ខេត្តកំពង់ចាម៖ យប់ថ្ងៃទី៨ ខែសីហា ឆ្នាំ២០១៥ វេលាម៉ោង១៩ និង១០នាទី មានករណីគ្រោះថ្នាក់ចរាចរណ៍រវាងរថយន្ត នឹងម៉ូតូនៅលើផ្លូវជាតិលេខ៧១ នៅចំណុចភូមិថ្នល់បែកលិច ឃុំស្វាយទាប ស្រុកចំការលើ ខេត្តកំពង់ចាម ។ រថយន្តបង្ក ម៉ាកហាយឡែនឌឺ ពណ៌ខ្មៅ ដែលមានស្លាកលេខភ្នំពេញ ២N១៨៧៣ អ្នកបើកបរឈ្មោះ ហន ជីនហ៊ាត ភេទប្រុស អាយុ៤៤ឆ្នាំ មុខរបរជាប្រធានសុខាភិបាល ស្រុកអូររាំងឪ នៅភូមិលេខ៤កើត ឃុំអំពិលតាពក ស្រុកអូររាំងឪ ខេត្តត្បូងឃ្មុំ បានបុកម៉ូតូម៉ាកសង់កូរ៉េ ពណ៌ក្រហម គ្មានស្លាកលេខជិះគ្នា០២នាក់អ្នកបើកបរម៉ូតូឈ្មោះ ហ៊ាន ចំណាន ភេទប្រុស អាយុ៤០ឆ្នាំនៅភូមិថ្នល់ បែកកើត ឃុំស្វាយទាប រងរបួសធ្ងន់ និងអ្នករួមដំណើរ ឈ្មោះ ណារី លីហ្សា ភេទស្រី នៅភូមិជាមួយគ្នារងរបួសស្រាល ។
ក្រោយពីបុករួច អ្នកបើកបររថយន្ដព្យាយាមបើករត់ហើយ បានទៅបុកម៉ូតូមួយគ្រឿងទៀត ម៉ាកសង់កូរ៉េ ពណ៌ស្លាទុំ គ្មានស្លាកលេខ ជិញគ្នា២នាក់ ហើយអ្នកបើកបរឈ្មោះ ស្រ៊ុន ពិសី ភេទប្រុស អាយុ២៣ឆ្នាំ រងរបួសធ្ងន់ និងអ្នករួមដំណើរ ឈ្មោះ សួន ម៉ាំង ភេទប្រុស អាយុ៣០ឆ្នាំ រងរបួសធ្ងន់ អ្នកទាំង២នាក់រស់នៅភូមិតាអុង ឃុំតាអុង ស្រុកចំការលើ ។
ដោយមានកិច្ចសហការគ្នាបានល្អទើប សមត្ថកិច្ចឃាត់រថយន្តបាននៅចំណុចភូមិខែលជ័យ ឃុំអូរស្វាយ ស្រុកកំពង់សៀម ហើយជនបង្កក៏បានបញ្ជូនទៅឃុំខ្លួន នៅអធិការដ្ឋាននគរបាលស្រុកចំការលើដើម្បីកសាងនិតិវិធី ។
អ្នករងរបួសត្រូវបានដឹកតាមរថយន្តពេទ្យបង្អែក ស្រុកចំការលើ បញ្ជូនទៅសង្គ្រោះនៅមន្ទីរពេទ្យខេត្តកំពង់ចាម ចៃដន្យរថយន្តពេទ្យបានបែកកង់ ទាញចង្កូតទៅបុកផ្ទះអ្នកភូមិកំពុងសម្រាកហើយបានរងរបួស៤នាក់ និងអ្នកនៅក្នុង រថយន្តពេទ្យចំនួន២នាក់ផ្សេងទៀត សរុបទាំងអស់ អ្នករងរបួសមានចំនួន១០នាក់ ៕
ដោយ៖ ហេង នរិន្ទ្រន៍
