ភ្នំពេញ៖ ជនសង្ស័យម្នាក់បានរត់គេចខ្លួនបាត់ស្រមោល បន្ទាប់ពីធ្វើសកម្មភាពលួចរថយន្តដែលគេចតទុកនៅជិតប៉ុស្តិ៍ទឹកល្អក់២ ត្រូវសមត្ថកិច្ចប៉ុស្តិ៍ទឹកល្អក់២សហការជាមួយកម្លាំងល្បាតខណ្ឌ៧មករាកាក់បានតែរថយន្ត កាលពីវេលាម៉ោង១យប់រំលងអធ្រាត្រថ្ងៃទី១៣ ខែមករា ឆ្នាំ២០១៧ តាមបណ្តោយផ្លូវលេខ១០៧ នៅចំណុចក្រោយភោជនីយដ្ឋានថ្មដា ស្ថិតនៅក្នុងសង្កាត់មនោរម្យ ខណ្ឌ៧មករា រាជធានីភ្នំពេញ។

បើតាមប្រភពព័ត៌មានពីសមត្ថកិច្ចបានប្រាប់ឲ្យដឹងថា មុនពេលកើតហេតុរថយន្តម៉ាកកាមរីគូទស្វិត១គ្រឿង ពណ៌ស ពាក់ស្លាកលេខ ឃ៦២៩១ភព២ ដែលចតទុកនៅជិតប៉ុស្តិ៍ទឹកល្អក់២ ក៏ស្រាប់តែមានជនសង្ស័យខាងលើបានដើរចុះឡើងមួយសន្ទុះក្រោយមកក៏បានធ្វើសកម្មភាពលួចកាច់សោរថយន្តរួចបម្រុងបើកគេចខ្លួន ខណៈពេលនោះមានយុវជនមួយក្រុមកំពុងអង្គុយញ៉ាំអីនៅក្បែរនោះបានប្រទះឃើញ ហើយបានរត់ទៅប្រាប់នគរបាលប៉ុស្តិ៍ទឹកល្អក់២ ភ្លាមៗនោះសមត្ថកិច្ចក៏បានអន្តរាគមន៍ជិះដេញតាមពីក្រោយធ្វើឲ្យជនសង្ស័យភ័យហើយក៏បានបើកយ៉ាងលឿនរហូតមកដល់ផ្លូវលេខ១០៧ ក្រោយភោជនីយដ្ឋានថ្មដា ក៏ត្រូវសមត្ថកិច្ចប៉ុស្តិ៍ទឹកល្អក់២សហការជាមួយកម្លាំងល្បាតខណ្ឌ៧មករាឃាត់បានតែរថយន្ត ចំណែកជនសង្ស័យបានចុះរត់គេចខ្លួនបាត់ស្រមោលបាត់ ។

ក្រោយពេលកើតហេតុម្ចាស់រថយន្តមិនបានទៅដាក់ពាក្យបណ្ដឹងនោះទេ ដោយគ្រាន់តែមកយករថយន្តទៅផ្ទះ ៕ ស រស្មី