ខេត្តរតនគិរីៈ អាជីវកម្មជីករ៉ែត្បូង យ៉ាងអាណាធិបតេយ្យនៅក្នុងស្រុកកូនមុំ ហាក់បីដូចជាគ្មានអាជ្ញាធរមូលដ្ឋានចុះបង្ក្រាបឡើយ។ សកម្មភាពជីករ៉ែត្បូង និងរ៉ែមាសបានប្រព្រឹត្តិនៅចំណុចអូសាប ស្ថិតក្នុងភូមិ៤ គ៦០ ឃុំត្រពាំងច្រេស ស្រុកកូនមុំ ខេត្តរតនគិរី។
ទីតាំងខាងលើនេះមានថៅកែឈ្មោះ អ៊ីង ភេទប្រុស អាយុ៤៨ឆ្នាំ ជនជាតិខ្មែរ មុខរបរជាអ្នកជីករុករករ៉ែ ជាម្ចាស់រណ្តៅ ដែលមានកម្មករចំនួន១០នាក់ មានទីលំនៅភូមិ១ ឃុំត្រពាំងច្រេស ស្រុកកូនមុំ បាននិយាយក្តែងៗដាក់អ្នកសារពត៌ថាមុខរបររបស់គាត់ជាអ្នកជីករ៉ែមួយជីវិតទៅហើយ បើគាត់មិនជីករ៉ែ គាត់គ្មានមុខរបរអ្វីទេ ហើយចំពោះអភិបាលស្រុកក៏បានជ្រាបរឿងនេះដែរ ប៉ុន្តែមិនបានហាមឃាត់ ឫបង្ក្រាបឡើយ។
ទាក់ទិននឹងរឿងខាងលើនេះលោកអ៊ុង ហួរ អនុប្រធានមន្ទីររ៉ែននឹងថាមពល នៅវេលាម៉ោង៨ព្រឹកថ្ងៃទី០៣ ខែកក្កដា ឆ្នាំ២០១៥ បានដឹកនាំកម្លាំងចំនួន៣នាក់ចុះទៅដល់កន្លែងបានឃើញសកម្មភាពជីរ៉ែត្បូង ដែលស្ថិតនៅភូមិឃុំខាងលើ ប៉ុន្តែមិនទាន់បានបង្ក្រាបភ្លាមៗនោះទេ គឺបានរាយការណ៍ទៅលោកអធិការស្រុក និងក្រសួងរ៉ែននឹងថាមពលរួចហើយ និងអោយអាជ្ញាធរស្រុកផ្អាកសកម្មភាពនេះជាបន្ទាន់ផងដែរ។
បើតាមសម្តីរបស់លោក ហ៊ុន ប៊ុនថាន ប្រធានមន្ទីររ៉ែ និងថាមពលខេត្ត បានប្រាប់តាមទូរស័ព្ទថា ការជីករុករករ៉ែ នៅក្រោមដីដោយគ្មានការសុំច្បាប់ពីមន្ទីរគឺខុសច្បាប់ទាំងស្រុង ហើយអាជីវករ ឫអ្នកជីកត្បូង(ណាំងហ្វាង)នោះត្រូវមកសុំច្បាប់នៅមន្ទីររ៉ែ និងថាមពលផងដែរ។ លោកក៏លើកឡើងបន្តថា សកម្មភាពជីករ៉ែត្បូងនេះគឺមានតាំងពីយូរណាស់មកហើយ ប៉ុន្តែជាលក្ខណៈគ្រួសារប៉ណ្ណោះ ទើបលោកក៏ឲ្យជីវករទាំងនេះមកសុំច្បាប់ផងដែរ៕
