ខេត្តកោះកុង៖ មន្ត្រីនគរបាលខេត្តកោះកុង ឲ្យដឹងនៅព្រឹកថ្ងៃទី១៥ ខែវិច្ឆិកា ឆ្នាំ២០២៦នេះថា ពាក់ព័ន្ធករណីវត្តីម្នាក់ដែលប្រទះឃើញសពអណ្ដែតទឹកស្រះ១ កន្លែងក្នុងស្រុកស្រែអំបិលនោះ ពេលនេះសមត្ថកិច្ចបានឃាត់ ខ្លួនជនសង្ស័យម្នាក់ដែលជាសង្សារ ដែលសង្ស័យជាប់ ពាក់ព័ន្ធករណីឃាតកម្មលើនារីរងគ្រោះ។
ប្រភពពីមន្ត្រីនគរបាលបានឱ្យដឹងថា នៅថ្ងៃទី ១២ ខែ វិច្ឆិកា ឆ្នាំ ២០២៦ ក្រោយពីការិយាល័យនគរបាលបច្ចេកទេសខេត្តកោះកុង និងការិយាល័យជំនាញនគរបាលព្រណ្មទណ្ឌកម្រិតធ្ងន់ធ្វើកោសល្យវិច័យសាកសព និងពិនិត្យកន្លែងកើតហេតុ ដែលប្រទះឃើញសាកសពអណ្ដែតទឹក និងសម្ភារៈប្រើប្រាស់ដែលបានទុកនៅមាត់ស្រះទឹករួចរាល់ លោកវរសេនីយ៍ទោ ដូង វណ្ណា អធិការនគរបាលស្រុកស្រែអំបិល បានដឹកនាំផ្នែកជំនាញព្រហ្មទណ្ឌធ្វើការស្រាវជ្រាវឃាត់ខ្លួនជនសង្ស័យ ០១នាក់ មានទីលំនៅបច្ចុប្បន្ន ភូមិតានី ឃុំជីខលើ ស្រុកស្រែអំបិល(ត្រូវជាសង្សារ)។
គួរបញ្ជាក់ថា សពក្មេងស្រីអាយុ១៦ឆ្នាំម្នាក់ ដែលបានបាត់ខ្លួនតាំងពីយប់ថ្ងៃទី១០ ខែវិច្ឆិកា ឆ្នាំ២០២៦ ត្រូវបានប្រទះឃើញអណ្ដែតក្នុងស្រះទឹកមួយកន្លែង ស្ថិតក្នុងមូលដ្ឋានស្រុកស្រែអំបិល ខេត្តកោះកុង។ សមត្ថកិច្ចបានប្រកាសពីការប្រទះឃើញស្បែកជើងក្មេងស្រី និងទូរស័ព្ទដៃ១គ្រឿង នៅមាត់ស្រះទឹកមួយក្នុងមូលដ្ឋាន។ ក្រោយពីទទួលបានព័ត៌មាននេះ ម្ដាយក្មេងស្រីដែល បានទៅដល់ទីតាំងខាងលើ និងអះអាងថា ស្បែកជើង និងទូរស័ព្ទដៃដែលប្រទះឃើញនោះ គឺជារបស់កូនស្រីរបស់គាត់ឈ្មោះ ភី ណារីន អាយុ១៦ឆ្នាំ ។
បច្ចុប្បន្នជនសង្ស័យរួមទាំងវត្ថុតាងត្រូវបានកសាងសំណុំរឿងនឹងបញ្ជូនទៅការិយាល័យជំនាញព្រហ្មទណ្ឌកម្រិតធ្ងន់បន្តនីតិវិធីបញ្ជូនទៅតុលាការដើម្បីកាត់ទោសតាមច្បាប់៕
ដោយ៖ សុរិយា
