ភ្នំពេញ៖ បុរស២នាក់បានរងរបួសធ្ងន់ដេកសន្លប់ស្តូកស្ដឹងនៅ នឹងកន្លែងកើតហេតុ ដោយសារតែម៉ូតូឌ្រីមសេ១២៥និងម៉ូតូងហុងដាស្កូបពី បានមកពន្លះគ្នាយ៉ាងពេញទំហឹង។
ហេតុការណ៍នេះបានកើតឡើងវេលាម៉ោង១និង២០នាទីរំលងអាធ្រាតឈានចូល ថ្ងៃទី៨ ខែសីហា ឆ្នាំ២០១៥ ចំណុចរង្វង់មូលទួលគោកទល់មុខហាងលក់សំបកកង់ តាំង ប៊ុងហាក់ ស្ថិតក្នុងសង្កាត់បឹងកក់២ ខណ្ឌទួលគោក។
តាមប្រភពព័ត៌មានហេតុពីកន្លែងកើតហេតុបានឲ្យថា មុខពេលកើតហេតុគេឃើញបុរសម្នាក់ជិះម៉ូតូម៉ាក ហុងដាស្កុបពីមួយគ្រឿង ពណ៌ស ពាក់ស្លាកលេខភ្នំពេញ 1AZ-2778 ធ្វើដំណើរចេញពីផ្លូវបេតុងលេខ 608 ។ ខណៈមកដល់ចំណុចកើតហេតុស្រាប់តែមានម៉ូតូមួយគ្រឿងម៉ាកហុងដាឌ្រីម ពណ៌ខ្មៅ ពាក់ស្លាកលេខភ្នំពេញ 1U-8269 ធ្វើដំណើរតាមបណ្តោយផ្លូវលេខ២៨៩ ក្នុងល្បឿនលឿន ទិសដៅកើតទៅលិច ក៏បានជ្រុលទៅបុក ជាមួយនឹងម៉ូតូស្តុបពី បណ្តាលឲ្យម្ចាស់ម៉ូតូស្កុបពីសន្លប់បាត់បង់ស្មារតីភ្លាមៗ។ ចំណែកបុរសជិះម៉ូតូហុងដាឌ្រីមក៏រងរបួសធ្ងន់ដែរ។
ក្រោយកើតហេតុសមត្ថកិច្ចបានចុះមកដល់ចំណុចកើតហេតុភ្លាមៗ និងទាក់ទងហៅរថយន្តសាមុយមកដឹកយកអ្នករងរបួសទាំង២នាក់យកទៅព្យាបាលនៅមន្ទីរពេទ្យ។ ចំណែកម៉ូតូទាំង២គ្រឿងត្រូវបានសតម្ថិច្ចយកទៅរក្សាទុកនៅបុស្ពិ៍នគរបាល ដើម្បីរង់ចាំធ្វើការដោះស្រាយគ្នានៅពេលក្រោយ៕
ដោយ៖ វិបុល
