ខេត្តព្រះសីហនុ៖ សាកសពជនបរទេសចំណាស់ម្នាក់ដែលដេកស្លាប់ស្អុយរលួយដៃជើងនិងពោះហើមប៉ោងដូចហុីងដែលទំនងជាស្លាប់ជាយូរថ្ងៃហើយនោះត្រូវបានគេប្រទះឃើញដេកស្លាប់លើក្រែពូកក្នុងបន្ទប់ជួលលេខ១១៩នៅបឹកកាឡូមួយកន្លែង។

ករណីជនបរទេសដេកស្លាប់នេះបានកើតឡើងនៅម៉ោង១១និង៣០នាទីថ្ងៃទី១៩ ខែធ្នូ ឆ្នាំ២០១៦ នៅចំណុចបឹងកាឡូ COZY Resort( ខូហ្សី រីសត )ខាងលិចរង្វងមូលតោ២ប្រហែល៧០ម៉ែត្រ ក្រោយខារ៉ាអូរខេ សៀងហៃ ស្ថិតនៅក្រុម១២ ភូមិ៤ សង្កាត់៤ ក្រុង-ខេត្តព្រះសីហនុ។

សមត្ថកិច្ចមូលដ្ឋានបានឲ្យដឹងថា សពជនរងគ្រោះពេលនេះសមត្ថកិច្ចមិនទាន់ស្គាល់ឈ្មោះនៅឡើយទេ ប៉ុន្តែបុរសរងគ្រោះត្រូវគេស្គាល់ជាសញ្ជាតិកាណាដា អាយុប្រមាណ៧០ឆ្នាំ។

សមត្ថកិច្ចបានឲ្យដឹងទៀតថា ជនរងគ្រោះ(សព)បានមកស្នាក់នៅបឹងកាឡូខាងលើកាលពីថ្ងៃ២៩ ខែតុលា ឆ្នាំ២០១៦។

បច្ចុប្បន្នសាកសពរងគ្រោះត្រូវបានរក្សាទុកនៅកន្លែងកើតហេតុដោយរងចាំសមត្ថកិច្ចបច្ចេកទេសវិទ្យាសាស្រ្តនិងពេទ្យជំនាញចុះត្រួតពិនិត្យធ្វើកោសល្យវិច័យតាមក្រោយ៕

ដោយ៖ ឆ្លាម សមុទ្រ