ភ្នំពេញ៖ នាព្រឹកថ្ងៃទី៣០ ខែតុលា ឆ្នាំ២០១៦ សាលាខណ្ឌព្រែកព្នៅមានកិត្តិយដោយ លោកស្រីឧបនាយករដ្ឋមន្ត្រី ម៉ែន សំអន ប្រធានក្រុមការងារថ្នាក់ជាតិ ចុះជួយរាជធានីភ្នំពេញ បានអញ្ជើញចុះជួបសំណេះសំណាល រួមជាមួយក្រុមការងារថ្នាក់ជាតិចុះជួយខណ្ឌព្រែកព្នៅ នៅភោជនីយដ្ឋានបឹងសុបិន្ទ ។
លោក សុខ សម្បត្តិ បានឡើងអានរបាយការណ៍ជូនក្នុងអង្គពិធី ស្តីពី ការចូលរួមអភិវឌ្ឍន៍ ស្ថាបនាផ្លូវបេតុងក្រាលឆ្អឹងដែក ដាក់លូរំដោះទឹកសំអុយ ជីកស្រះ ជីកអណ្តូងទឹកជូនប្រជាពលរដ្ឋប្រើប្រាស់ និងមានការចែកអំណោយដល់ចាស់ជរា ទុរគតជនជាដើម។ លោកសុខ សម្បត្តិបន្តទៀតថា ដោយសារតែសាលាខណ្ឌទើបតែបង្កើតថ្មី នៅមានចំណុចខ្វះខាតនៅឡើយ ហើយម៉្យាងវិញទៀតស្ថានភាពប្រជាពលរដ្ឋរស់នៅជាប្រជាពលរដ្ឋក្រីក្រ ភាគច្រើនប្រកបរបរនេសាទត្រី ធ្វើកសិករដើប្បីចិញ្ចឹមជីវភាពរៀងខ្លួន។
នាឱកាសនោះលោកស្រីក៏បានថ្លែងនូវការកោតសរសើរចំពោះការខិតខំប្រឹងប្រែងរួមគ្នា ទាំងក្រុមការងារថ្នាក់ជាតិចុះជួយខណ្ឌ ថ្នាក់ដឹកនាំខណ្ឌ សង្កាត់ ភូមិ និងអាជ្ញាធរមានសមត្ថកិច្ចពាក់ព័ន្ធនៅក្នុងមូលដ្ឋានខណ្ឌព្រែកព្នៅ ដែលបានរួមចំណែកជួយក្នុងការអនុវត្តនូវគោលនយោបាយរបស់រាជរដ្ឋាភិបាល ដែលបានដាក់ចុះសម្រាប់ឲ្យអនុវត្តរួមមាន បញ្ហាសុខសន្តិភាព បញ្ហាស្ថេរភាពនយោបាយ ដោយបានរួមគ្នា ទាំងកម្លាំងកាយ កម្លាំងចិត្ត ហិរញ្ញវត្ថុ ដើម្បីការអភិវឌ្ឍតាមមូលដ្ឋាន រួមទាំងសុខសុវត្ថិភាពរបស់ប្រជាពលរដ្ឋ ដោយភាពកក់ក្តៅ ទំនុកចិត្ត និងមានការជឿជាក់ មកលើការដឹកនាំរបស់យើងគ្រប់ជាន់ថ្នាក់ ជាពិសេសបញ្ហាភូមិ-សង្កាត់មានសុវត្ថិភាព និងការបម្រើសេវាទាំង១១វិស័យ នៅការិយាល័យច្រកចេញចូលតែមួយ។
លោកស្រីក៏បានបន្តទៀតថា ដើម្បីឲ្យការបម្រេីសេវាសាធារណៈដល់ប្រជាពលរដ្ឋឲ្យមានប្រសិទ្ធភាព គឺអាជ្ញាធរមូលដ្ឋានត្រូវនៅកៀកកិតជាមួយពួកគាត់ ដោយបន្តធ្វើឲ្យបានទូលំទូលាយ ធ្វើឲ្យបានស៊ីជម្រៅ ធ្វើឲ្យបានឆ្ងាយហ្នឹង និងមានប្រសិទ្ធភាព ដើម្បីបម្រេីនូវសេចក្តីត្រូវការរបស់ប្រជាពលរដ្ឋនៅក្នុងមូលដ្ឋាន និងចូលរួមអនុវត្តតាមអនុសាសន៍ដ៏ខ្ពង់ខ្ពស់របស់សម្តេចនាយករដ្ឋមន្ត្រី ហ៊ុន សែន ដើម្បីឲ្យប្រជាជនទទួលបានទំនុកចិត្ត និងការទទួលបាននូវសុខសុវត្ថិភាពក្នុងការរស់នៅ៕
ដោយ៖ ព្រែកជ័យ
