ភ្នំពេញ៖ តារាចម្រៀងOriginal Songប្រុសស្រីល្បីឈ្មោះជាច្រើនរូបនឹងចូលរួមច្រៀងក្នុងព្រឹត្តិការណ៍ប្រគំតន្ត្រីសប្បុរស ធម៌មួយមានឈ្មោះថា “ក្តីសង្ឃឹម១” ប្រយោជន៍ស្វែងរកថវិកាជួយដល់សិល្ប ករ ពិសេសដល់សមាគមចាប៉ីបុរាណ ខ្មែរ។ ព្រឹត្តិការណ៍ធំនេះនឹងធ្វើឡើងនៅថ្ងៃទី១៩ ខែវិច្ឆិកាខាងមុខនេះនៅក្នុងបរិវេណផ្សារទំនើបសុវណ្ណា។

វត្តមានតារាចម្រៀងមួយចំនួនមានដូចជាលោក ហេង ពិទូ, កញ្ញា អេដា, លោក សូណូ, លោក កាន់ ពេជ្រ និង លោក ម៉ា ច័ន្ទ បញ្ញានឹងបង្កើតទស្សនីយភាពទាក់ទាញការចាប់អារម្មណ៍ខ្លាំងពីទស្សនិកជនតាម រយៈបទចម្រៀងថ្មីៗពេញនិយមរបស់ពួកគេ។

គោលបំណងនៃការបង្កើតកម្មវិធីខាងលើត្រូវបានតំណាងអ្នកផលិតកម្មវិធីលើកឡើងថាបច្ចុប្បន្ន សិល្បៈផ្នែកសម័យកំពុងទទួលបានការគាំទ្រនិងពេញនិយមក្នុងស្រទាប់យុវវ័យ ខណៈសិល្បៈបុរាណខ្មែរខ្លះហាក់មិនសូវមានវត្តមានក្នុងសកម្មភាពសិល្បៈខ្មែរ ដែលជាហេតុឆ្ពោះទៅរកការសាបសូន្យ។ចាប៉ីបុរាណខ្មែរកំពុងទទួល រងនូវការគំរាមកំហែង និងការបាត់បង់ពី មួយថ្ងៃទៅមួយថ្ងៃ។ ឯជីវិត និងជីវភាពអ្នកសិល្បៈបុរាណកាន់តែធ្លាក់ចុះដុនដាបទៅ និងគ្មានការយកចិត្តទុកដាក់ហេតុនេះហើយទើបជំរុញឲ្យផ្សារទំនើបសុវណ្ណាបង្កើតកម្មវិធីសប្បុរសធម៌ “ក្តីសង្ឃឹម១”ដើម្បីសហ គមន៍ចាប៉ីអមតៈ ដើម្បីទ្រទ្រង់សហគមន៍សិល្បៈចាប៉ីបុរាណខ្មែរ ជំរុញសិល្បៈចាប៉ីបុរាណខ្មែរឲ្យសកម្មក្នុងសង្គមកាន់តែ ច្រើន និងបង្ហាញឲ្យកុលបុត្រខ្មែរជំនាន់ក្រោយបានស្គាល់ និងរួមគ្នាជួយអភិរក្ស សិល្បៈចាប៉ីបុរាណខ្មែរដ៏ចំណាស់មួយនេះបានគង់វង្ស។

ប្រភពបន្តថាតាមរយៈកម្មវិធីនេះផ្សារ ទំនើបសុវណ្ណារៀបចំសកម្មភាពនិងកម្មវិធីពិសេសៗជាច្រើនដូចជាការប្រគំតន្ត្រី សប្បុរសធម៌ដើម្បីសហគមន៍ចាប៉ីអមតៈ ចំនួន៣លើក គឺ (១) ថ្ងៃទី២៤ ខែកញ្ញា ឆ្នាំ២០១៦ (២) ថ្ងៃទី២៩ ខែតុលា ឆ្នាំ២០១៦ និង (៣) ថ្ងៃទី១៩ ខែវិច្ឆិកា ឆ្នាំ២០១៦។ ទន្ទឹមនឹងនេះផ្សារនេះកំពុងដំណើរការកម្មវិធីលក់បញ្ចុះតម្លៃពិសេស ១០ភាគរយដល់៣០ភាគរយលើមុខទំនិញជាច្រើន ហើយ៥ភាគរយនៃវិក្កយបត្រ ទិញទំនិញរបស់អ្នកនៅផ្សារ សុវណ្ណា ពីថ្ងៃទី១៩ ខែកញ្ញា ដល់ ១៩ ខែវិច្ឆិកា ឆ្នាំ២០១៦ នឹងបរិច្ចាគទៅកាន់សហគមន៍ចាប៉ីអមតៈ។

ប្រភពលើកឡើងដែរថាអតិថិជនដែលចំណាយចាប់ពី២ម៉ឺនរៀលឡើងទៅនឹងទទួលបានសន្លឹកឆ្នោត១សន្លឹក សៀវភៅសន្សំត្រា និងរង្វាន់ភ្លាមៗជាច្រើនចាប់ពីថ្ងៃនេះតទៅ រហូតដល់ថ្ងៃទី ១៩ ខែវិច្ឆិកា ឆ្នាំ២០១៦។ ការចាប់ឆ្នោតរង្វាន់ធំនឹងធ្វើឡើងក្នុងការប្រគំតន្ត្រីនៅថ្ងៃទី១៩ ខែវិច្ឆិកា ឆ្នាំ២០១៦ ដោយមានការសម្ដែងសិល្បៈសម័យរួមទាំងចាប៉ីបុរាណខ្មែរព្រមជាមួយការផ្តល់កិត្តិយសចូលរួមសម្ដែងស្ម័គ្រចិត្តពីក្រុមតារាល្បីៗខាងលើ នៅបរិវេណខាង មុខផ្សារទំនើបសុវណ្ណា៕

ដោយ៖ វឌ្ឍនា