គភាពលំនៅដ្ឋានកំពុងត្រូវបានសាងសង់ដើម្បីសម្រួលដល់ប្រជាពលរដ្ឋដែលត្រូវបានផ្លាស់ទីលំនៅដោយគម្រោងសាងសង់មូលដ្ឋានទ័ពជើងទឹក។ ប្រជាពលរដ្ឋទាំងនេះត្រូវបានគេរំពឹងថានឹងផ្លាស់ទៅផ្ទះថ្មីរបស់ពួកគេក្នុងពេលឆាប់ៗនេះ។
ទីក្រុងព្យុងយ៉ាងមិនទាន់បានបង្ហាញពីទីតាំងពិតប្រាកដនៃមូលដ្ឋានទ័ពជើងទឹកថ្មីនៅឡើយទេ។ ទោះជាយ៉ាងណាក៏ដោយ ដំណើរទស្សនកិច្ចរបស់លោកគីមទៅកាន់ស្រុកតុងឆុនបានជំរុញឱ្យមានការសង្ស័យថា គម្រោងនេះកំពុងត្រូវបានអនុវត្តនៅកំពង់ផែចាងចុន ទាំងជាមូលដ្ឋានថ្មី ឬការពង្រីកមូលដ្ឋានទ័ពជើងទឹកដែលមានស្រាប់នៅទីនោះ៕

រូបថត​: KCNA