ភ្នំពេញ៖ បុរសម្នាក់ដែលជាជាងម៉ូតូបានរងរបួសធ្ងន់ ខណៈកំពុងតែផ្សារកាំកង់ម៉ូតូក៏ស្រាប់តែផ្ទុុះធុងហ្គាសដែលផ្សារនោះ បណ្តាលឲ្យខូចខាតសម្ភារមួយចំនួន កាលពីវេលាម៉ោង១ និង៣០នាទីរសៀលថ្ងៃទី២៦ ខែតុលា ឆ្នាំ២០១៦ ស្ថិតនៅម្តុំផ្សារទួលទំពូង ផ្លូវ១៦៣ ក្នុងទួលទំពូង២ ខណ្ឌចំការមន រាជធានីភ្នំពេញ។

ជនរងគ្រោះមានឈ្មោះពូ សុវណ្ណ អាយុ៦៧ឆ្នាំ មុខរបរជាងធ្វើម៉ូតូ ស្នាក់នៅសង្កាត់ទំនប់ទឹក ខណ្ឌចំការមន។

តាមសម្ដីរាយការណ៍ពីកន្លែងកើតហេតុបានប្រាប់ថា មុនពេលកើតហេតុមានបុរសម្នាក់ជិះម៉ូតូម៉ាកFinoមួយគ្រឿងបានយកមកធ្វើ ដើម្បីឲ្យជាងផ្សារផ្លុំកាំកង់ម៉ូតូ។ លុះខណៈពេលដែលជាងម៉ូតូកំពុងតែផ្លុំក៏ស្រាប់តែផ្ទុះធុងហ្គាសដែលប្រើនោះបណ្តាលឲ្យបុរសជាជាងម៉ូតូរងរបួសធ្ងន់តែម្តង។

ក្រោយកើតហេតុប្រជាពលរដ្ឋដែលនៅក្បែរនោះបានដឹកបញ្ជូនទៅសង្គ្រោះបន្ទាន់នៅមន្ទីរពេទ្យរុស្ស៊ី៕

ដោយ៖ ស រស្មី