ភ្នំពេញ៖ គ្រោះថ្នាក់ចរាចរណ៍មួយបានកើត ធ្វើឲ្យបុរសនារី៣នាក់ទៀតរងរបួសធ្ងន់ស្រាល បន្ទាប់ពួកគាត់ជិះម៉ូតូToday១គ្រឿង ហើយត្រូវរថយន្តម៉ាកODបើកបុកចុះពីមុខពេញទំហឹង កាលពីវេលាម៉ោង១០និង២០នាទីយប់ថ្ងៃទី៥ ខែមករា ឆ្នាំ២០១៧ នៅចំណុចខាងកើតណាហ្គាវើល ស្ថិតក្នុងសង្កាត់ទន្លេបាសាក់ ខណ្ឌចំការមន ហើយរថយន្តបើករត់បានប្រហែល១០០ម៉ែត្រចតរថយន្តចោលម្ចាស់រត់ឡើងណាហ្គាបាត់។

តាមសាក្សីនៅកន្លែងកើតហេតុបានឲ្យដឹងថា នៅមុនពេលកើតហេតុគេបានឃើញបុរសម្នាក់ឌុបនារី២នាក់ទៀតជិះម៉ូតូម៉ាកToday ពណ៌ស ពាក់ស្លាកលេខភ្នំពេញ1FM-4228 ធ្វើដំណើរក្នុងទិសដៅពីជើងទៅត្បូង ខណៈមកដល់ចំណុចកើតហេតុស្រាប់មានរថយន្តម៉ាកOD ពណ៌ស ពាក់ស្លាកលេខភ្នំពេញ2AD-3738 បើកបរដោយបុរសម្នាក់ធ្វើដំណើរបញ្ច្រាសទិសគ្នាក្នុងល្បឿនលឿនហើយបានបុកចំពីមុខពេញទំហឹងបណ្តាលឲ្យអ្នកជិះម៉ូតូរងរបួសធ្ងន់ស្រា។

សាក្សីដដែលបានបន្តថា ក្រោយពីបង្ករួចម្ចាស់រថយន្តបានព្យាយាមបើករត់បានចំងាយ១០០ម៉ែត្រទើបឈប់ហើយត្រូវបានសន្តិសុខនាំរត់ឡើងទៅលើណាហ្គាវើលបាត់ដោយបន្សល់ទុករថយន្តនៅខាងក្រោម។

ក្រោយពេលកើតហេតុជនរងគ្រោះត្រូវបានអ្នកជិតខាងយកទៅមន្ទីរពេទ្យ ចំណែករថយន្តនិងម៉ូតូត្រូវបានសមត្ថកិច្ចធ្វើការវាស់វែងយកទៅរក្សាទុកនៅអធិការនគរបាលខណ្ឌចំការមនរងចាំដោះស្រាយពេលក្រោយ៕

ដោយ៖ ភារ៉ា ដង្កោ