ភ្នំពេញ៖ ជនជាតិចិនស្រវឹងស្រាបើករថយន្តឡិចសុីសRX300ទៅបុកគូថរថយន្តឡិចសុីសRX330ដែលឈប់ស្តុបហើយរុញទៅបុករថយន្ត១គ្រឿងទៀតម៉ាកRAV4បណ្តាលឲ្យខូចខាតខ្ទេចអស់មួយជំហៀងខាងឆ្វេង កាលពីវេលាម៉ោង៩ និង២០នាទីយប់ថ្ងៃទី៣ ខែមករា ឆ្នាំ២០១៧ តាមបណ្តោយផ្លូវមុនីវង្ស នៅចំណុចជិតធានាគារកាណាឌីយ៉ាល ស្ថិតនៅក្នុងសង្កាត់ផ្សារថ្មី២ ខណ្ឌដូនពេញ។

តាមប្រភពព័ត៌មានពីសាក្សីដែលឃើញហេតុការណ៍ថា មុនពេលកើតហេតុគេបានឃើញបុរសម្នាក់ជាជនជាតិចិនស្រវឹងស្រាបើករថយន្តបង្កម៉ាកឡិចសុីសRX300 ពណ៌ស្ករ ពាក់ស្លាក់លេខភ្នំពេញ2M-7001 បើកបរតាមបណ្តោយផ្លូវមុនីវង្សក្នុងទិសដៅពីត្បូងទៅជើងក្នុងល្បឿនយ៉ាងលឿនមិនបានមើលថាមានរថយន្ត២គ្រឿង ១គ្រឿងម៉ាកឡិចសុីសRX330 ពណ៌ទឹកប្រាក់ ពាក់ស្លាកលេខ2AE-6692និង១គ្រឿងទៀតម៉ាកRAV4 ពណ៌ទឹកប្រាក់ ពាក់ស្លាកលេខភ្នំពេញ2AK-1303 នៅពីមុខដែលកំពុងតែឈប់ស្តុបក៏បុកតគ្នាពីក្រោយចំពេញទំហឹងបណ្តាលឲ្យរថយន្តឡិចសុីសRX330រុញទៅផ្ទុបនឹងគូថរថយន្តRAV4បណ្តាលឲ្យខូចខាតបង្កខ្ទេចអស់មួយកំណត់ខាងឆ្វេងនិងរថយន្តឡិចសុីសកំពិតគូទក្រោយខាងស្តាំ ចំណែករថយន្តRAV4វិញខូចខាតខាងក្រោយ។

ក្រោយពេលកើតហេតុភាគីទាំង៣បានជជែកគ្នាមិនត្រូវក៏ខាងរថយន្តរងគ្រោះប្រគល់រថយន្តទាំងអស់ឲ្យសមត្ថកិច្ចជំនាញវាស់វែងយកទៅរក្សាទុកនៅការិយាល័យចរាចរណ៍ផ្លូវគោករងចាំដោះស្រាយគ្នានៅពេលក្រោយ៕

ដោយ៖ ព្រែកជ័យ