ខេត្តកំពត ៖ នាយការិយាល័យអន្តោប្រវេសន៍នៃស្នងការដ្ឋាននគរបាលខេត្តកំពត លោក នាក់ សារ៉ន បានជួបគ្រោះថ្នាក់ចរាចរណ៍ក្រឡាប់រថយន្តបណ្តាលឲ្យស្លាប់ រួមដំណើរជាមួយអ្នកបើករថយន្តម្នាក់ទៀត ជាមន្ត្រីសាលាខេត្តកំពតបានរងរបួស ។

ករណីគ្រោះថ្នាក់ចរាចរណ៍ខាងលើនេះបានកើតឡើងកាលពីវេលាម៉ោង៤និង១៦នាទី ថ្ងៃទី១៨ ខែធ្នូ ឆ្នាំ២០១៦ ស្ថិតក្នុងភូមិបឹងតារោង ឃុំព្រៃឃ្មុំ ស្រុកទឹកឈូ ខេត្តកំពត ។

មន្ត្រីនគរបាលខេត្តកំពតបានឲ្យដឹងថា លោក នាក់ សារ៉ន ធ្វើដំណើរដោយរថយន្តម៉ាកម៉ាស្តា រួមជាមួយនិងអ្នកបើករថយន្តម្នាក់ទៀត ឈ្មោះ សុខ សុភក្ត្រ ជាមន្ត្រីនៅសាលាខេត្តកំពត បានបើកគេចពីម៉ូតូមួយគ្រឿង ហើយក៏ជ្រុលចង្កូតទៅបុកដើមឈើនៅក្បែរផ្លូវជាតិ លេខ៣ ឋិតក្នុងភូមិបឹង តារោង ឃុំព្រៃឃ្មុំ ស្រុកទឹកឈូ បណ្តាលអោយរថយន្តក្រឡាប់ ស្លាប់លោក នាក់ សារ៉ន ដែលគេស្គាល់ថាជានាយការិយាល័យអន្តោប្រវេសន៍នៃស្នងការដ្ឋាននគរបាលខេត្តកំពត ខណៈអ្នកបើករថយន្តបានរងរបួស ។

សមត្ថកិច្ចឲ្យដឹងទៀតថា ឈ្មោះ សុខ សុភក្ត្រ ដែលជាមន្ត្រីនៅសាលាខេត្តកំពត និងជាអ្នកបើករថយន្តកំពុងស្ថិតក្នុងស្ថានភាពស្រវឹងនៅឡើយ ៕  ជាយក្រុង