ភ្នំពេញ៖ នារីក្រមុំជាកម្មការិនីរោងចក្រម្នាក់ត្រូវបានបុរសល្មោភកាមម្នាក់ចាប់រំលោភរហូតបានសម្រេចខណៈនាងចេញពីធ្វើការហើយអង្គុយហូបបានក្នុងបន្ទប់ជួលតែម្នាក់ឯង កាលពីវេលាម៉ោង១១និង២០នាទីព្រឹកថ្ងៃទី៩ ខែធ្នូ ឆ្នាំ២០១៦ នៅក្នុងបន្ទប់លេខ២ផ្ទះជួល ស្ថិតក្នុងភូមិជ្រៃកោង សង្កាត់ចោមចៅ ខណ្ឌពោធិ៍សែនជ័យ រាជធានីភ្នំពេញ។

ជនសង្ស័យមានឈ្មោះ សំបុក សុវណ្ណ ភេទប្រុស អាយុ២៧ឆ្នាំ មុខរបរកម្មកររោងចក្រ ជី អើវើហ្គ្រើន ស្នាក់នៅបន្ទប់ជួលក្បែរខាងគ្នា មានស្រុកកំណើតភូមិផ្ទះលេខ៨៧ ផ្លូវលំ ភូមិស្វាយរុន ឃុំគោកគង់ខាងលិច ស្រុកកញ្ច្រៀច ខេត្តព្រៃវែង ។ ចំណែកនារីរងគ្រោះមិនស្គាល់ឈ្មោះអាយុ១៨ឆ្នាំ មុខរបរកម្មកររោងចក្រ ជាមួយជនសង្ស័យ និងស្នាក់នៅជាមួយបងស្រីក្នុងបន្ទប់ផ្ទះជួលខាងលើ មានស្រុកកំណើត ឃុំកំពែង ស្រុកគិរីវង់ ខេត្តតាកែវ។

តាមប្រភពព័ត៌មានបានឲ្យដឹងថា នៅមុនពេលកើតហេតុ នាងរងគ្រោះបានដើរចេញពីរោងចក្រទៅហូបបាយនៅក្នុងបន្ទប់ជួលតែម្នាក់ឯង ខណៈនោះស្រាប់តែជនសង្ស័យបានដើរចូលទៅតាមក្រោយ ទាញទ្វារបិទដាក់គន្លឹះជាប់ រួចចាប់ផ្តើមធ្វើសកម្មភាពចាប់នាងរំលោភរហូតបានសម្រេច ។ ខណៈនោះនាងបានខំប្រឹងរើបម្រាស់ដែរ ប៉ុន្តែរើមិនរួចលុះក្រោយពេលដែលជននោះ ចាប់រំលោភរួចទើបបងប្អូនជីដូនមួយនាងទៅដល់ និងបានគោះទ្វារហៅ នាងក៏រត់ទៅបើកទ្វារនិងស្រែកឲ្យជួយបង្កឲ្យមានការភ្ញាក់ផ្អើលហើយអ្នកជិតខាងបាននាំគ្នាជួយចាប់ជននោះ នាំទៅប្រគល់ឲ្យប៉ូលិសចាត់ការតាមច្បាប់តែម្ដង៕

ដោយ៖ សុខាសែនជ័យ