ក្រុមManchester Unitedនិង Manchester City ទទួលបាន៣ពិន្ទុបន្ថែមទៀត ដូចគ្នា ខណៈក្រុមហង្សក្រហម Liverpoolទទួលបានតែ១ពិន្ទុប៉ុណ្ណោះក្នុងការប្រកួតក្របខ័ណ្ឌអង់គ្លេស Premier League កាលពីថ្ងៃទី២ ខែមករា ឆ្នាំ២០១៧។
Manchester City អាចយកឈ្នះលើ ក្រុម Burnley ដោយលទ្ធផល 2-1 ក្នុងទឹកដីរបស់ខ្លួនបើទោះបីជានៅសល់គ្នាត្រឹមតែ១០ប៉ុណ្ណោះ។ កីឡាករ Fernandinho ទទួលកាតក្រហមនៅនាទី៣២ត្រូវចាក ចេញពីការប្រកួត ប៉ុន្តែស្មារតីក្រុមម្ចាស់ផ្ទះនៅតែរឹងមាំអាចរកគ្រាប់បាល់បាន២គ្រាប់ដោយកីឡាករ Gael Clichy នៅនាទី៥៨ និងខែ្សប្រយុទ្ធអាហ្សង់ទីន Sergio Aguer នៅនាទី៦២។ ចំណែកក្រុមភ្ញៀវ Burnley រកបានមួយគ្រាប់វិញនៅនាទី៧០ដោយ កីឡាករ Ben Mee ។
ក្រោយទទួលបាន៣ពិន្ទុបន្ថែមក្រុម Man Cityឡើងមកឈរលេខរៀងទី៣វិញមាន៤២ពិន្ទុក្នុងចំណោម២០ប្រកួត។ ចំណែកក្រុមបិសាចក្រហមManchester United វិញ ក៏អាចយកឈ្នះលើក្រុមញញួរធំដោយលទ្ធផល 2-0 ដោយសារតែក្រុម ម្ចាស់ផ្ទះ West Ham សល់គ្នាតែ១០នាក់។
ការប្រកួតចាប់ផ្តើមបាន១៥នាទី ប៉ុណ្ណោះកីឡាករ Sofiane Feghouli របស់ ម្ចាស់ផ្ទះបានទទួលកាតក្រហមពីអាជ្ញា កណ្តាល Mike Dean តែម្តងពេលរូបគេ ប៉ះនឹងខ្សែការពារ Phil Jones របស់ក្លិប បិសាចក្រហម ។
ក្រុមបិសាចក្រហមមិនអាចស៊ុតបាល់បញ្ចូលទីបានឡើយនៅក្នុងតង់ទី១រហូត ដល់នាទី៦៣តង់ទី២ទើបកីឡាករអេស្ប៉ាញJuan Mataអាចស៊ុតបាល់បញ្ចូលទីបាន ហើយខ្សែប្រយុទ្ធជើងចាស់សញ្ជាតិស៊ុយអែតZlatan Ibrahimovicបន្ថែមមួយគ្រាប់ទៀតនៅនាទី៧៨ ។
Manchester United ឈរលេខរៀងទី៦ដដែលមាន៣៩ពិន្ទុស្មើនឹងក្រុមមាន់ខ្នាយមាស Tottenham លេខរៀងទី៥ដែលនឹង ត្រូវប៉ះក្រុមកំពូលតារាង Chelsea នៅថ្ងៃ ពុធនេះ។
នៅក្នុងកីឡដ្ឋាន Stadium of Light របស់ក្លិបឆ្មាខ្មៅ Sunderland ឯណោះវិញ ក្រុមហង្សក្រហម Liverpool បានរបូត២ ពិន្ទុ វិញបន្ទាប់ពីនាំមុខលើក្រុមម្ចាស់ផ្ទះ 2-1 ទៅហើយនោះ ។
ខ្សែប្រយុទ្ធអង់គ្លេស Daniel Sturridge រកគ្រាប់បាល់ឲ្យភ្ញៀវនាំមុខមុននៅនាទី១៩ ប៉ុន្តែម្ចាស់ផ្ទះតាមបានស្មើវិញនៅ នាទី២៥ដោយការស៊ុតបាល់ប៉េណាល់ទី របស់កីឡាករ Jermain Defoe។ ចប់តង់ ទី១ក្រុមទាំងពីរមានលទ្ធផល 1-1 ។
ក្រុមហង្សក្រហមរបស់លោកគ្រូបង្វឹកអាល្លឺម៉ង់ Jurgen Klopp សង្ឃឹមថានឹងទទួលបាន៣ពិន្ទុបន្ថែមទៀតក្រោយកីឡាករ Sadio Maneស៊ុតបញ្ចូលទីនៅនាទី៧២ ប៉ុន្តែពួកគេបែរជារបូត២ពិន្ទុទៅវិញ ដោយការស៊ុតបាល់ពិន័យ១១ម៉ែត្រជាលើកទី២របស់ កីឡាករ Jermain Defoe ហើយចប់ការ ប្រកួតក្រុមទាំង២ទទួលបានតែមួយពិន្ទុ ម្នាក់ប៉ុណ្ណោះ ។
លោក Jurgen Klopp បាននិយាយក្រោយ ការប្រកួតចប់ថា “ខ្ញុំមិនអាចពន្យល់បាន ទេដោយសារខ្ញុំមិនដឹងច្បាស់ឡើយចំពោះអ្វីដែលខ្ញុំបានឃើញនោះ។ ក្រុមSunderlandខិតខំលេងយ៉ាងខ្លាំងហើយពួកគេពិត ជាស័ក្តិសមនឹងទទួលលទ្ធផលនេះ”៕
ដោយ៖ ដេវីត
