កម្លាំងទាហានកូរ៉េខាងត្បូងបានធ្វើសង្គ្រាមចិត្តសាស្ត្រសាជាថ្មីទៅលើកូរ៉េខាងជើង ដោយដាក់មេក្រូនៅតាមបណ្តោយព្រំដែនប្រទេសទាំងពីរ។ ការដាក់នេះជាលើកទីមួយចាប់តាំងពីឆ្នាំ២០០៤ ។
រដ្ឋាភិបាលទីក្រុងសេអ៊ូលបានបង្កើតការពារសន្តិសុខនៅតាមបណ្តោយព្រំដែនប្រទេសទាំងពីរតាំងពីថ្ងៃទី១០ខែសីហាមក។ ជាមួយការដាក់ប្រដាប់បំពងសម្លេងនេះគឺជាការឆ្លើយតបទៅនិងសកម្មភាពរបស់កូរ៉េខាងជើងដែលដាក់ពង្រាយគ្រាប់មីននៅតាមព្រំដែនស្ថិតនៅក្នុងតំបន់សធ្វើឲ្យទាហានកូរ៉េខាងត្បូង២នាក់រងរួសជាទម្ងន់កាលពីថ្ងៃទី១១ខែសីហា ។
សកម្មភាពដាក់ពង្រាយប្រដាប់បំពងសម្លែងនៅតាមព្រំដែនគឺជាការដើរថយក្រោយ វិលទ្រឡប់ទៅកាន់១១ឆ្នាំមុន។ ការប្រើប្រាស់បំពងសម្លេងឃោសនារបស់កូរ៉េខាងត្បូងក្នុងគោលដៅធ្វើឲ្យកម្លាំងទាហានកូរ៉េខាងជើងបាត់បង់ស្មារតី។ តាមរយៈបំពងសម្លេងនោះកូរ៉េខាងត្បូងបានផ្សព្វផ្សាយទាំងព័ត៌មាននៅក្នុងស្រុកនិងអន្តរជាតិ និងជីវភាពរស់នៅយ៉ាងល្អប្រសើររបស់ពលរដ្ឋកូរ៉េខាងត្បូង ដើម្បីជាការប្រឆាំងនឹងមេដឹកនាំគីមជុងអ៊ុន ។
សកម្មភាពខាងលើគឺជាការតបតទៅលើទីក្រុងព្យុងយ៉ាងដែលបំផ្ទុះមីននៅតាមព្រំដែន ក្នុងគោលដៅបង្កររបួសដល់កម្លាំងទាហានកូរ៉េខាងត្បូងដែលយាមល្បាតនៅតាមព្រំដែន។កម្លាំងទាហានកូរ៉េខាងត្បូងចាត់ទុកថានេះជាការបំពានលើបទឈប់បាញ់កាលពីឆ្នាំ១៩៥៣ ហើយទីក្រុងសេអ៊ូលទាមទាឲ្យកូរ៉េខាងជើងសុំទោសជាសាធារណ ។
កម្លាំងទាហាននៅតាមព្រំដែនរបស់កូរ៉េខាងត្បូងត្រូវដាក់ក្នុងស្ថានភាពអាសន្ន ដោយខ្លាចកូរ៉េខាងជើងតបតវិញដោយអាវុធ។ កន្លងមកកូរ៉េខាងជើងធ្លាប់បានប្រកាសថានិងបាញ់កម្ទេចរាស់សកម្មភាពឃោសនា ប្រើសង្គ្រាមចិត្តសាស្ត្រទៅលើពលរដ្ឋកូរ៉េខាងជើងពីសំណាក់ទាហានកូរ៉េខាងត្បូង ៕
ប្រែសម្រួល៖ យ៉ាត
