ខេត្តកណ្តាល៖ បុរសម្នាក់ជិះម៉ូតូឌុបស្ត្រីជាប្រពន្ធមានផ្ទៃពោះ៦ខែបម្រុងទៅទិញអីហូបនៅពេលយប់ ខណៈជិះមិនទាន់ដល់គោលដៅផងក៏ជ្រុលចង្កូតទៅបុកគូថរថយន្តធុនធំខូចឈប់ស្ងៀមនៅក្បែរចិញ្ចើមផ្លូវ បណ្តាលឲ្យរងរបួសយ៉ាងធ្ងន់ទាំង២នាក់ប្តីប្រពន្ធ ។ ជនរងគ្រោះទាំង២នាក់ប្តីប្រពន្ធត្រូវបានរថយន្តសាមុយដឹកបញ្ជូនទៅសង្គ្រោះនៅមន្ទីរពេទ្យលោកសង្ឃ ។
ហេតុការណ៍នេះបានកើតឡើងកាលពីវេលាម៉ោង២០ និង៣៥នាទី ថ្ងៃទី១២ ខែសីហា ឆ្នាំ២០១៥ នៅលើកំណាត់ផ្លូវជាតិលេខ៤ ត្រង់ចំណុចចន្លោះគីឡូម៉ែត្រលេខ១-២ ស្ថិតក្នុងភូមិព្រៃគោ ឃុំលំហាច ស្រុកអង្គស្នួល ។
ជនរងគ្រោះឈ្មោះ ថៃ មករ៉ា ភេទប្រុស អាយុ២៨ឆ្នាំ មុខរបរ ជាកម្មករសំណង់ ប្រពន្ធឈ្មោះ ស្រី ម៉ៅ អាយុ២៧ឆ្នាំ មានផ្ទៃពោះ៦ខែ មុខរបរ ជាកម្មការិនីរោងចក្រកាត់ដេរ មានទីលំនៅភូមិសេកពង ឃុំលំហាច ស្រុកអង្គស្នួល ជិះម៉ូតូធុនសេ១០០កូរ៉េ ពណ៌ក្រហម ពាក់ស្លាកលេខ ណ.៩៣៧០-ភព.១ ។
ចំណែកឯរថយន្តម៉ាកFUSO ពណ៌ត្រួយចេក ពាក់ស្លាកលេខភ្នំពេញ3A-1278 ជាប្រភេទរថយន្តបែនដឹកខ្សាច់បើកបរ ដោយជនមិនស្គាល់អត្តសញ្ញាណក្រោយពីកើតហេតុបានរត់គេចខ្លួនបាត់ ៕
ដោយ៖ ស្អាងជ័យ
