ខេត្តកណ្ដាល ៖ នៅរសៀលថ្ងៃទី៦ ខែធ្នូ ឆ្នាំ២០១៦ កម្លាំងអាវុធហត្ថខេត្តកណ្ដាល បានបង្ហាញមុខក្រុមគ្រឿងញៀនចំនួន៥នាក់ ដែលកម្លាំងអាវុធហត្ថស្រុកកណ្តាលស្ទឹងបង្ក្រាបបានកាលពីថ្ងែទី៣ ទី៤ ខែធ្នូ ឆ្នាំ២០១៦ កន្លងមកនៅចំណុចភូមិ តាដោលទី១ ឃុំ អំពៅព្រៃ ស្រុកកណ្តាលស្ទឹង ។

ការបង្ក្រាបក្រុមជនសង្ស័យពាក់ព័ន្ធរបរថ្នាំញៀនចំនួន៥នាក់ធ្វើឡើងជាបន្តបន្ទាបក្នុងរយះពេល២ថ្ងៃកម្លាំងមូលដ្ឋានកងរាជអាវុធហត្ថស្រុកកណ្តាលស្ទឹង បានធ្វើការល្បាតចលត័ក្នុងភូមិសាស្ត្រពីរលើក ប្រទះឃើញមុខសញ្ញាប្រើប្រាស់ និងជួញដូរគ្រឿងញៀន ក៏ធ្វើការឃាត់ខ្លួន ហើយឆែកឆេររកឃើញសារធាតុញៀន(ម៉ាទឹកកក) លើ២ករណី ។

លោកវរសេនីយ៍ទោ ពក សាង នាយរងសេនាធិការ នៃកងរាជអាវុធហត្ថខេត្តកណ្តាលបានអោយដឹងថាករណីទី១-នៅវេលាម៉ោង១១និង១០នាទីថ្ងៃទី៣ ខែធ្នូ ឆ្នាំ២០១៦ នៅចំណុចភូមិ តាដោលទី១ ឃុំ អំពៅព្រៃ ស្រុកកណ្តាលស្ទឹង ខេត្តកណ្តាល ដោយឃាត់ខ្លួនជនសង្ស័យ ម្នាក់ឈ្មោះ ឈឿន រដ្ឋា អាយុ២៦ឆ្នាំ មុខរបរមិនពិត ប្រាកដរស់នៅភូមិ-ឃុំ កើតហេតុខាងលើ ដកហូតថ្នាំញៀន និងវត្ថុតាងមួយចំនួនទៀត។ លុះដល់ម៉ោង៧ ថ្ងៃទី៤ ខែធ្នូ ឆ្នាំ២០១៦ ជនសង្ស័យបានសារភាពថា ខ្លួនបានបោះចោលថ្នាំញៀនមួយចំនួន នៅកន្លែងឃាត់ខ្លួនខាងលើ ទើបយើងនាំជនសង្ស័យទៅចង្អុល បង្ហាញរកឃើញវត្ថុតាង ជាថ្នាំញៀនចំនួន១០កញ្ចប់តូចបន្ថែមទៀត សរុបទាំងអស់១១កញ្ចប់តូច។

បន្ទាប់មកថ្ងៃទី៤ ខែធ្នូ ឆ្នាំ២០១៦ វេលាម៉ោង៥ល្ងាច ឈ្មោះ ឈឿន រដ្ឋា បានសារភាពថា ថ្នាំញៀន(ម៉ាទឹកកក)ខ្លួនបានទិញពីឈ្មោះ ថន ប៊ុនសុខហេង រស់នៅរាជធានីភ្នំពេញ ជាអ្នកយកមកលក់ឲ្យខ្លួន។ លុះនៅម៉ោង៥និង៥០នាទីថ្ងៃខែដដែល កម្លាំងមន្ទីរជំនាញខេត្តនិងកម្លាំងមូលដ្ឋានអាវុធហត្ថស្រុកកណ្តាលស្ទឹង បានធ្វើការពួនស្ទាក់ឈានដល់ការឃាត់ខ្លួនឈ្មោះ ថន ប៊ុនសុខហេង ភេទប្រុស អាយុ២៣ឆ្នាំមុខរបរ លក់ខោអាវ ស្នាក់នៅផ្ទះជួលជិតផ្សារអ៊ីអនភ្នំពេញ នៅចំណុចភូមិ តាដោលទី1 ឃុំអំពៅព្រៃ ស្រុកកណ្តាលស្ទឹង ខេត្តកណ្តាល ដកហូតថ្នាំញៀន និងវត្ថុតាងមួយចំនួន។

ដោយមានការឆ្លើយសារភាពពីឈ្មោះ ឈឿន រីណា ដែលបានឃាត់ខ្លួនកាលវេលាម៉ោង១២និង៣០នាទីថ្ងៃទី៤ ខែធ្នូ ឆ្នាំ២០១៦ ពីបទចែកចាយគ្រឿងញៀនថា ខ្លួនបានទិញថ្នាំញៀន(ម៉ាទឹកក ក)នោះពីឈ្មោះ រស់ ទ្រី។

លុះដល់វេលាម៉ោង៨ថ្ងៃទី៥ ខែធ្នូ ឆ្នាំ២០១៦ នៅចំណុចភូមិកំពង់ទួល ឃុំអន្លង់រមៀត ស្រុកកណ្តាលស្ទឹង ខេត្តកណ្តាលកម្លាំងអាវុធហត្ថស្រុកបានឈានទៅឃាត់ខ្លួនជនសង្ស័យ ឈ្មោះ រស់ ទ្រី ភេទប្រុស អាយុ២៦ឆ្នាំ រស់នៅភូមិព្រៃទទឹង ឃុំព្រះនិពា្វន្ត ស្រុកគងពិសី ខេត្តកំពង់ស្ពឺ ដកហូតម៉ូតូ១គ្រឿង លុះដល់ម៉ោង៣ ថ្ងៃ.ខែ.ដដែល ដោយមានការអនុញាតពីលោក លឹម សុគន្ថា ព្រះរាជអាជ្ញា អមសាលាដំបូងខេត្តកណ្តាល កម្លាំងជំនាញអាវុធហត្ថស្រុក-ខេត្តកណ្តាល និងកម្លាំងអាវុធហត្ថស្រុកគងពិសី ខេត្តកំពង់ស្ពឺ ដោយមានការចូលរួមពីអាជ្ញាធរមូលដ្ឋានបន្តឆែកឆេរលំនៅដ្ឋានរបស់ឈ្មោះ រស់ ទ្រី ស្ថិតនៅភូមិព្រៃទទឹង ឃុំព្រះនិពា្វន្ត ស្រុក គង ពិសី ខេត្តកំពង់ស្ពឺ ដកហូតវត្ថុតាងមួយចំនួន។

ករណីទី២-នៅវេលាម៉ោង១២និង៣០នាទីថ្ងៃទី ៤ ខែធ្នូ ឆ្នាំ២០១៦ នៅចំណុចភូមិ ដើមត្រាំង ឃុំអន្លង់រមៀត ស្រុកកណ្តាលស្ទឹង ខេត្តកណ្តាល កម្លាំងយើងបានឃាត់ខ្លួនជនសង្ស័យម្នាក់ឈ្មោះ យឿន រីណា ភេទប្រុស អាយុ៣០ឆ្នាំ មុខរបរ រត់ម៉ូតូឌុប រស់នៅ ភូមិព្រៃទទឹង ឃុំព្រះនិពា្វន្ត ស្រុកគងពិសី ខេត្តកំពង់ស្ពឺ ដកហូតថ្នាំញៀន និងវត្ថុតាងមួយចំនួន។

ដោយមានការឆ្លើយសារភាពពីឈ្មោះ យឿន រីណា និងដោយមានការអនុញាតពីលោក លឹម សុគន្ថា ព្រះរាជអាជ្ញាអមសាលាដំបូងខេត្តកណ្តាលកម្លាំងជំនាញ ធ្វើការសហការជាមួយកម្លាំងអាវុធហត្ថខណ្ឌចំការមន បានចុះធ្វើការពួនស្ទាក់ ឈានដល់ការឃាត់ខ្លួនឈ្មោះ យូ វណ្ណិត(ហៅប៉ែត) ភេទប្រុស អាយុ២៩ឆ្នាំ ជនជាតិខ្មែរ មុខរបរជាងដែក ស្នាក់នៅផ្ទះលេខ67 ផ្លូវលេខ99 ក្រុមទី31 ភូមិ5 សង្កាត់ផ្សារដើមថ្កូវខណ្ឌចំការមន ឃាត់ខ្លួននៅចំណុចភូមិ5 សង្កាត់ផ្សារដើមថ្កូវ ខណ្ឌចំការមន រាជធានីភ្នំពេញ ដកហូតថ្នាំញៀន និងម៉ូតូមួយគ្រឿង។

នាយរងសេនាធិការ នៃកងរាជអាវុធហត្ថខេត្តកណ្តាលបានបញ្ជាក់ថាទី១.ឈ្មោះ ឈឿន រដ្ឋា អាយុ២៦ឆ្នាំ ឃាត់ខ្លួនបាននៅថ្ងៃទី០៣ ខែធ្នូ ឆ្នាំ២០១៦ ត្រង់ចំណុចភូមិតាដោលទី១ ឃុំអំពៅព្រៃ ស្រុកកណ្តាលស្ទឹង ដោយដកហូតបានថ្នាំញៀន ១១កព្ចាប់, ប្រាក់ចំនួន៤ម៉ឺនរៀល និងវត្ថុតាងមួយចំនួន។

ទី២.ឈ្មោះ ថន ប៊ុនសុខហេង អាយុ២៣ឆ្នាំ ស្នាក់នៅជិតផ្សារអ៊ីអន (អ្នកលក់ថ្នាំញៀនឲ្យឈ្មោះ ឈឿន រដ្ឋា) ឃាត់ខ្លួនបាននៅថ្ងទី០៤ ខែធ្នូ ឆ្នាំ២០១៦ ត្រង់ចំណុចភូមិតាដោលទី១ដែរ ដកហូតបានថ្នាំញៀន ២កព្ចាប់ធំ ទម្ងន់៥.៦២ក្រាម, ម៉ូតូ១គ្រឿងម៉ាក Honda scoopy និងវត្ថុតាងមួយចំនួន។

ទី៣.ឈ្មោះ រស់ ទ្រី អាយុ២៦ឆ្នាំ រស់នៅភូមិព្រៃទទឹង ឃុំព្រះនិពា្វន្ត ស្រុកគងពិសី ខេត្តកំពង់ស្ពឺ ឃាត់ខ្លួនបាននៅថ្ងៃទី០៥ ខែធ្នូ ត្រង់ចំណុចភូមិកំពង់ទួល ឃុំអន្លង់រមៀត ស្រុកកណ្តាលស្ទឹង ដកហូតបានម៉ូតូ១គ្រឿង ដាវដែក២ដើម ជំពាមកៅស៊ូ១ កន្ត្រៃដែក២ដើម និងសម្ភារៈជក់មួយចំនួន។

ទី៤.ឈ្មោះ យឿន រីណា អាយុ៣០ឆ្នាំ រស់នៅភូមិព្រៃទទឹង ឃុំព្រះនិពា្វន្ត ស្រុកគងពិសី ខេត្តកំពង់ស្ពឺឃាត់ខ្លួនបាននៅថ្ងៃទី០៤ ខែធ្នូ ដកហូតថ្នាំញៀន ១កព្ចាប់, ម៉ូតូ១គ្រឿង, ទូរស័ព្ទ២គ្រឿង, ប្រាក់ចំនួន ៣០ម៉ឺនរៀលនិងវត្ថុតាងមួយចំនួន។

ទី៥.ឈ្មោះ យូ វណ្ណិត (ហៅប៉ែត) អាយុ២៩ឆ្នាំ ស្នាក់នៅផ្ទះលេខ៦៧ ផ្លូវលេខ៩៩ ភូមិ៥ សង្កាត់ផ្សារដើមថ្កូវ ខណ្ឌចំការមន ឃាត់ខ្លួននៅថ្ងៃទី០៤ ខែធ្នូ ត្រង់ចំណុចភូមិ៥ សង្កាត់ផ្សារដើមថ្កូវ ខណ្ឌចំការមន ដកហូតថ្នាំញៀន១កញ្ចប់ ទម្ងន់៣.៧៥ក្រាម ម៉ូតូ១គ្រឿង។

បើតាមមន្រ្តីអាវុធហត្ថ បានបញ្ជាក់ថា ថ្នាំញៀនខាងលើ បើសរុបទៅគឺមានទម្ងន់ ៩.១៤ក្រាម គិតជាកញ្ចប់ ជិត៥០កញ្ចប់ ស្មើនឹងទឹកប្រាក់ជាង២លានរៀល។

ក្រោយពីឃាត់ខ្លួនជនសង្ស័យទាំង៥នាក់ និងប្រមូលវត្ថុតាងទាំងអស់រួចមក កម្លាំងមន្ទីរជំនាញអាវុធហត្ថខេត្តកណ្ដាល បានកសាងសំណុំរឿងបញ្ជូន ទៅតុលាការជាបន្តបន្ទាប់ ដើម្បីចាត់ការតាមនីតិវិធីច្បាប់ ៕

ដោយ ៖ ស្អាងជ័យ